VOV4.Bahnar - ...! Jang kiơ̆ trong jang đơ̆ng Khŭl kơdră teh đak, pơgơ̆r đơ̆ng Anih vei lăng kon pơlei dêh char Kon Tum, hloh 10 sơnăm Anih mong jên Vei lăng păng Hơtŏk tơiung bri dêh char Kon Tum hlôi bơ̆jang kiơ̆ tơdrong pơjao vei lăng bri ăn kơ hloh 3.330 ŭnh hnam păng 168 tơpôl kon pơlei oei, 30 tơ ‘ngla bri iŏk vei lăng hloh 375.000 hek tar bri. Rim sơnăm dôm ŭnh hnam, kon pơlei, tơ ‘ngla bri iŏk jô̆ păh lăp hloh 390 ti hlak jên kla ăn iŏk yua cham char bri. Jên iŏk âu hlôi păng tŏk bŏk tơgop ‘lơ̆ng tơgŭm dôm ŭnh hnam kon pơlei hơtŏk tơiung mŭk drăm sut pơngot tơ jur dơnuh hin păng pơjing tơring tơrang ‘nao.