Pơma đam hơvơn lơ bơngai jang gah joh ayŏ, bơngai pơtho, kang ƀô̆ linh păng sinh viên truh akŏm, atŭm pơma đam gah kơjă kăp gĭt kơ tak phâm chih gah Ƀok Kơdră Hồ Chí Minh păng sơnong kăp gĭt kơ tơdrong đŏk lăng lơ̆m tơdrong hơtŏk đon bơnôh, tơdrong hŏk hơlen ăn đe sơnăm mơlôh hrei ou. Lơ nơ̆r tơgop akhan, lơ̆m chăl kơmăi kơsô̆, tơdrong đŏk lăng gah Ƀok ưh hơdrô̆ tơgŭm ăn đe sơnăm mơlôh hlôh vao hơdah hloh gah jơhnơr hơrih kon pơlei pơla mă oei tơgop pơjing đon bơnôh 'lơ̆ng, trong hơrih păng sơnong jang tơnăp hăm tơpôl. Kiơ̆ Thạc sĩ Nguyễn Thị Phương, pơtho tơ̆ Hnam trưng Đại học Luật Hà Nội tơ̆ Đăk Lăk 'noh, tơdrong đŏk lăng dôm tak phâm chih kơ Ƀok hrei ou ưh hơdrô̆ kiơ̆ hla bar săch mă oei hăm lơ trong phara băl trŏ hăm đe sơnăm mơlôh: “Tơdrong đŏk lăng noh 'lơ̆ng bơih. Mă lei dang ei ưh kơ kăl chă răt săch ou to vă chă đŏk lăng mă gơh chă mơ̆ng săch pơre nơ̆r, pơtih nhen VOV Live, lăng phim pơdah gah tơdrong hơrih. 'Noh adoi jing trong 'lơ̆ng vă akŏm tơdrong hlôh vao”.

Tơ̆ jơ pơma đam, bơngai jang joh ayŏ, bơngai hơlen chih akŏm joh ayŏ Linh Nga Niê Kđăm tơroi gah lơ tơdrong hơ-iă lơ̆m dôm 'măng đei tơƀơ̆p Ƀok Hô, kiơ̆ đơ̆ng noh tơbang hơdah um ai kơ minh ƀok kơdră dơnưp 'lơ̆ng păng hơnơ̆ng akŏm đon 'mêm kơ-eng kăp gĭt ăn kon pơlei, đe hơ-ioh. Yă adoi tơbang hơdah gah đon tơchĕng po hăm dôm tak phâm văn hŏk chih kơ Ƀok adoi oei đei jơhngơ̆m pran pơlan să truh hăm đe sơnăm mơlôh hrei ou: “Inh hơpơi 'meh, dôm tơdrong tơroi 'năr ou ưh hơdrô̆ tơƀlŏk um rup Ƀok Kơdră Hồ Chí Minh, bơngai gơh hơgei lơ̆m nơ̆r pơma oei xa kơ apŭng plenh teh, mă oei pơlan să tơdrong 'lơ̆ng ăn đe sơnăm mơlôh chă đŏk lăng dôm kơsơ̆p săch chih kơ Ƀok Hô, vă gơh sơkơ̆t hơdah trong yak ăn tơdrong hơrih păng trong jang hơtŏk tơ-iung ăn kơdih po”

Atŭm hăm pơma đam, tơdrong akŏm oei đei hơri brông, hơri kră sơ̆ păng chă akŏm hơlen băt gah tơdrong hơrih, tơdrong jang kơ Ƀok Kơdră Hồ Chí Minh, hơvơn lơ sinh viên vang truh akŏm. Oh Quản Phạm Anh Thương ăn tơbăt, tơdrong akŏm ăn sinh viên băt hơdah hloh gah tơdrong hơrih, tơdrong jang kăch mang đơ̆ng Ƀok Hô adoi nhen tơdrong kăp gĭt kơ đŏk lăng săch lơ̆m hŏk pơhrăm păng pơhrăm dơh po: “ ‘Măng pơma đam 'noh kăp gĭt tơpă. Nhôn đei hŏk hơlen tơnăp hloh hăm dôm kơsơ̆p săch chih kơ Ƀok Kơdră Hồ Chí Minh, đei tơƀơ̆p dôm bơngai chih văn, chih pơđơ̆k păng dôm bơngai đŏk lăng hăm dôm đon tơchĕng phara băl gah kơsơ̆p săch hơ-‘ngươ̆u kơ Ƀok, gơh hlôh vao hơdah hloh gah tơdrong hơrih, tơdrong pơm jang kơ Ƀok”.

Kiơ̆ bơngai chih văn Niê Thanh Mai, Kơdră Jơnŭm Văn hŏk ngê̆ thuơ̆t dêh char Đăk Lăk, tơdrong pơlan să dôm tak phâm văn hŏk, tơdra hơri hơ-‘ngươ̆u kơ Ƀok gô pơtoi đei pơm jang hăm lơ trong vă hơ-‘nhăk đon tơchĕng, trong jang ‘lơ̆ng Hồ Chí Minh truh tơjê̆ hloh hăm rim bơngai: “Atŭm hăm dôm tơdrong jang kăp gĭt 'noh, nhôn adoi hyup nơ̆r dôm ƀai pơđơ̆k, dôm tơdrong hơri hơ-‘ngươ̆u kơ Ƀok păng nhôn adoi pơtruh ăn rim hơnih jang, lơ̆m noh đei tơring oei xa, păng nhôn adoi pơm jang hăm dôm hơnih phak kron pơnă vă gơh pơtruh dôm tak phâm kiơ̆ trong tơroi tơbăt truh hăm rim bơngai”.

Pơma đam ưh hơdrô̆ tơgop hơtŏk đon bơnôh ‘mêm băt hăm Ƀok Kơdră Hồ Chí Minh mă oei pơlan să tơdrong đŏk hơlen lơ̆m tơpôl, mă kăl noh hăm đe sơnăm mơlôh. Kiơ̆ đơ̆ng kơsơ̆p săch, tơdrong tơroi kăp gĭt gah Ƀok, tơdrong tơroi hlôi hơtŏk ăn rim bơngai lăp đŏk lăng nhen minh trong hŏk pơhrăm, rong ‘me tơdrong hơpơi ‘meh hơrih ‘lơ̆ng, hơrih pơyua.