Hăm hơnăn “Tơgoăt tơdrong oei sa joăt joe”, ‘măng pơdă tơƀôh tơbăt ăn kon pơlei 100 hlak rup đơ̆ng dôm bơngai phĭn rup ƀar teh đak Việt Nam păng Hàn Quốc. Lơ̆m ou, đei 60 hlak rup đơ̆ng rim bơngai phĭn rup Hàn Quốc tơƀôh tơbăt tơdrong ‘lơ̆ng liĕm cham char, oei sa joh ayŏ păng kon bơngai kơ groi teh tơring Kim Chi; 40 hlak rup đơ̆ng rim bơngai phĭn rup Việt Nam akŏm tơƀôh hơdăh dôm tơdrong ‘lơ̆ng rŏ, tơdrong hơrih sa, joh ayŏ păng tơdrong tơplih kơ tơring groi teh Dak Lăk pơma hơdrô̆, Tây Nguyên pơma atum.

Kiơ̆ đơ̆ng ƀok Hồ Sỹ Minh, Kơ iĕng Kơdră Khul Phĭn rup Việt nam, ‘măng pơdă jĭ tơdrong jang tôch gĭt kăl lơ̆m tơdrong pơgơ̆r tơƀơ̆p dih băl oei sa joh ayŏ ƀar păh khul phĭn rup ƀar teh đak, tơgop pơm hơtŏk loi dơ̆ng tơgoăt tơgoăl Jang hơdoi tôm tong Việt Nam – Hàn Quốc. ‘Măng pơdă ou tơbăt hơdăh jăl trong 5 sơnăm tơƀơ̆p dih băl Khul phin rup Việt Nam - Khul phĭn rup Hàn Quốc păng ji ‘măng pơdă mă 2 đei pơgơ̆r tơ̆ Việt Nam.“Dôm um rup găh Hàn Quốc tơƀôh hơdăh dôm tơdrong oei sa joăt joe kơ đe sư, adoi nhen dôm tơdrong pơm lêh, adoi đei dôm hơdrung păng dôm um rup găh teh đak bơ̆n. Kơna kiơ̆ kơ ĭnh ‘măng pơdă ou ‘noh mĭnh tơdrong tơƀơ̆p dih băl ‘lơ̆ng hơ iă hloh găh tơdrong oei sa joh ayŏ, găh tơmang pơhiơ̆ păng mă kăl ‘noh hlôh vao găh kon bơngai, găh groi teh ou. ‘Măng pơdă tơgop pơm ăn ƀar teh đak, ƀar hơdrĕch hơdrung tơjê̆ dih băl, tơklep dih băl păng hlôh vao dih băl lơ hloh dơ̆ng”.

Hơnih pơdă đei pơgơ̆r tơ̆ cham Hơnih mong răk mŭk drăm Dak Lăk, tơjê̆ Hnam pơtăm joăt joe kơ bơngai Êđê, pơjing đei tơdrong hơ iă hloh lơ̆m tơdrong oei sa ‘lơ̆ng rŏ ăn tơdrong pơgơ̆r chă tơƀơ̆p dih băl ou.

Lăp đơ̆ng rŏng pơgơ̆r blŭng a, rim bơngai phin rup Việt Nam păng Hàn Quốc gô vang năm rim ‘măng pơgơ̆r chă phĭn hloi, năm lăng tơdrong oei sa, hơrih sa păng tơdrong joh ayŏ joăt joe kơ kon pơlei rim hơdrung tơ̆ dêh char Dak Lăk.

Hơdrol kơ ‘noh, đơ̆ng năr 7/5, khul phĭn rup 2 teh đak hlôi đei jơ ‘năr năm chă phin rup, atum hăm tơmang pơhiơ̆ tơ̆ rim hơnih ‘lơ̆ng rŏ đe ư hơnhang ang hơnhăk tơ̆ mĭnh ƀar dêh char tơring Tơmăn Nam Trung Bộ. Ƀok Soun Byeong Hyo, Kơdră Khul phĭn rup teh đak Hàn Quốc, pơma tơbăt jơhgơ̆m đon hơ iă hăm groi teh păng kon bơngai tơ̆ Việt Nam pơma atŭm păng Dak Lăk pơma hơdrô̆.“Vang yak hơdoi hăm rim bơngai phĭn rup kơ Việt Nam lơ̆m dôm năr tơchăr phĭn rup ‘noh khul hlôi chă phĭn đei lơ rup ‘lơ̆ng păng mưh chĕp brŏk tơ̆ Hàn Quốc ‘noh gô tơƀôh tơbăt hloi ăn kon pơlei Hàn Quốc găh dôm rup, găh groi teh ‘lơ̆ng liĕm kơ Việt Nam, mă kăl ‘noh Dak Lăk păng Buôn Ma Thuột. Ĭnh năm tơ̆ Việt Nam hlôi lơ ‘măng bơih,lơ̆m ou đei Mù Cang Chải ‘noh jĭ tơring đei lơ rup ĭnh phĭn tôch ‘lơ̆ng hơ iă păng đơ̆ng rŏng ‘noh tơ̆ ou, tơ̆ Buôn Ma Thuột jei đei dôm rup ‘lơ̆ng liĕm mơ̆n. Ĭnh jei pơtruh pôk ăn dôm rup ou đơ̆ng rŏng rơih hơlen dôm rup đei phĭn lơ̆m ‘măng năm tơmang ‘măng mă ou”.