Lơ̆m dôm năr hơtuch giĕng, đơ̆ng pơgê hrôih, tơ̆ hơnih gru gra Kơthôt Nhạn đei lơ kon pơlei păng tơmoi truh. Bơngai yak jơ̆ng pơtơ̆p hơkou jăn, bơngai truh plang hlôt nhang, tơmang lăng dah mă dơ̆ng tơ̆ groi kông tơƀang lăng đak krong Đà Rằng păng tơring kơdrơ̆m Tuy Hòa đơ̆ng kơpal. Hăm cham char rơngơp 'lơ̆ng păng rơnguơ̆, kơthôt so ƀrông ƀrang hơdah hăm đak kơ-ang gŏch brê kăp gĭt kơ chih chhơ̆ Chăm pa. Kon pơlei năm jơ̆ng tơ̆ ou pơtruh nơ̆r: “Tơ̆ ou, rim bơngai adoi lăp ngăl. Oei tơjê̆ ou noh đe truh tơ̆ ou vă pơtơ̆p ăn hơkou jăn grăng pran. Inh oei hơtaih đơ̆ng ou, mă lei hơnơ̆ng năm truh tơ̆ ah 'năr tơdrou, 'năr tơpơh 'noh pơmai oh pơkă băl năm tơ̆ ou chă pơtơ̆p vă đon bơnôh rơhao hloh”.

Kiơ̆ kon pơlei tơ̆ tơring, hơnăn “Kông Nhạn” păng Kơthôt Nhạn, hơdrol ki jĭ hơnih hơrih xa kơ lơ kon sem yă yai. Um rup tơpôl sem păr juang ah drơ̆m kơsơ̆ hlôi pơjing đei tơdrong vơch ăn hơnăn krao ou. Kơthôt Nhạn đei ming man lơ̆m pơhlom hơtuch anglŏ 11, blŭng anglŏ 12. 'Nou adoi jing minh lơ̆m tŏ sĕt kơthôt oei đei akŏm soi ƀlŏk kơ Thiên Y A Na.

Kơthôt Nhạn kơjung jê̆ 24 met, đei pơkăp jing Hơnih gru gra kăp gĭt kơ teh đak. Ưh hơdrô̆ akŏm kơjă kăp gĭt kơ tơdrong hơrih păng chih chhơ̆, hơnih ou oei tơguăt hăm tơdrong hơrih joh ayŏ, đon lui kơ kon pơlei tơ̆ tơring kiơ̆ lơ jơhnơr bơngai hơrih jang xa. Lơ̆m dôm sơnăm tơjê̆ ou, rok cham Kơthôt đei ming pơ-'lơ̆ng, pơih să cham char, pơm trong ƀônh hiôk ăn kon pơlei păng tơmoi truh tơmang lăng, hơlen băt. Kiơ̆ kơ yă Nguyễn Thị Thục Oanh, tơ̆ phương Tuy Hòa, kơsô̆ tơmoi truh hăm Kơthôt Nhạn roi năr roi lơ, mă kăl noh lơ̆m pơyan pơdơh he păng dôm lêh akŏm et soi: “Tơ̆ ou dang ei pha hăm hơdrol ki bơih, đei hơmet ming, 'noh 'lơ̆ng hloh kơ hơdrol sơ̆, sơng tơmoi truh tơmang lăng lơ hloh. Ah pơyan pơdơh hè đe truh kơdrơ̆m hloh, đe hŏk tro pơdơh hè noh tơ̆ ou roi lơ bơngai hloh, dah mă lơ̆m khei lêh akŏm dah mă 'năr têt, 'năr soi kơ Yă ai, 'noh lơ bơngai truh akŏm, đe chă tơmang lăng tơdrong lui adoi lơ mơ̆n”.

Hơnih grasia oei atŭm hơnih ah hơnê̆ tơring kơdrơ̆m tơjih đak dơsĭ pơm ăn Kơthôt Nhạn đei kơdih gru gra hăm lơ tơmoi ƀơ̆t truh hăm tơring gah Hơlĕch dêh char Đăk Lăk. Đơ̆ng groi kông Nhạn, tơmoi gơh tơƀang lăng tôm um rup tơring kơdrơ̆m Tuy Hòa, đak krong Đà Rằng păng hơnih 'măng đak dơsĭ đơ̆ng hơtaih. Pơmai Tống Thị Hải Yến, tơmoi đơ̆ng dêh char Phú Thọ tơroi: “Năm truh tơ̆ ou inh ƀôh chơt dêh. Hơnih yang grasia thoi ou, ah hơnê̆ pơlei tơm adoi đei lơ kon pơlei arih xa, mă lei đei minh tơdrong nhen lĕ yang pơm ăn kon bơngai chơt lơ̆m jơhngơ̆m. 'Măng mă blŭng inh ƀôh đei minh anih pơjing đơ̆ng anglŏ 11 truh dang ei mă oei 'lơ̆ng nhen khei năr blŭng thoi ou, 'noh inh ƀôh tơdrong vei lăng đơ̆ng teh đak bơ̆n tôch tơnăp”.

Lơ̆m sơkơ̆t hơtŏk tơ-iung kơ dêh char Đăk Lăk đơ̆ng rŏng tơmơ̆t hơdai, tơring gah Hơlĕch hăm tơdrong hiôk đơ̆ng đak dơsĭ, mŭk drăm joh ayŏ păng cham char 'lơ̆ng tŏk bŏk đei sơkơ̆t jĭ hơnih hơtŏk tơmang pơhiơ̆ kăp gĭt. Lơ̆m noh, Kơthôt Nhạn đei lăng jĭ anih kăp gĭt hloh vă pơtoi tơmang pơhiơ̆ joh ayŏ, tơmang pơhiơ̆ đon lui păng hơlen băt gah cham char tơring đak dơsĭ. Yă Trần Thị Bử, Phŏ Kơdră pơgơ̆r Jơnŭm Vei lăng hơnih gru gra, lơ̆m Hơnih Joh ayŏ, Tơplŏng kơdou păng Tơmang pơhiơ̆ Đăk Lăk ăn tơbăt:  “Đơ̆ng rŏng kơ sơng iŏk anih gru gra Kơthôt Nhạn 'noh Jơnŭm vei lăng anih gru gra gô ming hơmet pơga pĕng ah hơnăp Kơthôt, vă vei sơđơ̆ng ăn tơmoi truh tơmang lăng tơ̆ anih gru gra. Jơnŭm vei lăng anih gru gra adoi chih akŏm tơdrong pơgơ̆r soi kơ Yă Ai rim sơnăm vă 'măn ăn tơmoi truh tơmang lăng păng bơngai 'meh năm truh soh nhang lơ̆m et soi kơ Yă Ai tơ̆ Kơthôt Nhạn vă hơvơn tơmoi truh tơmang pơhiơ̆ tơ̆ tơring ou”.

Lơ̆m tơdrong hơrih roi năr roi tơplih 'nao tơ̆ tơring tơjih đak dơsĭ, Kơthôt Nhạn oei ang bang nhen minh gru kăp gĭt ăn tơdrong joh ayŏ, jơhnơr hơrih păng đon lui kơ tơring teh gah Hơlĕch dêh char Đăk Lăk. Ah drơ̆m kơsơ̆ tơ̆ groi kông Nhạn, tơƀang lăng đak krong Đà Rằng kơnhă hăm tŏ chră păng tơring kơdrơ̆m Tuy Hòa tŏk bŏk đei tơ̆k unh hơdah, Kơthôt Nhạn nhen pơtoi tơroi gah tơdrong akŏm lŭk lơ̆k joh ayŏ, gah tơdrong hơrih sơđơ̆ng kơ mŭk drăm joh ayŏ lơ̆m tơdrong hơrih hrei ou.