Lăp đơ̆ng rŏng kơtơ̆ng đei rim “hơyuh gre kơdou 0 hlak jên” tơ̆ Dak Lăk tŏk bŏk sơng iŏk dôm tơmam drăm sa kăl pơtruh ăn kon pơlei tŏk bŏk ƀơm kơnê̆ đơ̆ng ‘mi kial hơbŭt hơbông kơsô̆ 3 pơrăm, hơdruh guăng ‘lơ̆ng Việt Nam 2017 H’Hen Niê hăm ŭnh hnam hlôi tơchơ̆t iŏk pơđĭ phe ƀa mă ŭnh hnam ‘nao yoă preh vă pơtruh ăn kon pơlei tơring đak hơbông pơrăm. Hloh 7 tă phe hlôi ot pi, tăh sĭt lơ̆m ƀi iĕ 5 kĭ păng pơtruh ăn gre chơ năm tơ̆ rim dêh char tơring găh Tu lơ̆m gơmăng năr 10/9. Hơdruh guăng ‘lơ̆ng  H’Hen Niê tơbăt, kơ yuơ tŏk bŏk năm bơ̆ jang tơ̆ Ninh Thuận kơna ưh kơ đei vang iung jang tơ̆ pơlei pơla kơdih Dak Lăk. Mŏ chhưu lơ̆m jơhngơ̆m mư̆h ƀôh ŭnh hnam păng kon pơlei koeng ƀôt vang chă tăh ‘nŭng phe, chơ choĕn phe đơ̆ng hnam oei tơ̆ apŭng Cư̆ Mgar năm tơ̆ pơlei tơm Buôn Ma Thuột tôch tơtom. Hơdrol kơ ‘noh, Hơdruh guăng ‘lơ̆ng H’Hen Niê jei hlôi tơgŭm 100 triu hlak jên lơ̆m tai khoan kơ Hơnih bơ̆ jang tơgŭm djru Trung ương Mặt trận Tổ quốc Việt Nam vă tơgŭm djru ăn kon pơlei tơring ‘mi kial đak hơbông pơrăm.