Bơngai tăh hla hơmĕng tơdrong hơmet ming khul kơdră pơgơ̆r gô pơih đei trong ăn teh đak yak tŏk lơ̆m chăl jang tŏk ‘nao. Lơ nơ̆r pơma ‘lơ̆ng găh tơdrong Anih tơm Chinh trĭ tơlĕch 7 tơdrong tơchơ̆t gĭt kăl lơ̆m sơnăm 2025, kŭm hăm tơdrong Quốc hội jăl XV vă hơlen năng, pơdrơ̆ng nơ̆r ăn lơ khôi luơ̆t păng tơdrong tơchơ̆t tih.

Găh trong jang Khul kơdră pơgơ̆r tơring 2 tăl đei tơlĕch jang đơ̆ng ‘năr 1/7/2025, bơngai tăh hla akhan đei lơ tơdrong ‘lơ̆ng, mă loi jĭ tơdrong tơgŭm ăn bơngai pơdơ̆h jang kiơ̆ tơdrong Hơgăt 178 păng 67. Dơ̆ng tang ăn Khul tang măt Quốc hội Hà Nội, Tổng Bí thư Tô Lâm pơma hơdăh, dôm nơ̆r tơgop tơgăl, đei Anih tơm Chinh trĭ, Ban Bí thư hơnơ̆ng tơrek truh, pơtho tơƀôh păng roi tơbăt tơdrong tơchơ̆t vă pơm ‘lơ̆ng ăn khul kơdră pơgơ̆r tơring bơ̆ jang roi đei yoa, dar dĕh pơm lăp hăm tơdrong ‘mĕh vă jang tŏk.