Tổng Bí thư Tô Lâm athei dêh char Bắc Ninh hơnơ̆ng bơ̆ jang ‘lơ̆ng tơdrong tơiung pơjing
Thứ ba, 14:05, 14/01/2025 VOV/Dơ̆ng tơblơ̆ VOV/Dơ̆ng tơblơ̆
VOV4.Bahnar - ‘Năr 13/1, Tổng Bí thư Tô Lâm chĕp kơ̆l Khul jang đơ̆ng Trung ương truh bơ̆ jang hăm Kơdră chĕp kơ̆l dêh char Bắc Ninh păng hmach thơ thou Tết tơ̆ tơring. 

Kiơ̆ đơ̆ng mơ̆ng hơlen nơ̆r tơroi, Tổng Bí thư Tô Lâm tơchĕng ‘lơ̆ng dôm tơdrong jang đei đơ̆ng dêh char Bắc Ninh lơ̆m rim tơdrong jang. Kŭm hăm tơdrong tơƀôh hơdăh dôm tơdrong pran ‘lơ̆ng đơ̆ng tơring, Tổng Bí thư athei, tơ̆ hơnăp kơnh Bắc Ninh hơnơ̆ng akŏm jơhngâm bơ̆ jang tơiung pơjing hơmet ming Đảng, anih jang Chinh trĭ, tơplih ‘nao trong chĕp kơ̆l pơgơ̆r, vă tơdrong tơchơ̆t đơ̆ng Đảng gơ̆h mât lơ̆m tơdrong arih xa tơ̆ yăn âu; Kơplăh dang ei ‘nŏh athei pơgơ̆r đang ‘lơ̆ng Hop akŏm Đảng ƀô̆ jơ̆p tơring păng Hop akŏm Đảng ƀô̆ dêh char ‘măng mă 21 đơ̆ng 2025-2030; hơnơ̆ng tơlĕch jang hơmet ming anih jang chinh trĭ tơ̆ tơring, tŏ sĕt bơngai, bơ̆ jang rơgei, đei yoa kiơ̆ nơ̆r athei đơ̆ng Trung ương.

Tổng Bí thư oei athei Bắc Ninh akŏm jơhngâm vei lăng năng tông, pơm hơtŏk tơdrong arih xa ăn kon pơlei tơ̆ tơring, tơrek truh tơdrong chĕp vei, tưk tơiung tơdrong juăt jŏh ayŏ kơ dŏ xoang ‘lơ̆ng hơiă tơ̆ tơring. Ƀlep ƀât vă sơng xa tết Nguyên đán Ất Tỵ 2025, Tổng Bí thư Tô Lâm năm ngôi, hmach thơ thou Tết ăn đe công nhân bơngai jang păng tơlĕch nơ̆r athei man “Hnam soi kơ Ƀok Hô păng cham ngôi pơhiơ̆ Văn Miếu”, tơ̆ pơlei tơm Bắc Ninh.

VOV/Dơ̆ng tơblơ̆

Viết bình luận

TIN CÙNG CHUYÊN MỤC