Ƀar păh tơƀôh đon hơiă tơ̆ hơnăp dôm tơdrong tŏk ‘lơ̆ng lơ̆m tơdrong pơvei đơ̆ng sơ̆ păng jang hơdoi gĭt kăl tôm tơdrong Việt Nam – Nga khei ‘năr  âu ki. Ƀok Kơdră Trần Thanh Mẫn athei Đuma Nga hơnơ̆ng jang hơdoi kơjăp hăm Quốc hội Việt Nam, roi tơƀôh dôm tơdrong kăl vă pơjing “Quốc hội rơgei”, tơgŭm chih pơkeh khôi luơ̆t păng hơmet pơ ‘lơ̆ng dôm tơdrong oei tơhlăk ăn dôm tơdrong jang hơdoi.

Ƀar păh drơ̆ng nơ̆r hơtŏk tơdrong jang hơdoi mŭk drăm, tĕch mơdro, tơmât jên jang, unh hơyuh, khoa hŏk – kơmăy kơmŏk, pơtho pơhrăm, joh ayŏ kơ dŏ xoang păng pơvei ăn kon pơlei. Kơdră Volodin pơma hơdăh, Đuma teh đak Nga kơchăng pơih xă dôm trong jang hơdoi ‘nao, tơgŭm pơtho pơhrăm dôm tơdrong jang mă Nga jang gơ̆h hơgei, pran ‘lơ̆ng, atŭm hăm ‘nŏh pơtrŭt pơtho nơ̆r Yoăn tơ̆ Nga păng nơ̆r Nga tơ̆ Việt Nam, vang tơgop hơmet kơjăp tơdrong pơvei jang hơdoi tôm tơdrong.