Hơiă hăm dôm tơdrong jang đei tôch ‘lơ̆ng mă Radio pơdăh um rup VN iŏk đei lơ̆m khei ‘năr âu ki, Tổng Bí thư Tô Lâm pơma hơdăh, lơ̆m chăl jang tŏk ‘nao, ƀât mă đĭ đăng Đảng, đĭ đăng kon pơlei, đĭ đăng khul linh bơ̆n oei adrin bơ̆ jang đang ‘lơ̆ng Tơdrong tơchơ̆t đơ̆ng Hop akŏm mă XIII kơ Đảng, năm truh Hop akŏm mă bơngai tang măt lơ̆m teh đak ‘măng mă XIV, yoa thoi noh Radio pơdăh um rup VN roi athei tơƀôh hơdăh hlŏh dơ̆ng bưng ai, jĭ anih tơm dơnơm pơjing đon lui păng drơ̆ng nơ̆r tơgŭm lơ̆m tơpôl.

Tổng Bí thư Tô Lâm athei, Radio pơdăh um rup VN hơtŏk hrĕnh tơdrong tơplih hăm kơmăy sô̆, tưk tơiung lơ kơmăy kơmŏk roi tơbăt; tŏk jing Anih jang tơroi tơbăt hăm kơmăy kơmŏk ‘nao ‘lơ̆ng kơ teh đak, bơ̆ jang kiơ̆ trong chih akŏm rim tơdrong, iŏk yoa đĭ đăng kơmăy sô̆, dơ̆ng hơdrol lơ̆m tơdrong pơm tơlĕch păng pơih tơroi rim tơdrong ‘lơ̆ng hơiă, hăm lơ nơ̆r pơma, iŏk yoa kơmăy kơmŏk ‘nao gơ̆h hơgei pơvih ăn kon pơlei lơ̆m teh đak păng tơ̆ teh đak đe, vang tơgop vei kơjăp tơdrong pơm tơm kơ teh đak, pơm hơtŏk anih dơ̆ng ăn Việt Nam lơ̆m tơdrong tơroi tơbăt kơ apŭng plenh teh.