Jăl jang âu ki, Anih jang Măt trâ̆n tôh kuôk Việt Nam dôm jăl jang lơ̆m dêh char hlôi hơvơn kon pơlei pơlong hŏk pơhrăm, pơm jang gơh hơgei, jang đei jơnei dôm tơchơ̆t hơtŏk mŭk drăm, joh ayŏ tơpôl; hăt hot vang jang chă hơlen dôm tơdrong đei ƀôh lơ̆m tơpôl; tang găn păng tơjră xa pơjĭp, huach kư̆ kă, tơgop pơ-‘lơ̆ng Đảng, jơnŭm pơgơ̆r tơring kơjăp hlăng ‘lơ̆ng.

Pơđăm sơnăm kơ âu, Jên Mong “Tơgŭm bơngai hin dơnuh” dôm jăl jang kơ dêh char hlôi hơvơn đei jê̆ 59 tih hlj, tơgŭm man ‘nao păng hơmet ming hloh 1.000 tŏ hnam tơguăt tơguăl, asong ăn hloh 35.800 tơpu tơmam ƀơ̆t ‘năr lêh, têt, tơgŭm hloh 270 unh hnam hin dơnuh, tơjê̆ hin dơnuh hơtŏk pơm jang. Hop akŏm bơngai tang măt tơlĕch 91 bơngai jang lơ̆m Anih jang Măt trâ̆n tôh kuôk Việt Nam dêh char jăl ‘nao. Yă Y Thị Bích Thọ đei hop akŏm pôk jang Kơdră Anih jang Măt trâ̆n tôh kuôk Việt Nam dêh char Kon Tum jăl 11.