Chih iŏk tơ̆ hơnih đak dơsĭ Quy Nhơn, dôm năr âu, tơmoi truh chă tơmang lăng tôch kơ lơ. Tơ̆ hơnih hum ngôi, ‘nhŏng Hồ Văn Thắng, bơngai jang dŏng tơgŭm hnam hôtel Hải Âu, ling lang kơchăng, ti chĕp tơmam đông dŏng hơrih, măt răp hơlen kiơ̆ rim đak poh yă. Hăm ‘nhŏng, tơdrong jang âu ưh kơ gơh pơm pơ hơi, yua kơ sar bar gô đei ƀôh lai yơ ưh kơ tom băt.

“Ĭnh ‘noh bơngai jang dŏng tơgŭm, tơmoi humngôi  păih jih đak dơsĭ hơnih păih ĭnh ‘noh kŭm athei chă lơ lăng, athei chă lơ lăng tơmoi hum lơ liơ vă mưh chă đei tơdrong đei ƀôh athei jur tơgŭm tơmoi tơtom, kơ̆p kư̆u tơtom”.

Ưh khan lăp tơ̆ Quy Nhơn, tơ̆ Hơnih chă tơmang lăng Kỳ Co, tơmoi kŭm tŏk lơ, jô̆ hloi lơ̆m ‘năr tŏ hlơ hlĕng tŏk bŏk ‘năr dơ̆ng. Khŭl lĭnh dŏng tơgŭm đei hơmet lơ hloh, cano ling lang hơmet ăn kơdâu. Tơmoi chă tơmang lăng đei tơtă ‘nĕ kơ glơi lĕch tơ̆ ‘ngoăih hơnih gơh ăn hum ngôi. ‘Nhŏng Lê Thanh Hùng Anh, bơngai jang dŏng tơgŭm tơ̆ âu tơbăt, ƀơ̆t kơsô̆ tơmoi sa roi lơ, tơdrong jang sa roi kơhret tih, athei tơdrong akŏm chă lơ lăng mă brĕ.

“Hum ngôi đak dơsĭ tơ̆ Kỳ Co hơgăt dôm hơnih đei tơmam đông ‘noh gô sơđơ̆ng, đe hơioh ‘noh hum jê̆ kông, tơdăh hum hơtăih ‘noh hlôm tơgiĕp roi tơbăt glơi tŏk jê̆ kông. Tơdăh bơngai ‘lŏ hum tơ̆ hơnih đak lơ̆p kơ kơ̆l đei đak poh yă dêh ‘noh kŭm hlôm tơ giĕp roi tơbăt ăn tơmoi hum tŏk jê̆ kông. Mưh kăl gô yua mô tô đak kŭm hăm rơjeo vă roi tơbăt vă rim bơngai vang tơgŭm”.

Tơdrong đei măt hơnơ̆ng đơ̆ng khŭl lĭnh dŏng tơgŭm, kŭm hăm tơmam đông hlôi pơm sơđơ̆ng jơhngơ̆m ăn tơmoi. ‘Nhŏng Nguyễn Hoàng Anh, tơmoi chă tơmang lăng đơ̆ng Hà Nội, lăng ‘lơ̆ng tơdrong jang vei sơđơ̆ng tơ̆ âu.

“Ĭnh ƀôh tôch kơ ‘lơ̆ng, jang hơdai, lơ hơnih ưh kơ đei khŭl dŏng tơgŭm nhen thoi ‘nâu, tơ̆ âu đei khŭl dŏng tơgŭm păng tơmam đông tơ̆ đak dơsĭ kơna ĭnh ƀôh tôch kơ sơđơ̆ng mưh năm glơi”.

Kiơ̆ chih iŏk, dôm hơnih chă tơmang lăng đak dơsĭ nhen Quy Nhơn, Kỳ Co, Eo Gió, Nhơn Lý dăh Bãi Xép tŏk bŏk sơng đei lơ lap kon pơlei păng tơmoi chă tơmang lăng. Mă lei, hơmơt glơ̆k kơ đak oei đei ƀôh mưh 1,2 ‘nu bơngai oei pơm pơhơi, glơi hum tơ̆ ‘ngoăih hơnih sơđơ̆ng dăh mă mơ̆t lơ̆m hơnih đei đak poh yă hơtăih kơ kông. Tơ̆ hơnăp yan âu ‘nâu, khŭl kơdră tơring hlôi jang hơdai hăm rim khŭl lĭnh kơpal hơtŏk loi dơ̆ng roi tơbăt, pơtho tơtă păng hơmet ăn khŭl lĭnh bơ̆jang tơ̆ lơ hơnih.

Ƀok Phan Tấn Hoàng, Phŏ Kơdră Anih vei lăng kon pơlei phường Quy Nhơn tơbăt, tơring hlôi hơmet tôm khŭl lĭnh dŏng tơgŭm hăm tôm tĕch tơmam, pơgơ̆r bơ̆jang kiơ̆ jơ trŏ lăp, hơdai hăm hơnơ̆ng hơtŏk ‘lơ̆ng tơdrong jang dăr lăng.

“Mă khan đei khŭl dŏng tơgŭm păng trong jang dŏng tơgŭm ră, mă lei oei ‘meh kon pơlei mưh hum tơ̆ đak dơsĭ athei hrŭk ao đông mưh glơi hơtăih vă vei sơđơ̆ng. ‘Ngoăih kơ phường kŭm tŏk bŏk pơma ơdnuh hăm anih jang pơtho tơƀôh dăr hơlen vă tơlĕch jang tơdrong jang camera vei lăng sơđơ̆ng hơdai hăm tang găn glơ̆k kơ đak. Mưh chă ƀôh hrôih krê hơmơt hăm dôm tơmoi truh hăm Quy Nhơn ‘noh kơmăy roi tơbăt gô roi tơbăt hloi vă đei trong jang tơtom.”

Tơ̆ dêh char, tơdrong jang vei lăng sơđơ̆ng ăn tơmoi chă tơmang lăng kŭm đei pơgơ̆r kơtang. Kơdră Anih vei lăng kon pơlei dêh char Gia Lai athei dôm anih jang, tơring hơtŏk loi dơ̆ng hơlen lăng, dăr lăng dôm tơdrong jang ngôi pơchơt tơ̆ hơla đak. Ƀok Bùi Trung Hiếu, Phŏ Kơdră Anih vei lăng găh Joh ayŏ, Tơplŏng kơdâu păng Chă tơmang lăng dêh char Gia Lai tơbăt, tơdrong pơjing trong jang tơ jră hrĕnh, kŭm hăm dăr joang, vei lăng kơhret gô jing trong jang tơm lơ̆m pơyan chă tơmang lăng tơm.

“Kơdră Anih vei lăng dêh char Gia Lai hlôi đei athei bơngơ̆t truh tơdrong sơđơ̆ng ăn tơmoi truh chă năm tơmang lăng tơ̆ tơring, Anih vei lăng găh Joh ayŏ, Tơplŏng kơdâu păng Chă tơmang lăng hlôi jang hơdai hăm dôm anih jang, dôm tơring hơlen lăng rim tơmam vei sơđơ̆ng ăn tơmoi mưh hum ngôi tơ̆ đak dơsĭ, pơm liơ vă pơyan he sơnăm ‘nâu tơmoi chă tơmang lăng truh hăm tơring đak dơsĭ kơ Gia Lai vei sơđơ̆ng hiôk mưh ngôi pơchơt”.

Tơpă yan âu ăn ƀôh, hơdai hăm tơdrong hơdrin đơ̆ng khŭl lĭnh kơpal, đon hlôh vao đơ̆ng rim kon pơlei păng tơmoi chă tơmang lăng oei jing tơdrong tơchơ̆t. Tơdrong pơm kiơ̆ dôm nơ̆r pơtho tơtă, ưh kơ glơi lĕch tơ̆ ‘ngoăih hơnih sơđơ̆ng, kơchăng hrŭk ao đông mưh kăl gô tơgop pơm dă ƀiơ̆ dôm tơdrong sar bar ơh sơ ‘ngon, vă rim tơdrong chă năm truh hăm đak dơsĭ ling lang jing dôm ‘măng chă năm lăng ‘lơ̆ng păng sơđơ̆ng hiôk.