Tơ̆ lơ pơlei pơla lơ̆m dêh char Lâm Đồng, chĭng chêng hơnơ̆ng re jơva lơ̆m dôm năr et sa kơ tơpôl; hơbăn ao tanh đei pơtrŭt hrŭk hơnơ̆ng rim năr; dôm boa hơri brông, tanh brai vai khăn, tanh sĭt bơ̆n kơđum kơđŏng, reo hơkăt dăh mă tơdrong et soi kơ tơdrong hơrih oei đei rim jơhnơr chĕp vei păng pơtho ăn kon kơ kon sâu. Joh ayŏ kơ dôm hơdrĕch kon kông: K’ho, Mạ, Chu Ru, M’Nông, Chăm… tơ̆ dêh char Lâm Đồng ưh kơ oei dơnơ̆ng lơ̆m đon tơchĕng ƀlŏk, mă đei ƀôh lơ̆m rim ‘măng sŏng sa, mir roh, lơ̆m trong pơma sa hăm tơpôl. Ngê̆ nhơ̆n  Ka Duýp, xăh Đinh Trang Thượng, tơbăt:

“Jĭ bơngai K’ho, ĭnh ƀôh dang ei tơdăh ưh kơ đei chĕp vei tơdỏng joh ayŏ kon kông ‘noh đơ̆ng rŏng âu gô sa roi hiơt hiong. Lăng ƀôh hơnăp jang ‘noh, tơ̆ Đinh Trang Thượng, ĭnh vei lăng 1 Kâu lak ƀô̆ tôn chĭng chêng hŏk tro. Đơ̆ng dôm tơdrong jang iĕ đơ̆ng đe buăl hŏk tro, kŭm nhen 1 pla ŭnh vă đe oh hlôh đei kơjă kăp gĭt joh ayŏ, băt chĕp răk păng tơƀăk mong. Hơdai hăm ‘noh, tơ̆ Đinh Trang Thượng oei đei tôch kơ lơ kâu lak ƀô̆ nai, păng tơdrong tơm ‘noh jĭ vă chĕp vei tơdrong ‘lơ̆ng hơiă joh ayŏ joăt joe kơ bơngai K’ho”.

‘Nhŏng Kră Jăn K’Druynhs - mĭnh ‘nu ngê̆ si mơlôh bơngai K’Ho tơ̆ phường Langbiang – Đà Lạt tơbăt, sư kŭm hăm dang 20 ‘nu bơngai ‘noh jĭ đe tơdăm, hơdruh tơ̆ jơ̆ng kông Lang Biang dang ei tŏk bŏk vang tôn reh, hơri hơsoang tơ̆ hơnih chă tơmang lăng Langbiang Land. Tơ̆ dôm tơdra chĭng, tơdra hơsoang kră sơ̆, grŭp kŭm tơmơ̆t hơdai dơ̆ng 1,2 tơdrong hơiă ‘nao vă hơnhăk ăn tơdrong đei ƀôh tơ jê̆, hiôk hloh ăn tơmoi chă tơmang lăng mă lei đei jơhngơ̆m đon joh ayŏ kon kông. Dôm bơngai jang lơ̆m khŭl đei kĭ hla ar pơkăp bơ̆jang hơnơ̆ng tơ̆ hơnih chă tơmang lăng hăm 3 ‘măng tôn chĭng chêng, hơsoang rim năr, gơnang đơ̆ng noh đei iŏk yua sơđơ̆ng hloh.

Kră pơlei K’Keo, tơ̆ plei Hàng Làng, xăh Di Linh, dêh char Lâm Đồng ăn tơbăt, dôm sơnăm âu ki, Đảng păng teh đak hơnơ̆ng tơgŭm ăn kon pơlei tơiung ming dơ̆ng dôm tơdrong joăt, jŏh ayŏ kơ dŏ soang ‘lơng hơiă đơ̆ng sơ̆. Ưh khan lăp tơ̆ pơlei pơla, chĭng chêng oei hơnhăk pơtho tơ̆ dôm hnam trưng, păng pơtơ̆p tơ̆ lơ câu lạc bộ jŏh ayŏ kơ dŏ soang. Gơnang đơ̆ng noh, roi đunh roi đei lơ druh dăm vang hŏk tôn chĭng. Kiơ̆ kră pơlei K’Keo, tơdrong pơgơ̆r soi, Et jur sa ƀa ‘nao ‘nŏh jĭ jơnăr tôch gĭt kăl vă kon sâu chĕp vei, tưk tơiung tơdrong joăt ‘lơ̆ng đơ̆ng sơ̆ kơ hơdrĕch hơdrung. 

 “Kơdih kâu inh jĭ kră pơlei, bơngai đei kon pơlei lui yom tơ̆ tơring kon kông kơna ‘mĕh tơiung dơ̆ng tơdrong juăt ‘nâu, vă chĕp vei ăn kôn mon kon sâu đơ̆ng rŏng ning mônh kơnh. Tơdăh đei tơdrong ‘lơ̆ng ‘nŏh athei pơjing, tơiung dơ̆ng dôm tơdrong joăt tôn chĭng chêng đơ̆ng kon pơlei bơ̆n, mơ̆t hơdai hăm tơpôl dôm hơdrech hơdrung ‘nhŏng oh nai”.

Đơ̆ng rŏng kơ tơmơ̆t hơdai dêh char Lâm Đồng, Đắk Nông păng Bình Thuận, dêh char Lâm Đồng ‘nao hlôi tơlĕch lơ trong jang vă chĕp vei kơjăp tơdrong joh ayŏ kơ dŏ soang, tưk tơiung sơ lơ̆m tơdrong hơrih sa. Dôm trong jang găh chă tơmang lăng lơ̆m tơpôl, pơgơ̆r tôn chĭng chêng, pơtho tơdrong jang so hơnơ̆ng đei pơlung tơlĕch jang tơ̆ tơring. Kon pơlei jing tơ ‘ngla chĕp vei dôm tơdrong juăt ‘lơ̆ng đơ̆ng sơ̆, vă vei kơjăp hai, vă chă đei tơdrong jang sa sơđơ̆ng ‘lơ̆ng đơ̆ng tơdrong joh ayŏ kơ dŏ soang hai. Mă tơpă ăn ƀôh tơdrong hơnhăk jŏh ayŏ kơ dŏ soang tơ̆ tơring tơmơ̆t lơ̆m tơdrong hơrih sa rim năr ưh lăp tơgop vei kơjăp dôm kơjă kăp gĭt đơ̆ng chăl yă ƀok sơ̆ 'măn ăn đĕch, mă oei tơƀôh hơdăh tơdrong joăt đei hơdrô̆ đơ̆ng Lâm Đồng lơ̆m khei 'năr mơ̆t jang hơdoi. 'Nâu jĭ tơdrong tôch gĭt kăl vă joh ayŏ kơ dŏ soang ‘lơ̆ng hơiă đơ̆ng kon pơlei tơ̆ tơring đei chĕp vei, hơrih sa hơdai păng păr ang jơ̆p jang truh ning mônh kơnh.