Tơ̆ jơ sơng, Tổng Bí thư Tô Lâm lăng ‘lơ̆ng dôm tơdrong hơiă lơ̆m pơvei 2 teh đak lơ̆m rim tơdrong jang, hăm lơ jơnei ‘lơ̆ng, lơ̆m khei ‘năr 2 teh đak tŏk bŏk đei lơ tơdrong jang hơdăh ‘lơ̆ng vă tơbăt 30 sơnăm pơjing tơdrong pơvei jang tơbôl păng 2 sơnăm pơvei jang hơdai gĭt kăl tôm tơdrong. Pơma hơdăh sơnăm 2025 jĭ sơnăm đei tơdrong ‘lơ̆ng gĭt kăl, tơbăt 30 sơnăm pơjing tơdrong pơvei jang tơbôl Việt Nam - Mi, Tổng Bí thư Tô Lâm athei 2 păh hơnơ̆ng jang hơdai tơlĕch jang đei yua tơdrong jang kăl, pơtrŭt dôm ‘măng năm ngôi dih băl tơ̆ rim kơdră, vang pơtrŭt rơngei, sơđơ̆ng jang hơdai păng hơtŏk tơiung tơ̆ tơring păng apŭng plĕnh teh.

Tổng Bí thư Tô Lâm chih iŏk dôm tơdrong hơdrin đơ̆ng Bơngai tang măt Knapper păng đĭ đăng kang ƀô̆, bơngai jang lơ̆m Anih jang tang măt ăn teh đak Mi lơ̆m pơtrŭt, tơlĕch jang đei yua dôm tơdrong drơ̆ng nơ̆r gĭt kăl păng tơdrong tơm jang hơdai lơ̆m tơdrong pơvei Jang hơdai Gĭt kăl tôm tơdrong Việt Nam - Mi lơ̆m rim tơdrong jang nhen chĭnh trĭ - jang tơbôl, mŭk drăm - tĕch mơdro - tơmơ̆t jên jang, khŭl lĭnh - sơđơ̆ng, jang hơdai ‘mêm mơnat păng hơmet ‘lơ̆ng hiong răm đơ̆ng tơblăh vang.