Jang kiơ̆ trong jang pơting dih băl tơ iung pơjing tơring tơrang ‘nao, vang iung jang kơ yuơ bơngai dơnuh, 5 sơnăm ou ki, khul ƀô̆ đô̆i dêh char Dak Lăk chă hơvơn đei hloh 2.300 ‘nu kang ƀô̆ ƀô̆ đô̆i hăm vă jê̆ 20.000 năr jang tơgŭm kon pơlei tơring tơnap tap hloh. Chă hơvơn đei hloh 1 ti hlak jên ming man hnam oei ăn rim ŭnh hnam đei iŏk yua ăn teh đak, răt hơdrĕch dơđăh ‘long pơtăm, yŏng kon tơrong, tơmam drăm jang sa ăn rim ŭnh hnam dơnuh. Lơ̆m khei ‘năr đei jĭ hơbuh Covid-19, khul ƀô̆ đô̆i dêh char hlôi iung jang hơdoi hăm rim hơnih bơ̆ jang chinh trĭ tơpôl chă hơvơn đei hloh 3 ti hlak jên tơgŭm djru kon pơlei tơnap tap hăm lơ trong jang hơ iă.

Vang năm păng iung pơma tơ̆ Pơm lêh hop akŏm, Trung tướng Thái Đại Ngọc, Kơdră jang lơ̆m Trung ương Đảng, Yŏng chĕp pơgơ̆r Quân khu 5 hôn bơnê kơtang rim trong jang pơting dih băl jang pran kơtang pôk hơpăh, pơting dih băl jang pran kơtang nuih mơng kơ khul ƀô̆ đô̆i dêh char Dak Lăk lơ̆m 5 sơnăm ou ki. Dôm sơnăm kơnh, tơdrong tơ̆ apŭng plĕnh teh, lơ̆m tơring rŏ năng oei hơnơ̆ng ưh sơđơ̆ng, lơ̆m tơring Quân khu, mă kăl ‘noh tơ̆ Tây Nguyên oei jing mĭnh lơ̆m rim tơdrong hơmơt đei tơdrong, ưh sơđơ̆ng. Khul kơdră chĕp pơgơ̆r Quân khu athei Kơdră Đảng-Jơnŭm chĕp pơgơ̆r pơting dih băl jang pran kơtang pôk hơpăh kơ Hơnih Ƀô̆ đô̆i dêh char Dak Lăk akŏm chĕp pơgơ̆r, pơrô̆ jang kiơ̆ ‘lơ̆ng rim tơdrong jang kăl:“Tơlĕch jang kiơ̆ kơjăp jơhngơ̆m đon ‘lơ̆ng kơ Ƀok Hô găh pơting dih băl ‘mêm kơ eng teh đak; tơlĕch jang kiơ̆ “5 kơrŭn đĭ ai, 5 năm iung jang” đơ̆ng ƀok Tổng Bí thư Nguyễn Phú Trọng; rim hla bơar tơchơ̆t khôi luơ̆t găh jang kiơ̆ bơ̆ jang pơting dih băl, pôk hơpăh. Pơm ăn rim răih kang ƀô̆, ƀô̆ đô̆i, bơngai jang băt hlôh ƀôh hơdăh tơdrong kăl, tơdrong biĕk kơ bơ̆ jang pơting dih băl, pôk hơpăh păng tơdrong iung jang pơting dih băl jang pran kơtang nuih mơng, ‘nou jĭ tơdrong iung jang gơ̆h hơgei kơ “Ƀô̆ đô̆i Ƀok Hô”, trong jang ‘lơ̆ng, trŏ lăp kơ Khul ƀô̆ đô̆i kon pơlei”.

Tơ̆ dêh char Dak Nông, 5 sơnăm ou ki, tơdrong jang pơting dih băl jang pran kơtang nuih mơng kơ khul ƀô̆ đô̆i dêh char hlôi pơjing đei jơhngơ̆m pran gĭt kăl, jơhngơ̆m pran iung tơjră, tơgop gĭt kăl lơ̆m jang kiơ̆ rim trong tơlĕch jang atŏk tơ iung mŭk drăm-tơpôl, hơmet pơ ‘lơ̆ng vei lăng sơđơ̆ng teh đak, sơđơ̆ng tơring. Lơ̆m 5 sơnăm, hlôi đei mơjĭt rơbou kang ƀô̆, ƀô̆ đô̆i tơgŭm djru kon pơlei tơring tơnap tap; chă hơvơn đei hloh 5 ti 600 triu hlak jên ming man 78 pơbŭng hnam tơgoăt tơgoăl; tơgŭm djru 1 ti 400 triu hlak jên pơjing trong jang sa tơgŭm ăn rim ŭnh hnam hơdrin yak hloh dơnuh hin; khăm ming hơmet jĭ đĕch ăn 1.900 ‘nu kon pơlei oei tơ̆ tơring atăih yăih.

Lơ̆m jăl jang 2019 - 2024, pơđĭ lơ̆m dêh char hlôi chă rơih, tơƀôh tơbăt 67 khul, 82 ‘nu bơngai jang ‘lơ̆ng lơ̆m rim tơdrong jang. Lơ̆m 5 sơnăm ou ki đei 31 khul đei Hơnih tơm Ƀô̆ đô̆i păng Quân khu 5 drơ̆ng jing hơnih jang pran kơtang tôm tong “Tơnăp, hơnăp jang ‘lơ̆ng”.

Tơ̆ pơm lêh hop akŏm, Trung tướng Thái Đại Ngọc, Kơdră jang lơ̆m Trung ương Đảng, Yŏng chĕp pơgơ̆r Quân khu 5 hôn bơnê khul ƀô̆ đô̆i dêh char Dak Nông hlôi tơgoăt tơgoăl pôm nơ̆r ƀơ̆r đon, kơchăng iung jang, tơchăr hơ iă tơlĕch jang kiơ̆ tôm tong rim trong jang pơting dih băl jang pran kơtang nuih mơng. Lơ̆m chăl hle, Trung tướng Thái Đại Ngọc athei Khul kơdră chĕp pơgơ̆r Đảng, Khul kơdră chĕp pơgơ̆r Ƀô̆ đô̆i dêh char Dak Nông hơnơ̆ng tơlĕch jang kiơ̆ kơtang ‘lơ̆ng jơhngơ̆m đon ‘lơ̆ng kơ Ƀok Hô găh pơting dih băl ‘mêm kơ eng Teh đak.“Lăng kơjăp tơchă ƀôh, pơtho pơjing, pơrô̆ tơbăt lang să dôm trong jang ‘lơ̆ng, trong tơchăr hơ iă, jơnei, dôm khul jang ‘lơ̆ng, rim bơngai jang pran kơtang gơh hơgei. Tơdrong jang ‘lơ̆ng tôm tong hăm dôm khul, dôm bơngai tơchăr đei dôm trong jang ‘lơ̆ng mă lơ bơngai tim tơchĕng truh, kĕ yak hloh dôm tơdrong tơnap tap mă bơngai anai ưh kơ kĕ yak hloh; jang gơh dôm tơdrong mă lơ bơngai ưh kơ kĕ kơjang dăh mă tim mă jang gơh, đei jơhngơ̆m đon tơchăr hơgei, nơ̆r pơma tơ-‘ngla iung jang hloi. Pơting dih băl kăl tơklep kơjăp hăm pôk hơpăh tơtom, hơpăh tơgăl hăm dôm tơdrong jang đei".

Hloh đơ̆ng Pơm lêh pơting dih băl jang pran kơtang nuih mơng khul ƀô̆ đô̆i jăl jang 2019-2024 mĭnh ‘măng dơ̆ng tơƀôh hơdăh, kang ƀô̆, ƀô̆ đô̆i kơ khul ƀô̆ đô̆i rim dêh char Dak Lăk păng Dak Nông mă đơ̆ng lơ̆m khei ‘năr ayơ, tơdrong jang yă kiơ jei atŏk kơtang jơhngơ̆m đon bơ̆ jang kĕch mang, bơ̆ jang ‘lơ̆ng, tơnăp, nuih mơng, pran kơtang, iung tơjră tang găn dôm tơdrong kơnê̆. Sa roi tơnap tap dang yơ ‘noh khul ƀô̆ đô̆i msa roi pơting dih băl jang pran kơtang dang noh, pơting dih băl tơplih ‘nao, tơchăr hơgei; kăl jang keh đang hơnăp jang kơ khul iung tơblăh vang, kơ khul iung năm bơ̆ jang, khul choh jang sa kơ Khul Ƀô̆ đô̆i kon pơlei Việt Nam.