VOV4.Bahnar - Lâm Đồng dang ei đei 5 tơ mam đơ̆ng rong kon tơ rong đei trong jang hơ doi pơm hơ tŏk kơ jă tĕch ‘nŏh: jang hơ doi tĕch mơ dro đak toh, jang hơ doi rong nhŭng, jang hơ doi rong iĕr, jang hơ doi rong rơ mo pơm ‘nhĕm păng jang hơ doi tĕch mơ dro tơ pu hơ drông pơm brai.

Vă tưk tơ iung dôm trong jang hơ doi rong kon tơ rong, pơm tơ lĕch tơ mam xa păng tĕch mơ dro, dêh char Lâm Đồng pơ jing tơ drong ‘lơ̆ng ăn dôm khul grŭp, rim bơ ngai, anih pơm tơ lĕch, tĕch mơ dro tơ mam, kon tơ rong kĭ pơ kăp hla ar răt iŏk hăm dôm anih rong, unh hnam rong kon tơ rong nhen: Trong jang hơ doi rong rơ mo tĕch ‘nhĕm hơ dai hăm tĕch mơ dro tơ mam đơ̆ng HTX Võ Thị Xoan jang hăm 60 unh hnam, hăm 600 tŏ kon tơ rong, ‘nhĕm iŏk đei 200 tân 1 sơ năm.

Công ty TNHH Ba Minh jang hơ doi găh rong sơ drông pơm brai kŭm hăm 50 unh hnam (tơ̆ Lâm Hà, Đức Trọng, Đam Rông), lơ̆m hơ găt tĕh xă 23 ha rong sơ drông pơm brai hăm 1.000 kơ hôp kơ tăp sơ drông, iŏk đei 40 tân tơ pu sơ drông pơm brai 1 sơ năm, đĭ đăng tơ pu sơ drông pơm brai đơ̆ng dôm unh hnam vang jang hơ doi đei anih răt iŏk tơ mam tôch sơ đơ̆ng kiơ̆ đơ̆ng hla ar kĭ pơ kăp.

Dơ̆ng: Tơ blơ̆