VOV4.Bahnar - Vă atŏk kơtang jang sa iŏk yua kơ jăp păng ƀrư̆ ƀrư̆ đei lơ ‘long pơtăm, apŭng Kat Tiên, dêh char Lâm Đồng tŏk bŏk atŏk kơtang lang să rim chŭn mir ‘nhot. Dang ei, tơring hlôi pơjing tơring joăt pơtăm ‘nhot să 524 ha tơ ter đak kroong Đồng Nai. Rim ‘nhot đei pơtăm tơ̆ Kat Tiên ‘nŏh: Hla sơƀei, tơ̆h, pia, hla pơya păng xalăch. Rim ‘nhot chă pơtăm tơ̆ chŭn pơgar ‘nhot tơter thoong đak kroong Đồng Nai jing ‘lơ̆ng, dă ƀiơ̆ sơdrông pơrăm păng đei đe khan ‘nhot sa ‘lơ̆ng. Jô̆ hơtŏ lơ̆m 1 ha pơtăm ‘nhot hơnhăk ăn kon pơlei Kat Tiên jang sa iok đei đơ̆ng 300 trĭu trŭh 500 trĭu hlak jên lơ̆m 1 sơnăm, lơ hlŏh 5 trŭh 10 ‘măng pơtêng hăm jang ƀa. Dang ei, Dơnŏ anĭh vei lăng chŏh jang sa apŭng Kat Tiên tŏk bŏk pơtrŭt păng tơgŭm pơtho ăn kih thuơ̆t, kon jên jang, hơdrĕch vă rim ŭnh hnam đei tĕh tơter đak kroong Đồng Nai hơnơ̆ng tơplĭh đơ̆ng ‘long pơtăm anai chă rei pơtăm ‘nhot kiơ̆ kmăi kmŏk hơgei đei iŏk yua kơ jăp.

Tơblơ̆ nơ̆r: Amazưt