Tam mă tôm 2 năr năr Soi kơ Yang hơbang Yă sơnăm ‘nâu, đĭ đei 40 khŭl hăm hloh 2000 ‘nu bơngai vang năm soi tơ̆ Hơnih gru groa joh ayŏ gĭt kăl kơ teh đak Kơthôt Nhạn, phường Tuy Hòa, dêh char Đắk Lắk. Dôm khŭl tă kơ hơmet ăn tôch kơ hơlen, đơ̆ng tơmam soi pơyơ̆r kơ Yang Mĕ dơnơm, hơbăn ao hrŭk akŏm pơm soi păng ƀai hơsoang krao pơhngol vă pơyơ̆r ăn kơ Yă lơ̆m năr Ai yă hăm đĭ đăng tơdrong kŭp yom păng hơnhăk ba dôm tơdrong hơpơi ‘meh ‘lơ̆ng hơiă hloh. Dôm bơngai vang akŏm pơm soi tơchĕng thoi âu:

 “‘Meh ăn kơ kon pơlei sơđơ̆ng hiôk, vă kơ dêh char Đắk Lắk nơ̆n đei ‘mi rŏ tŏ hơlăng”.

Lơ̆m jơhngơ̆m đon tơchĕng đơ̆ng kon pơlei dôm dêh char Pơbăh tŏk tŏk,  Yă ai dơnơm ‘noh jĭ bơngai mĕ tơm, jing bơngai chă tơgŭm ăn kơ kon pơlei đei sơđơ̆ng, đei tơdrong hơrih sa phĭ tơnŏ, hiôk chơt. Yua thoi noh, soi Yang hơbang Yă hlôi mơ̆t jrŭ lơ̆m tơdrong hơrih sa jơhngơ̆m đon, jĭng 1 tơdrong lui kơyang Mĕ đơ̆ng kon pơlei tơring pơbăh tŏk bŏk. Găh tơdrong lui kơyang, tơ̆ âu roi đei tơdrong mơ̆t hơdai joh ayŏ đơ̆ng lui kơ yang drŏ kăn kơ bơngai Chăm hăm lui yang soi kơ Mĕ tơm kơ bơngai Việt.

Lơ̆m soi kơ Yang hơbang yă đei 2 tơdrong ‘noh tơdrong pơyơ̆r tơmam păng hơsoang krao pơngol vă pơm ăn yă Thiên Y ANa chơt hơiă păng tơƀôh ăn jơhngơ̆m tơpă đơ̆ng bơngai pơyơ̆r tơmam. Yă Thông Thị Thêu, bơngai Chăm truh đơ̆ng Bắc Bình, Lâm Đồng tơroi:

"Jơhngơ̆m đon lui gĭt kăl hloh. Rim sơnăm truh khei ‘nâu ‘noh chhôk ‘nă năm. Năm chhôk ‘nă ăn kơ Yă, apĭnh ‘meh ăn pran jăng grăng hơkâu, ŭnh hnam jang sa đei ƀôh. Ưh kơ năm jơhngơ̆m ưh kơ sơđơ̆ng jơhngơ̆m, mưh rim sơnăm tă kơ năm ngăl”.

Vă kơ lêh soi kơ Yang hơbang Yă sơnăm ou đei pơgơ̆r sơđơ̆ng 'lơ̆ng, Jơnŭm jang vei lăng hơnih gru gra dêh char Đăk Lăk hlôi rơih hơnih sơng akŏm vă sơng rim khŭl đơ̆ng 'Măng jang năm truh hơnih gru gra; asong hơnih 'măn tơmam soi plang, hơbăn ao; hơnih et sa, vei sơđơ̆ng ăn khŭl truh krao apinh gơh đei năr akŏm lêh sơđơ̆ng 'lơ̆ng hloh tơ̆ hơnih gru gra Kơthôt Nhạn. Atŭm hăm bơngai năm soi plang, kơ rơbou kon pơlei păng tơmoi adoi truh tơmang lăng păng hơlen băt gah tơdrong 'lơ̆ng joh ayŏ kră sơ̆ kăp gĭt ou. Ƀok Phạm Phú Thái, tơmoi đơ̆ng Đà Nẵng roi tơbăt:

"'Măng mă blŭng inh năm truh Phú Yên 'noh tơƀơ̆p lêh soi kơ Yă ai Dơnơm. 'Noh jing tơdrong joh ayŏ kăp gĭt hloh tơƀôh um ai joh ayŏ kơ bơngai Việt bơ̆n"

Kiơ̆ đơ̆ng bơngai jang chă tơchĕng hơlen tơdrong oei sa sơ̆ ki Nguyễn Danh Hạnh, tơdrong pơgơ̆r kơ̆m kang kơnang giĕng soi tơbeh kơ Mĕ hlôi đei UNESSCO tơchơ̆t jing tơdrong oei sa gĭt kăl dăr sơnăm kơ kon bơngai. Kơ̆m kang kơnang giĕng soi tơbeh Yang hơbang Yă tơklep kơjăp hăm tơdrong kơm kang kơnang giĕng soi tơbeh kơ Mĕ đei pơgơ̆r tơ̆ Hơnih gĭt kăl dăr sơnăm hơnih ‘lơ̆ng rŏ Teh đak Kơthôt Nhạn hlôi tơgop pơm pôk pơ ư hloh dơ̆ng ăn hơnih gru gra gĭt kăl dăr sơnăm ou.

"Soi kơ Yang hơbang Yă ‘noh jĭ tơdrong pơgơ̆r joăt joe đơ̆ng sơ̆, pơm tơdrong kơnăl vă kơ bơ̆n chă tơchĕng hơlen, pơm hơdăh găh tơdrong mơ̆t lĕch dih băl lơ̆m tơdrong oei sa ƀar păh hơdrĕch hơdrung ou hăm hơdrech hơdrung to, ƀar păh tơring tơrang ou hăm tơring tơrang anai sơ̆ ki. Tơdrong vei kơjăp tơdrong ‘nou ưh khan lăp pơm ăn hơnih gru gra gĭt kăl chăr sơnăm đei lơ tơdrong pơgơ̆r, mă oei pơm ăn hơnih gru gra gĭt kăl dăr sơnăm ou gei kơjăp hăm kon pơlei. Păng mưh hơnih ou đei lăng jing hơnih gĭt kăl hloh lơ̆m tơdrong kơm kang kơnang giĕng ‘noh gô pơm ăn lơ bơngai lăng truh hloh dơ̆ng. ‘Nou jĭ tơdrong kăl vă vei răk păng atŏk kơtang dôm tơdrong oei sa ‘lơ̆ng rŏ, pơvih pơvăn ăn atŏk tơ iung tơmang pơhiơ̆ kơ tơring."

Yak hloh rơbou sơnăm, kŏm soi kơ Yang hơbang Yă ling lang jing tơdrong kăl hloh lơ̆m tơdrong oei sa kơ kon pơlei păng jing tơdrong kăl vei răk tơƀăk mong lơ̆m hơrih sa. Soi kơ Yang hơbang Yă đei chĕp răk tơƀăk vei đơ̆ng jơhnơr ou truh jơhnơr đơ̆ng rŏng, tơgop pơm ‘lơ̆ng hơ iă lơ̆m tơdrong hơrih sa, oei sa kơ kon pơlei.