Trong gre 26, lơ̆m 40km đơ̆ng Buôn Ma Thuột, pơyan ‘nâu hơnơ̆ng đei tơdrong chĭl hrăt tơ̆ trong. Gre container, gre dơdơng, gre công nông păng đei hloi gre hon đa chơ sầu riêng, tơgar băl kơdâu tơ̆ trong hrăt hrot. Rim ‘măng đei gre container kuĕch kơ̆l, lơ gre nai yak tơ̆ trong ‘nâu nhen ưh gơ̆h kơdâu vih vât hloi. ‘Nhŏng Đinh Quang Huy, kon pơlei tơ̆ xăh Ea Knuếc tơroi: “2,3 sơnăm tơjê̆ âu, tơdrong gre yak vih vât chơ chuĕn tơmam đơ̆ng choh jang xa đei, mă loi jĭ plei sầu riêng, tŏk lơ kơna jing đei gre kơdâu hrăt hrot tơ̆ trong tơ̆ kơmăng kŭm đei, kơ’năr kŭm đei. Inh apĭnh teh đak jăh tơlĕch jên jang pơih xă ƀiơ̆ trong gre ‘nâu vă kon pơlei yak vih vât, chơ chuĕn tơmam hiôk hian ƀiơ̆.”

‘Nhŏng Trần Văn Định, 1 ‘nu bơngai huơ̆r gre container hăm hlŏh 10 sơnăm juăt chơ sầu riêng tĕch tơ̆ teh đak đe păng năm tơ̆ dôm dêh char, plt nai tơroi: “Adrol sơ̆, ƀât sầu riêng tam mă lơ, năm đơ̆ng Krông Pach truh tơ̆ Buôn Ma Thuột lăp dang 25 – 30 pơnĭt đĕch. Mă lei dang ei, plei sầu riêng tôch lơ, gre chơ chuĕn kŭm tŏk ‘năi pơm ăn tơdrong chĭl hrăt tơ̆ trong tôch dêh, yak trong hơtăih dang 30km đĕch athei kơtĕch 1 – 2 jơ ‘mơ̆i, ƀât lăp đunh hlŏh dơ̆ng. Tơdăh 2 tong gre container kơdâu đơ̆ng păih âu, đơ̆ng păih tơto tơƀâp băl ‘nŏh sư găn đĭ trong, gre nai ưh gơ̆h kâu hloi, tôch hơmơt. ‘Nhŏng oh huơ̆r gre hơpơi ‘mĕh teh đak tơlĕch jên pơih xă trong vă tơdrong chơ chuĕn tơmam gơ̆h hiôk hian ƀiơ̆.”

Trung tá Lương Xuân Ngọc, Bơngai chĕp kơ̆l Khul linh kanh sat vei lăng trong nơnăm kơsô̆ 2 Công an dêh char Đắk Lắk tơroi, adrol sơ̆, 1 năr lăp dang 3.000 –5.000 tŏ gre kơdâu tơ̆ trong gre 26 jăl năm klĕch dôm xăh găh apŭng Krông Pach (so) truh tơ̆ Buôn Ma Thuột. Hrei ‘nâu, kơsô̆ âu đĭ tŏk hlŏh 10.000 tŏ gre 1 năr, lơ̆m noh đei kơhrĕng tŏ gre container păng rơbâu tŏ gre dơdơng, gre công nông chơ sầu riêng.

Trung tá Lương Xuân Ngọc tơroi, vei lăng, tơƀôh trong ăn gre kơdâu hiôk hian tơ̆ trong gre 26 dang ei tŏk bŏk jing tơdrong jang tơm đơ̆ng kanh sat vei lăng trong nơnăm: “Nhôn kơchăng ăn 3 grŭp bơ̆ jang hơnơ̆ng, vei lăng, tơƀôh trong ăn gre kơdâu ƀât jơ đei lơ gre yak vih vât đơ̆ng 15h truh 19h kơmăng rim năr. Atŭm hăm ‘nŏh, athei đe kăn ƀô̆ lơ̆m grŭp roi tơƀôh ăn hlŏh 50 tơ ‘ngla anih mong tơmam, hlŏh 150 ‘nu bơnghai huơ̆r gre container păng dang 200 unh hnam kon pơlei đei gre công nông pơm kiơ̆ mă ‘lơ̆ng tơdrong hơgăt chơ chuĕn sầu riêng sơđơ̆ng ‘lơ̆ng tơ̆ trong vă huei đom, tơhlăk, chĭl trong kiơ.”

Trong gre 26 kơjung 151 km, jĭ trong tơm tơƀưh dêh char Đắk Lắk păng Khánh Hòa, tơƀưh trong gre 1A păng lơ tơnŏk duk chơ chuĕn tơmam đơ̆ng choh jang xa năm tơ̆ dôm tơring găh Tu. Ƀok Lương Huy Hoàng – Kơdră chĕp kơ̆l Công ty jang hơdoi vei lăng păng ming man trong gre 26 tơroi, trong gre ‘nâu đei tơlĕch jên pơm hơmet lơ jăl, kơna đei jăl trong xă 11m, đei jăl trong xă lăp 9m, 1,2 jăl trong lăp xă 6 m đĕch. Gre yak vih vât tŏk lơ, oei trong ‘nŏh ưh đei pơm hơmet ‘lơ̆ng kơna jing đei chĭl hrăt.

Kiơ̆ ƀok Hoàng, ‘mĕh sek tơlang kĕh tơdrong ‘nâu, athei pơih xă jăl trong oei đei dơ̆ng jing xă 11m, lăp hăm tơdrong hơgăt trong kâp II, mă lei dang ei oei tơmam mă đei jên vă jang: “Nhôn hlôi pơm hla ar athei Anih vei lăng kon pơlei dêh char Đắk Lắk tơlĕch jên pơm hơmet trong ‘nâu. Mưh đei pơm hơmet, trong gô tơƀưh hăm trong gre kơdâu hrĕnh (Khánh Hoà – Buôn Ma Thuột) truh âu kơnh, tôch hiôk hian ăn tơdrong chơ tĕch tơmam đơ̆ng choh jang xa đei, mă loi ‘nŏh jĭ plei sầu riêng. Tơdrong pơm hơmet jăl trong ‘nâu kăl đei dang 800 ti hlak jên, kơsô̆ jên âu lăp yoa vă man, pơm trong đĕch, yoa teh vă pơm trong đĭ chĕng hơmet adrol bơih, ưh pă đei hrŭ ‘mong jên teh kiơ bơih.”

Mưh trong gre 26 jăl trong đơ̆ng Buôn Ma Thuột năm klĕch dôm xăh Ea Knuếc, Krông Pach, Tân Tiến păng Ea Phê (Đắk Lắk) đei tơlĕch jên pơm hơmet ‘lơ̆ng, trong gre âu gô jing trong tơƀưh gĭt kăl hăm dôm trong gre nai tơ̆ Đắk Lắk, tơƀưh hăm trong gre kơdâu hrĕnh mă blŭng đơ̆ng bri kông hăm đak dơsĭ Buôn Ma Thuột – Khánh Hoà đĭ vă man đang, vă jê̆ tơmât yoa bơih. Trong gre đei pơm hơmet ‘lơ̆ng, pơih đei trong chơ chuĕn, tĕch mơdro tơmam đơ̆ng choh jang xa đei, mă loi jĭ plei sầu riêng roi hrĕnh păng hiôk hian, sơđơ̆ng ‘lơ̆ng ƀiơ̆. Đơ̆ng âu, tơring pơtăm sầu riêng tơm kơ dêh char Đắk Lắk gô đei dơ̆ng tơdrong ‘lơ̆ng vă jang tŏk, hơnhăk ba iŏk yoa lơ hlŏh dơ̆ng./.