Tơ̆ jơ pơm lêh, dôm bơngai tang măt chă pơđou dơ̆ng tơdrong juăt ‘lơ̆ng hơiă lơ̆m khei ‘năr pơjing păng jang tŏk dêh char Đắk Lắk, kŭp kơ̆l pơyơ̆t pơkao, sŏh plang nhang tơƀôh jơhngâm đon ‘mêm bơnê kơ đe linh cộng sản, dôm bơngai pơnă chinh trĭ tơ̆ Hnam phak Buôn Ma Thuột, rim jơhnơr chĕp kơ̆l, kăn ƀô̆, linh păng kon pơlei dôm hơdrĕch hơdrung tơ̆ Đắk Lắk ưh hli tơdrong gleh hrat, pơmat tat, chu lôch tang hơkâu vă pơjing păng atŏk tơiung dêh char Đắk Lắk.

Ƀok Lại Đức Đại, Phŏ Kơdră Anih vei lăng jŏh ayŏ kơ dŏ xoang, tơplŏng kơdâu păng chă tơmang lăng Đắk Lắk ăn tơbăt, lêh sŏh plang nhang jĭ tơdrong jang đei pơgơ̆r hơnơ̆ng rim sơnăm tơ̆ Anih gru groa gĭt kăl Hnam phak Buôn Ma Thuột. Sơnăm ‘nâu, tơdrong jang roi gĭt kăl hlŏh dơ̆ng mưh pơgơ̆r ƀlep ƀât tơbăt 120 sơnăm Năr pơjing dêh char, 84 sơnăm Năr pơjing Đảng ƀô̆ păng năm truh tơdrong chơt hơiă kơ dôm năr lêh tih kơ teh đak.