VOV.Bahnar - Lăp đơ̆ng rŏng đunh khei ‘năr tơ jur kơtang, kơ jă tơpu sơdrông pơm brai lơ̆m dêh char Lâm Đồng hlôi tŏk măt dơ̆ng, kon pơlei pơtăm pơmur rong sơdrông pơm brai chhôk hơ iă ‘nă hal, sơđơ̆ng jơhngơ̆m jang sa. Vă đĭ sơnăm 2020, kơ jă tơpu sơdrông pơm brai lơ̆m dêh char Lâm Đồng đơ̆ng 110 trŭh 120.000 hlak jên lơ̆m 1 kĭ, mă lei trŭh dang ei, hlôi tŏk trŭh 180.000 hlak jên lơ̆m 1 kĭ.

Kơjă tơpu sơdrông pơm brai tŏk măt dơ̆ng

Kiơ̆ đơ̆ng hơnĭh rong hơdrông hơnar, tĕch mơdo tơpu sơdrông pơm brai tơ̆ tĕh đak đe tơbăt: Tơdrong tơpu sơdrông pơm brai tŏk măt ‘nŏh kơ yuơ tơdrong tĕch mơdro tơpu sơdrông pơm brai tơ̆ tĕh đak đe măt, sơđơ̆ng. Mĭnh ƀar tĕh đak hlôi răt iŏk dơ̆ng, rim hơnih mơdro sa lơ̆m dêh char tŏk bŏk đei đe apĭnh răt iŏk lơ ... tơdrong kơ jă tơpu sơdrông pơm brai tŏk măt, tơgŭm ăn kon pơlei sơđơ̆ng jang sa, pơ̆ih să chă pơtăm ‘long pơmur rong sơdrông pơm brai, atŏk kơtang jang sa iŏk yua đei ăn ŭnh hnam. Lơ̆m dêh char Lâm Đồng hrei au đei 15.000 ŭnh hnam kon pơlei pơtăm ‘long pơmur rong sơdrông pơm brai, chă pơtăm lơ̆m 8.700 ha pơmur, tơmơ̆t 70% hơgăt tĕh pơtăm ‘long pơmur lơ̆m tĕh đak.

Tơblơ̆ nơ̆r: Amazưt