VOV4.Bahnar – Kơyuơ ƀơm pơrang jĭ Covid-19 pơrăm, khei năr âu ki, lơ kon pơlei jang mir dêh char Lâm Đồng jing tơnap tap kơyuơ ưh đei xơđơ̆ng tĕch tơlĕch tơmam drăm. Vă hơmet tơdrong âu, anih jang găh choh pơtăm dêh char Lâm Đồng tŏk bŏk oei xơkơ̆t ăn kon pơlei hơtŏk pran pơtăm ‘nhot, ƀum plei kiơ̆ pơkăp trŏ ƀlep lơ̆m khei năr xơđơ̆ng ‘nao.

Dôm năr kơ âu, unh hnam pơmai Nguyễn Thị Mơ, tơ̆ phương 8, plei tơm Đà Lạt akŏm pơ ‘nguaih pơgar pơkao vă tơplih pơtăm hơdrĕch ‘nhot, ƀum, plei pơyua đunh năr. Pơmai Mơ ăn tơbăt, kơyuơ răm đơ̆ng pơrang jĭ Covid-19, lơ hơgăt teh pơtăm pơkao kăt xơdrai ưh đei yua, pơtăm pơkao pă đei ƀlep noh unh hnam tơplih pơtăm hơmrĕ, ‘nhot, ƀum nai: “Dang ei tơmam drăm pơtơm tŏk kơjă, tơdrong hiôk pơtăm hơmrĕ noh gơh yua đunh năr hloh noh đei yua da ƀiơ̆ hloh pơtêng hăm dôm hơdrĕch ‘long pơtăm nai. Dôm tơmam axong jang lơ jên mă khei năr yua tŏ xĕt năr noh lôh truh kơ 80%. Oei hơmrĕ noh đei xa hloh ƀar ‘măng mă khei năr đei yua đunh noh duh hơmet ƀiơ̆. Oei hăm dôm hơdrĕch pơkao nhen pơkao kŭk, pơkao kâm chuơ̆ng tuh lê̆ tơ̆ pơgar lôh truh 100%”.

Vă pơm jang găh choh pơtăm trŏ hăm khei năr pơrang jĭ Covid-19 hơbuh hli, anih jang găh choh pơtăm dêh char Lâm Đồng hlôi pơgơ̆r jang kiơ̆ pơkăp axong răh tơmam tĕch lơ̆m tơring, vei xơđơ̆ng răh pơkăp pơm jang păng pơyua ăn kon pơlei. Kiơ̆ kơ ƀok Nguyễn Văn Châu, Phŏ kơdră Anih Choh jang xa păng Hơtŏk tơring pơxĕl dêh char Lâm Đồng, pơkăp jang âu vă xơkơ̆t ăn kon pơlei pơm jang trŏ ƀlep, vei xơđơ̆ng tĕch tơmam ăn tơring đei pơhlom 6.800 tâ̆n ‘nhot, ƀum plei lơ kơloăi minh năr. Lơ̆m noh, tơrĕk tơplih đơ̆ng hơgăt pơtăm hơdrĕch nai tŏk bŏk oei ƀơm tơnap tap nhen pơkao kăt xơdrai tŏ xĕt năr, vă pơtăm ‘nhot, ƀum, plei đei yua lơ̆m tŏ xĕt năr, ƀônh vei lăng, đei yua đunh năr păng gơh vei đunh, pơm trong hiôk ăn tơdrong chơ pơdŭ. Ƀok Nguyễn Văn Châu ăn tơbăt: “2 tơmam drăm mă ƀơm răm lơ hloh lơ̆m khei năr pơrang jĭ Covid-19 hơbuh âu ki noh ‘nhot, ƀum, plei păng pơkao. Dêh char hlôi jang atŭm hăm dôm tơring hơlen păng pơkăp trong jang tŏ xĕt năr, xơkơ̆t noh pơtoi tơdrong rei pơtăm vă vei xơđơ̆ng hơgăt hlôi tơlĕch. Rim năr axong tĕch tơlĕch lơ̆m tơring pơhlom 6.864 tâ̆n ‘nhot, ƀum, plei, xơđơ̆ng tơmam choh pơtăm ăn kon pơlei ưh đei ƀơm răm. Nhôn xơkơ̆t noh tơjur hơgăt pơtăm ‘nhot xa hla păng tơplih tŏ xĕt hơgăt pơtăm pơkao vă pơtăm ‘nhot ‘măn axong tĕch lơ̆m tơring, ưh đei lê̆ tơdrong kơƀah”.

Atŭm hăm xơkơ̆t pơm jang, anih jang găh choh pơtăm dêh char Lâm Đồng duh hơtŏk akŏm kơtơ̆ng ang, tơroi tơdrong hơtŏk choh pơtăm, kơjă tĕch tơlĕch... vă tơgŭm kon pơlei kơchăng hloh lơ̆m tơdrong pơm jang. Mă kăl noh pơm trong hiôk ăn kon pơlei tơroh pơm jang hăm anih jang mŭk drăm, hơp tak xăh vă xơđơ̆ng tĕch tơlĕch.

Lan chih păng pơre nơ̆r