Đei pơgơ̆r đơ̆ng dang ei truh đĭ năr 31/12, pơdă tơƀôh tơbăt 2 tơdrong tơm ‘noh “Dôm tơdrong jơnei mŭk drăm-tơpôl kơ dêh char Dak Lăk đơ̆ng rŏng 120 sơnăm” păng “Thác Hai-Hơnih gĭt kăl dăr sơnăm lơ̆m thoong đak kroong Ea Hleo”. Lơ̆m ou, găh tơdrong dôm tơdrong jơnei mŭk drăm-tơpôl chă pơdă đei 200 hlak rup, hla bơar chih găh khei năr tơ iung pơjing păng atŏk tơ iung kơ dêh char Dak Lăk kiơ̆ rim chăl sơnăm, jăl trong 80 sơnăm tơ iung pơjing păng atŏk tơ iung khul ƀô̆ đô̆i dêh char Dak Lăk. ‘Nou jĭ dôm tơdrong tơƀôh hơdăh, tơbăt hơdăh khei ‘năr tơ iung pơjing dêh char Dak Lăk, đơ̆ng minh groi teh hmă, dơnuh hin hlôi hơdrin atŏk tơ iung kơtang, đei jing dêh char pơdrŏng lơ̆m tơring Tây Nguyên păng pơđĭ lơ̆m teh đak. Găh tơdrong pơdă grŭp mam koer tơmo Thác Hai, jĭ mŭk drăm teh đak mă blŭng kơ dêh char Dak Lăk đei drơ̆ng nơ̆r, sa roi sơkơ̆t hơdăh dôm tơdrong kăp gĭt kăl chăl sơnăm sot, tơdrong oei sa lơ̆m chăl sơnăm atŏk tơ iung kơ Dak Lăk.