Pơgê 25/9, tơ̆ Hnam Quốc hội pơgơ̆r hop akŏm tơpă Bơngai tang măt Đảng ƀô̆ Quốc hội ‘măng mă I, jăl jang 2025-2030. Hop akŏm đei hơnăn “Pơjing Đảng ƀô̆ rơgŏh ‘lơ̆ng, pran kơjăp; kơdră chĕp kơ̆l Quốc hội tơplih ‘nao pran kơtang, hơtŏk tơdrong ‘lơ̆ng, đei yoa mưh bơ̆ jang, hơđơ̆ng jơhngâm yak mât lơ̆m chăl jang tŏk hơnŭk hơnoa, hiôk jơnap, gơ̆h hơgei, chơt hơiă kơ hơdrĕch hơdrung”.

Kiơ̆ hla ar chih tơroi chinh trĭ, lơ̆m jăl jang 2020-2025, Quốc hội hlôi jang đang ‘lơ̆ng rim tơdrong đei tơlĕch; atŭm hăm ‘nŏh kơchăng chĕp kơ̆l pơgơ̆r, sek tơlang tơtom, đei yoa hăm lơ tơdrong ‘nao đei, pơm lăp hăm tơdrong ‘mĕh vă tơplih ‘nao kơ teh đak hăm tơdrong chĕp kơ̆l pơgơ̆r đơ̆ng Đảng. Hơdrô̆ lơ̆m tơdrong tơiung pơjing, hơmet ming trong tơgŭm, khôi luơ̆t đei lơ tơdrong tơplih ‘nao. Lơ̆m noh, hơiă hlŏh jĭ drơ̆ng nơ̆r hơmet ming, chih tơmât dơ̆ng 1,2 tơdrong lơ̆m Khôi luơ̆t tơm sơnăm 2013, dôm khôi luơ̆t găh khul kơdră pơgơ̆r; dôm tơdrong tơchơ̆t hơmet ming anih jang tơ̆ dêh char, tơmât hơdai anih jang tơ̆ xăh; tơlĕch lơ tơdrong tơgŭm vei sơđơ̆ng tơdrong arih xa tơpôl, hơnhăk ba tơdrong đei yoa ‘lơ̆ng mưh pơvih ăn kon pơlei... Găh noh dơ̆ng, tơdrong jang dăr lăng roi đei yoa, tơdrong jang tơbôl đei tơlĕch jang hrơ̆ch ‘lơ̆ng…

Truh akŏm păng iung pơma nơ̆r pơtho tơ̆ Hop akŏm, Tổng Bí thư Tô Lâm pơma hơdăh, Teh đak bơ̆n oei mât lơ̆m khei ‘năr jang tŏk ‘nao, hăm đon pơhnŏng tôch kơjung, athei rim anih chĕp kơ̆l đảng, dôm bơngai tang măt Quốc hội, kăn ƀô̆, đảng viên, bơngai jang ăn teh đak, bơngai jang hơtŏk hlŏh dơ̆ng đon pơhnŏng chinh trĭ, tơplih ‘nao đon tơchĕng, adrin bơ̆ jang. Tổng Bí thư pơma tơƀôh 2 tơdrong kăl, 5 trong vă jang tơm vă pơma nuh lơ̆m Hop akŏm, pơm hơdăh, chih tơlĕch dơ̆ng, hơmet pơ ‘lơ̆ng, drơ̆ng pôm nơ̆r bơ̆ jang lơ̆m jăl truh, lơ̆m noh athei hơtŏk hơnăp jang đơ̆ng kon pơlei lơ̆m rim tơdrong jang đơ̆ng Quốc hội. Quốc hội Việt Nam athei tơklep kơjăp hăm kon pơlei, tơpă jĭ “Quốc hội kơ kon pơlei, yoa Kon pơlei, đơ̆ng Kon pơlei” - ưh lăp lơ̆m nơ̆r pơma đĕch mă lơ̆m rim khôi luơ̆t, rim 'măng apinh jet, rim tơdrong tơchơ̆t gĭt kăl, athei hue lăng truh tơdrong gĭt kăl hlŏh jĭ: Jơhngâm đon hiôk chơt, phĭ tơtŏ dơnŏ 'lơ̆ng đơ̆ng kon pơlei păng tơdrong hơnŭk hơnoa kơ teh đak: