Dêh char Gia Lai đei lơ tơdrong ‘lơ̆ng vă tưk tơiung dôm tơdrong chă tơmang lăng tơ̆ bri brăh, jŏh ayŏ kơ dŏ xoang, tơpôl... Dêh char đei lơ tơdrong jŏh ayŏ kơ dŏ xoang tôch hơiă, đei tơdrong juăt tôn chĭng chêng đơ̆ng sơ̆, đei Anih vei lăng tơmam bri brăh Kon Hà Nừng, kŭm hăm lơ tơdrong choh jang xa păng chơ kơi đak ‘lơ̆ng rŏ, hơyuh tŏ kial rơngơp, lơ anih gru groa so păng anih gru groa chăl pơm tơmam hăm tơmo sơ̆…

Kiơ̆ trong jang vă atŏk tơiung chă tơmang lăng đơ̆ng 2021-2025 kơ Anih vei lăng kon pơlei dêh char Gia Lai, dêh char vă adrin truh sơnăm 2025, chă tơmang lăng jing anih jang mŭk drăm tơm, đei lơ kơloăi, bơ̆ jang gơ̆h hơgei, ‘lơ̆ng. Lơ̆m jăl âu, dêh char tơlĕch hlŏh 500 ti hlak jên đơ̆ng tĕh đak vă tơlĕch 9 tơdrong jang man anih jang, pơm trong pơih trong ăn tơdrong atŏk tơiung chă tơmang lăng. Rim sơnăm, dêh char pơgơ̆r lơ tơdrong jŏh ayŏ kơ dŏ xoang, tơplŏng kơdâu; hơtŏk trong roi tơbăt dôm tơdrong pran ‘lơ̆ng găh chă tơmang lăng.

Mă lei, dang ei, ‘nao đei 3/9 tơdrong jang man anih jang, pơm trong hlôi jang đang bơih đĕch. Gia Lai tam mă sơng đei anih jang đơ̆ng tĕh đak đe truh, anih jang hơdoi găh tơmang lăng jang xa; tơdrong ‘lơ̆ng, tơmam pơyoa ăn chă tơmang lăng tam gan hơiă, tam mă ‘lơ̆ng ‘năi.

Ƀok Nguyễn Tấn Thành- Kơdră vei lăng Khul jang găh chă tơmang lăng Gia Lai đei nơ̆r pơma: “Bơ̆n athei hơlen năng dơ̆ng: tĕh đak hlôi pơjing đei anih tơmât jên jang rơhơi hiôk, ‘lơ̆ng hơiă bơih dăh mă ưh, tam mă kĕ sơng bơngai tơmât jên jang truh ưh? Khul jang lơ păng đei lơ anih ‘lơ̆ng, mă lei vă pơm sư jing tơmam chă tơmang lăng ‘nŏh athei tơmât jên hơmet mă ‘lơ̆ng hlŏh dơ̆ng, rơih đei tơdrong yơ kăl. Tơring yơ hiôk hian, đei tơdrong ‘lơ̆ng gơ̆h jang tŏk ‘nŏh tơmât jên jang hơdrol, kiơ̆ trong đei tơlĕch, thoi nŏh tơmoi gơ̆h băt truh, kon pơlei gơ̆h đei iŏk yoa".

Tơ̆ Hop akŏm, yă Nguyễn Thị Thanh Lịch- Phŏ Kơdră vei lăng kon pơlei dêh char Gia Lai athei dôm tơring, anih jang kơpal, hơnơ̆ng tơlĕch dôm tơdrong tơmât jên jang man anih jang, pơm trong vă pơih trong ăn tơdrong jang tŏk tơdrong chă tơmang lăng; hơlen năng dôm tơmam pơyoa ăn chă tơmang lăng vă gơ̆h jang tŏk trŏ tơdrong; bơ̆ jang hơdai, tơguăt trong chă tơmang lăng; dôm tơring păng anih jŏh ayŏ kơ dŏ xoang hơnơ̆ng tơlĕch dôm tơdrong jŏh ayŏ kơ dŏ xoang, pơgơ̆r năr pơchơt, hơtŏk tơdrong roi tơbăt păng pơjing tơdrong ‘lơ̆ng vă hơnhăk tơmam đơ̆ng choh jang xa đei kơ kon pơlei truh hăm tơmoi chă tơmang lăng.

Yă Nguyễn Thị Thanh Lịch hơnơ̆ng tơtă, athei tơrĕk truh tơdrong atŏk tơiung chă tơmang lăng kiơ̆ trong gpơ̆h hơgei, kơjăp đunh: “Pơjao ăn Anih jŏh ayŏ kơ dŏ xoang, tơplŏng kơdâu păng chă tơmang lăng pơtho ăn tơƀôh găh tơdrong jang chă tơmang lăng lơ̆m tơpôl. Mưh pơgơ̆r đei tơdrong chă tơmang lăng lơ̆m tơpôl, tơmât hơdai hăm chă tơmang lăng găh choh jang xa, thoi nŏh vă gơ̆h kơjăp đunh. Đei tơdrong vang jang đơ̆ng tơpôl, kiơ̆ đơ̆ng noh chĕp vei kơjăp tơdrong jŏh ayŏ kơ dŏ xoang. Yoa hơnhăk dơ̆ng tơdrong jang xa ăn kon pơlei kơna kon pơlei hưch hanh păng vei lăng kơjăp ‘lơ̆ng.”.