Tơ̆ tơring Thanh Yên, pơm lêh khăm bản – pơm lêh kơsăi đak kơ kon pơlei hơdrung Lào ‘nao đei pơgơ̆r ưh khan lăp tơdrong pơgơ̆r kơ̆m kang kơnang giĕng blŭng sơnăm, mă tŏk bŏk đei pơgơ̆r kiơ̆ trong trŏ lăp hloh, tơklep kơjăp hăm tơƀôh tơbăt tơmang pơhiơ̆. Pơm lêh tơƀôh hơdăh hloh dơ̆ng rim tơdrong pơgơ̆r joăt joe sơ̆ ki nhen hơvơh hơvơi hơpơi ăn pran jăng grăng akou, chô̆ brai pơlang tơ̆ kơkŏng, soi tơbeh yang kông yang đak…dôm tơdrong tơƀôh hơdăh tơdrong hơrih sa lui kơyang kơ kon pơlei pơla. Mŏ Nguyễn Thị Nguyệt, kon pơlei oei lơ̆m phương Điện Biên Phủ, dêh char Điện Biên tơbăt:“‘Măng mă blŭng băt păng vang năm pơgơ̆r kơsăi đak tơ̆ Thanh Yên, trong yak tơnap tap biơ̆ păng jei hơtăih ƀiơ̆ mă lei mưh truh ‘noh tôch hơ iă kơ yuơ tơ̆ ou tôch kơ chơt păng kiơ̆ kơ ba tơdăh pơm lêh ou đei pơgơ̆r lơ ‘măng hloh dơ̆ng lei kon pơlei đei hơnih pơchơt ngôi vă vei răk dôm tơdrong oei sa joăt joe sơ̆ ki kơ bơngai Lào”.

Ƀok Trần Thế Hoàn, Kơ iĕng Kơdră chĕp pơgơ̆r Hơnih vei lăng kon pơlei tơring Thanh Yên, dêh char Điện Biên tơbăt, đơ̆ng tơdrong hơpơi ‘meh vă kơ kon pơlei lơ̆m vei răk tơƀăk mong tơdrong oei sa joăt joe ‘lơ̆ng rŏ sơ̆ ki păng tơdrong ‘meh vă chă tơmang lăng đơ̆ng tơmoi, kơdră chĕp pơgơ̆r tơring Thanh Yên tŏk bŏk vă hơnhăk tơdrong pơm lêh ou đei jing tơmam pơgơ̆r ăn tơmang pơhiơ̆ joh ayŏ kơdŏ soang kơ̆m kang kơnang giĕng kăl, tơklep hăm trong vei răk tơƀăk mong tơdrong oei sa joăt joe sơ̆ ki tơ̆ tơring. “Hơnih vei lăng kon pơlei tơring tŏk bŏk đei trong proh hơmet vei răk tơƀăk mong păng atŏk tơ iung dôm tơdrong kăp gĭt kơ pơm lêh ou vă đei jing tơdrong joăt gĭt kăl păng mŭk drăm joh ayŏ tơm dơnơm kơ tơring. ‘Nou đei sơkơ̆t hơdăh jĭ tơdrong jang tơm lơ̆m proh hơmet vei răk rim tơdrong oei sa joăt joe ‘lơ̆ng rŏ sơ̆ ki lơ̆m tơring lơ̆m khei năr kơnh".

Phương Mường Lay jĭ bro akŏm tơdrong oei sa joăt joe kơ bơngai Thái Trắng tơ̆ jih đak kroong Đà giang, trong jang tơmang pơhiơ̆ pơlei pơla tơƀôh hơdăh jơnei tôch kơ dêh. Dôm pơbŭng hnam pơtăm joăt joe sơ̆ ki ưh khan lăp hơnih oei sa, mă oei jing hơnih pơdơ̆h pơdei; tơdrong sŏng sa kơ ŭnh hnam đei jing tơdrong chă sŏng hơla sa pơchơt kơ tơmoi; dôm tơdrong hơsoang xòe, tơdrong joet joe sơ̆ ki hlôi jing tơmam pơvih pơvăn ăn tơmoi. Mŏ Lò Huyền Giang, kon pơlei oei lơ̆m pơlei Luông 1, phương Mường Lay, dêh char Điện Biên tơroi tơbăt, tơdrong vang iung jang hloi đơ̆ng kon pơlei lơ̆m tơdrong pơgơ̆r tơmang pơhiơ̆ hlôi pơjing đei tơdrong jang sa iŏk yoa kơjăp, sơđơ̆ng.“Mưh vang jang lơ̆m tơmang pơhiơ̆ pơlei pơla, ba hăm ŭnh hnam hlôi iŏk đei sơđơ̆ng đơ̆ng dôm tơdrong jang pơvih  pơvăn nhen: sơng tơmoi, pai por ‘nhot păng tơƀôh tơbăt dôm tơmam drăm kơ tơring. ‘Ngoăih kơ ‘noh, kơdih ba oei hŏk pơhrăm đei lơ tơdrong hơ iă lơ̆m chă pơma dơnuh, pơvih pơvăn păng sơng tơmoi. Đơ̆ng ou tơgŭm kơ ba chhôk hơ iă ‘nă hal mưh tơgop tŏ sĕt lơ̆m vei răk, tơƀôh tơbăt dôm tơdrong oei sa joăt joe sơ̆ ki kơ hơdrĕch hơdrung bơ̆n ăn bôl boăl lơ̆m teh đak păng teh đak đe”.

‘Nhŏng Lường Văn Muôn, Kơdră chĕp pơgơ̆r pơlei Tơmang pơhiơ̆ pơlei pơla Phiêng Lơi, phương Điện Biên Phủ, dêh char Điện Biên tơbăt: Dôm ‘nhĕm ‘nhot joăt joe kơ bơngai Thái, mă kăl dôm ‘nhĕm phang tŏk bŏk đei kon pơlei lơ̆m pơlei vei răk pơjing đei ‘nhĕm ‘nhot ‘lơ̆ng hơ iă đơ̆ng chă phang truh chă proh hơmet, tơgop pơm hơtŏk ‘lơ̆ng tơdrong jang pơvih pơvăn, pơdui đunh jơ ‘năr pơdơh pơdei păng oei sa kơ tơmoi tơmang pơhiơ̆.“Hăm ‘nhĕm ‘nhot kơ pơlei ‘noh nhôn hlôi păng tŏk bŏk iung jang tôch hơ iă găh ‘nhĕm ‘nhot joet joe kơ bơngai Thái. Mă kăl găh ‘nhĕm phang vă pơvih pơvăn ăn tơmoi. Găh lơ tơmoi mưh năm truh tơ̆ ou jei hôn bơnê, lŭ lăp ngăl”.

Mĭnh lơ̆m dôm tơdrong tơplih kăl hloh lơ̆m trong jang tơmang pơhiơ̆ hrei ou kơ dêh char Điện Biên ‘noh tơplih dôm tơdrong pơgơ̆r joh ayo kơdŏ soang ou to đơ̆ng hơnih tơm ăn rim pơlei pơla. Kơ yuơ tơ̆ ou jing hơnih vei răk tôm tong păng tơpă hloh dôm tơdrong oei sa joăt joe sơ̆ ki kơ kon pơlei, adoi pơjing rơvơn vă kon pơlei đei vang jang hloi lơ̆m tơdrong jang tơmang pơhiơ̆. Kiơ̆ đơ̆ng ƀok Trần Hải Hà, Kơdră Hơnih vei lăng Joh ayŏ kơdŏ soang, Đă ƀŏng lŏng tơplŏng kơdou păng Tơmang pơhiơ̆ dêh char Điện Biên, trong pơgơ̆r ou ưh khan lăp tơgŭm pơjing đei lơ hơnih tơmang pơhiơ̆ ăn tơmoi, mă oei pơjing đei tơdrong tơgoăt kơjăp ƀar păh vei răk păng atŏk tơ iung mưh kon pơlei đei jing dôm bơngai tơ-‘ngla vei răk hloi, adoi atŏk kơtang jang sa iŏk đei hloi đơ̆ng tơdrong oei sa joăt joe ou.“Lơ̆m tơdrong pơgơ̆r joh ayŏ kơdŏ soang ou to, nhôn gô pơgơ̆r lơ hloh dơ̆ng tơ̆ rim pơlei tơmang pơhiơ̆ pơlei pơla, pơlei oei sa ‘lơ̆ng vă pơjing rơvơn ăn rim pơlei tơmang pơhiơ̆ pơlei pơla, pơlei oei sa ‘lơ̆ng, rim ŭnh hnam HomeStay đei rơvơn pơvih pơvăn, tơƀôh tơbăt tơmang pơhiơ̆ păng atŏk tơ iung tơmang pơhiơ̆ tơ̆ pơlei kơdih bơ̆n. Mưh tơmoi truh tơ̆ ou, đe sư đei rơvơn chă tơmang lăng găh tơdrong oei sa joăt joe sơ̆ ki, đei sŏng sa ‘nhĕm ‘nhot kon pơlei, pơm hơtŏk ‘lơ̆ng tơdrong tơmang pơhiơ̆ păng tơdrong lăp đon kơ tơmoi”.

Dôm tơdrong tơplih ƀôh hơdăh hloh kơ tơmang pơhiơ̆ Điện Biên đei ƀôh đơ̆ng dôm khei bŭng sơnăm 2026, tơring sơng đei dang 550.000 ‘nu tơmoi, tŏk vă jê̆ 30% pơtêng hăm dôm khei ou sơnăm hơdrol. 72 sơnăm Jơnei rơngei Điện Biên Phủ, jơhngơ̆m ranh chăl sơnăm nuih mơng sơ̆ oei ling lang lang să, đei jing hơnih gơnang kơjăp jơhngơ̆m đon vă Điện Biên hrei ou atŏk tơ iung kơtang. Mưh dôm tơdrong oei sa joăt joe ‘lơ̆ng rŏ sơ̆ ki đei atŏk tơ iung, vei răk păng pơjing đei jing tơman tơmang pơhiơ̆ gĭt kăl, groi teh hlôi đei ‘măng jĭ kơdrăn tơblăh hli hlơt hơmơt kơtang sơ̆ tŏk bŏk roi tơƀôh hơdăh hơnih dơ̆ng ‘noh hơnih truh ‘lơ̆ng rŏ hơbŏ nhen hloh.