Lơ̆m ‘măng năm hơpong, bơ̆ jang đơ̆ng Khul tang măt ăn Đảng Cộng sản Cuba tơ̆ Việt Nam, pơgê 4/5, Khul tang măt ăn Đảng Cộng sản Việt Nam yoa yă Trương Thị Mai, Kơdră chĕp kơ̆l Ban Bí thư chĕp kơ̆l hlôi pơma đam hăm Khul tang măt ăn Đảng Cộng sản Cuba.

Tang măt ăn Trung ương Đảng Cộng sản Việt Nam, yă Trương Thị Mai hưch hanh sơng Khul tang măt ăn Đảng Cộng sản Cuba năm hơpong, bơ̆ jang tơ̆ Việt Nam păng vang pơgơ̆r Hop akŏm lĭ luơ̆n ‘măng mă V đơ̆ng 2 Đảng; pơma tơƀôh dơ̆ng trong jang ưh đei tơplih đơ̆ng Việt Nam ‘nŏh jĭ tơjră hăm trong jang pơvang găn, kâm tĕch mơdro hăm tĕh đak Cuba; tơƀôh đon lui hăm tơdrong chĕp kơ̆l pơgơ̆r đơ̆ng Đảng Cộng sản Cuba, Đảng, tĕh đak păng kon pơlei Cuba gô bơ̆jang đei jơnei dôm tơdrong tơchơ̆t đơ̆ng Hop akŏm mă VIII tơlĕch. 

Tơ̆ jơ pơma đam, 2 păh pơma nuh, hơlen năng dôm tơdrong jang đei mưh bơ̆ jang kiơ̆ tơdrong drơ̆ng nơ̆r jang hơdoi đơ̆ng 2018 - 2023 kơplăh 2 Đảng, mă loi jĭ hăm dôm tơdrong jang hơdoi tơm nhen pơgơ̆r tơƀâp ăn dôm khul jang tih, nơ̆r tơblang păng tơpă tơ̆ yăn âu, tơdrong pơtho ăn kăn ƀô̆, jang hơdoi găh tơdrong roi tơbăt, jang hơdoi lơ̆m rim hop akŏm, khul grŭp lơ̆m apŭng plenh tĕh, atŭm hăm ‘nŏh chih hơdăh dôm tơdrong tơm păng trong vă jang hơdoi đơ̆ng 2 Đảng tơ̆ hơnăp kơnh, mă loi iŏk tơdrong pơvei đơ̆ng Đảng pơm tơdrong jang chinh trĭ tơm dơnơm vă hơtŏk tơdrong jang hơdoi đơ̆ng 2 tĕh đak.