Kơ sơ̆ 28/3, tơ̆ Anih jang Trung ương Đảng, Tổng Bí thư Nguyễn Phú Trọng hlôi sơng ƀok Vương Ninh, Bơngai jang lơ̆m Trung ương Đảng, Bí thư Anih jang Đảng dêh char Vân Nam tŏk bŏk đei ‘măng năm ngôi tơ̆ Việt Nam păng vang pơ gơ̆r Hop akŏm đơ̆ng Bí thư Anih jang Đảng dôm dêh char Hà Giang, Lào Cai, Lai Châu, Điện Biên kơ Việt Nam hăm dêh char Vân Nam, Trung Quốc. Tơ̆ jơ sơng, Tổng Bí thư Nguyễn Phú Trọng lăng ‘lơ̆ng tơdrong hơtŏk tơiung ‘lơ̆ng tơ̆ lơ tơdrong lơ̆m pơ vei 2 pang khei ‘năr âu ki, lơ̆m noh đei dôm jơnei hơiă găh tơƀơ̆p băl, jang hơdai tơbôl đơ̆ng dôm tơring sơlam kơ Việt Nam hăm dêh char Vân Nam.

Tổng Bí thư Nguyễn Phú Trọng ‘meh vă dêh char Vân Nam păng dôm tơring sơlam Việt Nam ‘noh iung jang hơdrol lơ̆m bơ̆jang kiơ̆ hlôh vao atŭm đơ̆ng Kơdră chĕp kơ̆l gĭt kăl, hơnơ̆ng vei kơ jăp găh tơdrong jang tơbôl păng tơdrong gĭt kăl đơ̆ng tơdrong pơvei Việt – Trung, pơm hơdăh ‘lơ̆ng tơdrong tơchơ̆t atŭm iŏk đei lơ̆m ‘măng năm ngôi tơ̆ Trung Quốc âu ki, tơgop pơtrŭt tơdrong pơ vei jang hơdai tơbôl joăt joe đơ̆ng 2 Đảng, 2 teh đak.