'Nâu jing tơdrong akŏm đei pơkăp lơ̆m Lêh akŏm Hmach kơ Việt Nam sơnăm 2023 đơ̆ng Anih jang tang măt ăn teh đak Ấn Độ tơ̆ pơlei tơm Hồ Chí Minh, akŏm joh ayŏ đơ̆ng Ấn Độ hăm dêh char Đăk Lăk. Lơ̆m tơdrong akŏm, bơngai lăng đei mơ̆ng lăng dôm tơdrong joh asuang kăp gĭt ƀenh kơ um ai joh ayŏ juăt jue Ấn Độ kơyuơ khul asuang Kuchipudi đei 6 ngê̆ sih gơh hơgei kơ Ấn Độ pơdah.

Tơdrong pơdah pơtơm hăm minh ƀar khôi juăt tơ̆ chơnang, đơ̆ng rŏng kơ noh bơngai pơma ah chơnang pơdah păng tơroi kơ po ham tơdrong kăl kơ pơđĭ ƀai hơri păng hơsuang vă tơroi gah đon bơnôh kơ tông asuang. Rim tơdrong pơdah jing minh tơdrong tơroi hơ-'nguơ̆u kơ yang lơ̆m đon lui tơdrong khop kơ  Ấn Độ nhen: Yang kơ̆l rôih Ghanesha, yang Shiva, yang Rama, yang Vishmu, yang Krishna. Hăm dôm tơdra 'lơ̆ng hiôk, tơdra hơsuang hơbĕch, dôm tơdrong pơdah pơm ăn bơngai lăng hlôh vao hơdah hloh gah joh ayŏ kăp gĭt kơ teh đak Ấn Độ. Ƀok Mahash Giri, Kơdră anih jang tang măt ăn teh đak Ấn Độ tơ̆ pơlei tơm Hồ Chí Minh ăn tơbăt: “Nhôn 'meh vă pơih să ưh hơdrô̆ tơdrong tơbôl 2 pah mă oei tơbôl hloi gah tĕch pơdro păng joh ayŏ, tơdrong mă âu kăp gĭt hloh. Noh jing tơdrong mă nhôn năm truh tơ̆ âu păng gô pơtoi kơ dôm tơdrong jang âu. Tơdrong mă âu pơjing dôm tơdrong jang tơbôl tơ̆ dêh char lơ̆m tơdrong tơbôl kơ bơ̆n, hăp gô tơgŭm tơdrong tơbôl 2 păh tơguăt hloh.  Ấn Độ păng Việt Nam đei tơdrong jang tơbôl tơguăt tơjê̆, kơyuơ noh nhôn 'meh hơtŏk tơdrong jang tơbôl âu”.