Vă gơ̆h đei tơdrong tôch gĭt kăl lơ̆m jơhnơr arih âu ‘nŏh jĭ dôm năr ưh đei pơdơh đơ̆ng 1 khul kăn ƀô̆, ƀât mă lơ̆m ti nhen ưh đei yă kiơ ‘ngoăih kơ jơhngâm đon adrin păng gơ̆h hơgei. Mĭnh anih bơ̆ jang xă 30m², 1 pôm micro, 2,3 tŏ kơmăy tăng âm đei pơm hơmet ming păng dôm blăh khăn buk kơvăr jŭm dăr jing anih hyup nơ̆r mă blŭng kơ Radio nơ̆r pơma Việt Nam.

‘Năr 2/9/1945, mưh Ƀok Hô Pơre nơ̆r tơbăt Pơjing đei teh đak kơdih, rơngei hiôk hian, dôm bơngai jang ki thuơ̆t hlôi hyup iŏk nơ̆r pơma đơ̆ng Cham xă Ba Đình pơih ăn kơ triu plei nuih mơ̆ng, mă đơ̆ng kơmăy so, ưh ‘lơ̆ng păng oei đei lơ tơdrong pơmat tat ră.

Đơ̆ng hơtuch sơnăm 1946, ƀât mă jơ̆p lơ̆m teh đak vang iung tơblăh Phalăng, Radio nơ̆r pơma VN mât lơ̆m dôm sơnăm tôch gĭt kăl: chơ pơdŭ kơmăy vit vât vă gơ̆h vei lăng sơđơ̆ng ‘lơ̆ng, hơnơ̆ng pơih pơre ăn ăn kon pơlei mơ̆ng. Lăp jô̆ hơdrô̆ 9 sơnăm iung tơblăh Phalăng, Radio đei 14 vât chơ chuĕn tơmam vih vât, đơ̆ng Bạch Mai truh tơ̆ Hnam Chuơ Trầm, đang kơ ‘nŏh đơ̆ng Bó Lù - Ba Bể, Hát Môn…

Đơ̆ng rŏng sơnăm 1975, teh đak jing minh, Radio nơ̆r pơma VN mât lơ̆m chăl jang tŏk. Đơ̆ng sơnăm 2009, pơih pơre tơ̆ Đak dơsĭ Biển Đông pơih truh tơ̆ 3 tơring đak dơsĭ hơtăih yăih ‘nŏh jĭ tơring Hoàng Sa, Trường Sa păng Ving Thái Lan. Sơnăm 2020, Radio nơ̆r pơma VN pơm Anih pơih rapor tơring Nam Trung bộ vă pơih dôm kênh VOV1, VOV5 (nơ̆r Anh păng nơ̆r Trung) pơih truh tơ̆ tơring đak dơsĭ găh achon Trường Sa hăm trong hơyuh (MW), vang tơgop roi tơbăt, vei lăng kơjăp ‘lơ̆ng tơdrong sơđơ̆ng chinh trĭ păng tơƀôh hơdăh tơdrong pơm tơm kơ teh đak tơ̆ đak dơsĭ.

80 sơnăm âu ki, đơ̆ng micro iĕ ioch truh tơdrong pơih tơroi jơ̆p lơ̆m teh đak, Nơ̆r pơma Việt Nam ling lang păr ang, jĭ gơng tơƀưh hăm rim bơngai. Ƀok Phạm Mạnh Hùng – Phŏ Kơdră chĕp kơ̆l Radio nơ̆r VN pơma hơdăh: Radio nơ̆r pơma Việt Nam ling lang hưch hanh jĭ Anih chih hla ar tơroi mă blŭng yoa Ƀok Hô pơjing đơ̆ng rŏng kơ Kăch mang khei 8, tơklep kơjăp hăm chăl jang tŏk teh đak păng vang tơgop gĭt kăl lơ̆m 80 sơnăm âu ki:

“Tơdrong jang tŏk 80 sơnăm âu ki đơ̆ng Radio nơ̆r pơma Việt Nam, đơ̆ng năr pơih tơroi mă blŭng ‘năr 7/9 sơnăm 1945 truh chăl tơplih ‘nao hrei ‘nâu. Kơplăh dŏh sơ̆ Radio jĭ anih chih hla ar tơroi mă blŭng đei Ƀok Hô pơjing lơ̆m chăl chĕp kơ̆l ‘nao. Đơ̆ng rŏng kơ ‘nŏh Radio tơklep kơjăp hăm lơ tơdrong gĭt kăl kơ teh đak, nhen tơdrong tơblăh Phalăng, năm truh tơdrong jơnei sơnăm 1954, đang kơ ‘nŏh jĭ tơdrong tơblăh Mi dŏng teh đak, jing đei jơnei lơ̆m pơyan Puih mak sơnăm 1975. Ƀlă đơ̆ng noh jĭ chăl tơplih ‘nao, tơdrong vang jang đơ̆ng khul chih tơdrong kơtơ̆ng ang, chih hơmet ming tơ̆ Radio hăm tơdrong pơlung, tưk tơiung lơ trong jang ‘nao găh mŭk drăm tơpôl vang tơgop kŭm hăm hla ar tơroi lơ̆m teh đak, kŭm hăm tơpôl, kŭm hăm Đảng păng teh đak năm truh 1 tơdrong tơplih ‘nao tôm tơdrong lơ̆m teh đak, jô̆ hloi lơ̆m chăl pơih ‘măng mât jang hơdoi hăm apŭng plenh teh păng hơmet ăn chăl blŭng lơ̆m chăl jang tŏk.”   

Yak mât lơ̆m chăl ‘nao, Radio nơ̆r pơma VN năng kăl truh hơnăp jang roi tơbăt, vang tơgop vei lăng păng atŏk tơiung teh đak, hue lăng truh dôm khei ‘năr gĭt kăl nhen 100 sơnăm pơjing Đảng Cộng sản Việt Nam păng 100 sơnăm pơjing teh đak Cộng hòa xã hội chủ nghĩa Việt Nam. Dang ei Radio oei atŏk tơiung hrơ̆ch ‘lơ̆ng đei hloi bơ̆n ƀăo in, ƀăo điên tư, Pơih pơre nơ̆r, chih tơroi hăm kơmăy sô̆; atŏk tơiung tơdrong pran đơ̆ng anih chioh hla ar tơroi vă gơ̆h jing anih chih hla ar tơroi tơm, chih tơroi trŏ ƀlep, gơ̆h hơgei, gơ̆h tơƀôh trong chong glung ăn tơpôl, tơgŭm ăn tơpôl hlôh vao hơdăh rim tơdrong lơ̆m teh đak păng apŭng plenh teh, pơjing tơdrong drơ̆ng nơ̆r, mât 1 ƀơ̆r đon lơ̆m tơpôl păng tơiung jơhngâm hưch hanh ăn đĭ đăng kon pơlei.

Pơma tơ̆ anih ming pơdă tơmam “80 sơnăm Nơ̆r pơma Việt Nam yak hơdoi hăm teh đak”, ƀok Đỗ Tiến Sỹ, Kơdră jang lơ̆m Trung ương Đảng, Kơdră chĕp kơ̆l Radio nơ̆r pơma Việt Nam pơma hơdăh: “Radio nơ̆r pơma Việt Nam hăm hơnăp jang jĭ anih chih hla ar tơroi tơm kơ teh đak vă hơnơ̆ng iŏk yoa kơmăy kơmŏk ‘nao vă bơ̆ jang tơdrong jang chinh trĭ đei pơjao păng bơ̆ jang dôm tơdrong jang đei tơlĕch, dôm tơdrong jang hơdoi đei ƀơm truh, vang tơgop tưk tơiung jơhngâm đon hưch hanh ăn hơdrĕch hơdrung, tơiung jơhngâm ‘mêm kơ teh đak, tơpăr đon hơpơi ‘mĕh rơngei hiôk hian păng đon lui kơjăp tơ̆ ning mônh kơnh jang tŏk pran, hơnŭk hơnoa lơ̆m chăl jang tŏk đơ̆ng hơdrĕch hơdrung Việt Nam./.