Tổng Bí thư Nguyễn Phú Trọng hôn bơ nê kơ ƀok Kơdră tang măt tôm tơdrong kơ Australia David Hurley kŭm hăm Hơkăn ƀok păng khŭl tang măt gĭt kăl kơ teh đak Australia năm ngôi, bơ̆jang tơ̆ Việt Nam; lăng ‘lơ̆ng tơdrong hơtŏk tơiung ‘lơ̆ng, lơ tơdrong lơ̆m dôm tơdrong jang hơdai 2 pang Việt Nam – Australia khei ‘năr âu ki, mă loi ‘noh jĭ mơdro sa păng tơƀơ̆p pơma dơnuh đơ̆ng kon pơlei.

Đơ̆ng rŏng kơ mơ̆ng ƀok Kơdră tang măt tôm tơdrong tơroi găh pơ tôch ‘măng pơma đam, pơma dơnuh hăm dôm kơdră chĕp kơ̆l Việt Nam păng dôm tơdrong jang đơ̆ng khŭl, Tổng Bí thư drơ̆ng nơ̆r hăm trong jang hơtŏk tơiung tơdrong pơvei 2 teh đak tơ̆ hơnăp kơnh, hơdai hăm pơma hơdăh dôm jơnei iŏk đei  lơ̆m tơlĕch jang tơdrong pơ vei jang hơdai Việt Nam – Australia jĭ tơdrong ‘lơ̆ng vă 2 teh đak yak truh dôm tơdrong hơiă ‘nao hloh. Tổng Bí thư pơma hơdăh Việt Nam bơ̆jang kiơ̆ trong jang tơgŭm hiôk hian, pơm tơm, rơngei, jang hơdai, athei 2 păh tŭn pran tơdrong pơvei chĭnh trĭ, jang kiơ̆ đei yua dôm tơdrong drơ̆ng nơ̆r hlôi kĭ pơ kăp păng pơ trŭt tơƀơ̆p pơma dơnuh đơ̆ng kon pơlei, hơtŏk loi dơ̆ng jang hơdai lơ̆m dôm tơdrong apŭng plĕnh teh, ‘meh vă dôm anih jang 2 păh pơ jing dôm trong tơlĕch jang, tơdrong jang hơ dăh, kiơ̆ rim jăl jang vă hơnơ̆ng hơnhăk jang hơdai 2 pang roi ‘năr roi ‘lơ̆ng hơ iă, tơ pă păng đei yua.