Kơsơ̆ năr 27/8, tơ̆ Hà Nội, pơgơ̆r tơbăt 80 sơnăm năr pơjing Hơnih tơm Nô̆i vŭ păng Hop akom tih pơtong dih băl ‘mêm kơ eng teh đak ‘măng mă I, vă hơlen dơ̆ng chăl sơnăm nuih mơng pran kơtang păng ƀlŏk hơdơ̆r, pôk bơnê rim jơhnơr kơdră chĕp pơgơ̆r, kang ƀô̆ ... hơnih nô̆i vŭ vă lui kơjăp hơyak pran kơtang yak mơ̆t lơ̆m chăl ‘nao hăm hơmŏ plang ăn kơ yuơ mĭnh Việt Nam nuih mơng pran kơtang. Tang măt rim kơdră chĕp pơgơ̆r Đảng, Teh đak pôkăn Mê đai bơ̆ jang gơh hơgei dơ̆ng mă Blŭng ăn Hơnih tơm Nô̆i vŭ, Tổng Bí thư Tô Lâm sơkơ̆t hơdăh, mă đơ̆ng lơ̆m chăl ayơ-chăl tơblăh vang dăh mă chăl rơngei hiôk hian, tơ iung pơjing dăh mă tơplih ‘nao-hơnih jang nô̆i vŭ ling lang jing khul nuih mơng pran kơtang, tơnăp, tơgop kơtă lơ̆m pơjing đei trong chĕp pơgơ̆r teh đak păng vei lăng năng tông tơdrong oei sa tơpôl. Tổng Bí thư athei lơ̆m hơnih jang nô̆i vŭ hơnơ̆ng kiơ̆ yok rok jơ̆ng hơnăp jang tơm lơ̆m pơchoh trong păng jang kiơ̆ trong jang tơgŭm djru hơrih sa tơpôl sơđơ̆ng tôm tong, jơ̆p jang, jơnei kơtang; tơplih ‘nao kơtang bơ̆ jang pơting dih băl-pôk hơpăh vă tơpă pơjing đei dôm tơdrong jang pơting dih băl jơ̆p jang, lang să kơtang, pơm hơtŏk jơhngơ̆m đon hơpơi ‘meh vă plang ăn lơ̆m chăl atŏk tơ iung ‘nao; mă kăl, pơm jŭk yŭk trong hơlou tơplih kơsô̆, hơmet pơ ‘lơ̆ng trong bơ̆ jang, đei jing rup yă lơ̆m trong chĕp pơgơ̆r.