VOV4.Bahnar - Kơ sơ̆ ‘năr 7/6, tơ̆ cham gre păr Nội Bài, Công ty jang hơ doi Pacific Foods hlôi tĕch plei vải thiều Thanh Hà, Hải Dương mă blŭng ăn châu Âu kiơ̆ tơ drong tơ chơ̆t Tĕh mơ dro hiôk hian đơ̆ng Việt Nam păng EU (EVFTA). Lơ̆m giĕng truh gô đei dơ̆ng plei vải thiều Lục Ngạn, Bắc Giang vă tĕch ăn grŭp 27 tĕh đak rơih tơ mam tôch hơ len âu.

Lơ̆m jơ pơm lêh, ƀok Vũ Bá Phú, Kơ dră Anih tơ lĕch trong tĕch mơ dro kơ Anih tơm vei lăng jang kơ măy, tĕch mơ dro ăn tơ băt: mă đơ̆ng ƀơm ưh ‘lơ̆ng đơ̆ng jĭ covid19 mă lei Anih tơm hlôi jang hơ doi hăm Anih tơm vei lăng choh jang xa păng atŏk tơ iung tơ ring tơ rang bơ̆ jang lơ trong tôch ‘lơ̆ng đơ̆ng pơ yan phĕ 2021 vă chă anih răt tơ mam lơ̆m tĕh đak păng mă loi ‘nŏh tĕch ăn tĕh đak đe.

Dang ei dôm jĭt tân plei vải thiều đơ̆ng 2 dêh char Hải Dương păng Bắc Giang hlôi đei kơ deng ming tĕch tơ̆ lơ siêu thị Nhật Bản, Singapore. Păng 2,3 năr truh ‘nŏh tĕch tơ̆ dôm tĕh đak EU – anih tĕch mơ dro đei dang 430 triu ‘nu kon pơ lei. Tơ drong ‘nâu gơ̆h đei gơ nơm dôm tơ drong adrin, chă trong jang xa, tĕch mơ dro tơ mam lơ̆m pơ yan phĕ plei vải sơ năm 2021.

Dơ̆ng: Tơ blơ̆