Kiơ̆ kơ ‘noh, dêh char Lâm Đồng xơkơ̆t hơdăh iung jang kơtang hơvơn tơmoi tơmang pơhiơ̆ yak trong teh, mă kăl tơmoi lơ̆m dêh char păng đơ̆ng dêh char tơjê̆; tĕnh koăng iung jang keh đang, tơmơ̆t iŏk yoa jơnei dôm tơmam tơmang pơhiơ̆ tơgoăt dih băl tơring kiơ̆ trong “Đà Lạt - Tà Đùng - Mũi Né”; pơjing rim jăl trong tơmang pơhiơ̆ kăl “Đak dơsĭ-Kông-Pơkao”, “Tơring tơmăn-Tơring groi kông-Cham groi teh gĭt kăl dăr sơnăm”; tơlĕch tơdrong jang pơtrŭt tơmang pơhiơ̆ kiơ̆ jơ ‘năr, đei vang jang hơdoi đơ̆ng rim hơnih mơdro sa, hơnih hnam tep pơdơ̆h, khul ba tơmoi, gre chơ tơmoi, hơnih tơm tơmang pơhiơ̆, rim hơnih pơvih pơvăn tơmang pơhiơ̆; atŏk kơtang bơ̆jang vei lăng lơ̆m tơdrong jang tơmang pơhiơ̆; pơgơ̆r pơm lêh tih păng atŏk kơtang pơtho pơjing khul bơ̆ jang hơgei găh tơmang pơhiơ̆, tơgoăt hăm tơdrong ‘meh vă đơ̆ng hơnih jang mơdro sa. Dêh char Lâm Đồng hơdrin lơ̆m sơnăm 2026 hơvơn đei hloh 25 triu ‘nu tơmoi tơmang pơhiơ̆, lơ̆m ou tơmoi teh đak đe đei 1 triu 500.000 ‘nu păng jang sa iŏk đei đơ̆ng tơmang pơhiơ̆ dang 71.500 ti hlak jên, tŏk 26% pơtêng hăm sơnăm 2025.