VOV4.Bahnar – Tơ̆ Lâm Đồng, pơrang jĭ covid-19 đei kĕ tang găn, kơjă minh ƀar tơmam choh pơtăm nhen ‘nhot, pơkao hlôi tŏk kơjă, kon pơlei jang mir Đà Lạt tŏk bŏk oei akŏm ăn tơdrong choh jang.

           Đơ̆ng rŏng kơ đunh khei năr rơheng kơkot, pơdơh pơm jang kơyuơ kơjă dôm tơmam choh pơtăm tơjur kơjă, lôh hlăm, lơ pơgar pơtăm ‘nhot pơkao tơ̆ Đà Lạt păng dôm tơring tơjê̆ kơ dêh char Lâm Đồng hlôi pơtơm vih pơm jang dơ̆ng, tenh kuăng rei pơtăm vă tơtom đei tơmam tĕch lơ̆m tơring. Yă Nguyễn Thị Thu, tơ̆ phương 8, plei tơm Đà Lạt ăn tơbăt, kơyuơ pơrang jĭ hlôi dar deh đei tang găn, găh tơdrong chơ pơdŭ tơmam choh pơtăm ƀônh ƀŏ hloh noh minh ƀar tơmam choh pơtăm hlôi tŏk kơjă hơlơ̆k dơ̆ng, lơ̆m noh đei ‘nhot xa lat hlôi tŏk hloh pơtêng hăm khei năr adrol ki. Kơyuơ noh kon pơlei păng lơ unh hnam nai lơ̆m tơring tŏk bŏk oei hăt hot axong choh pơtăm vă đei tơmam tĕch tơlĕch: “Yơ̆ng âu ki pă đei ‘nhot bơih, xa lat tŏk 1.000 hlj 1 tơm. Dang ei kơjă vih hơlơ̆k 600 hlj truh 800 hlj 1 tơm pơtêng hăm khei năr adrol ki kơ pơrang jĭ  Covid-19 hơbuh hli. Dôm khei kơ âu kon pơlei pơtăm ưh đei xa păng tĕch tơlĕch ưh gơh, dang ei ‘nhot đei kơjă noh đe pơtăm hơlơ̆k dơ̆ng. Lăng atŭm ‘nhot tŏk bŏk oei tŏk kơjă, kon pơlei chơt hơ iă noh akŏm choh pơtăm dơ̆ng”.

             Ưh adrô̆ ‘nhot pơtăm, bơngai pơtăm pơkao kŭk tơ̆ Đà Lạt duh chơt hơ iă kơyuơ kơjă pơkao tŏk truh 30.000 hlj minh chô̆ pơkao kŭk, 15.000 hlj hăm minh hơchô̆ pơkao kŭk hmă. Hăm kơjă tĕch âu, rim sao pơkao kŭk kon pơlei đei yua 40 trĭu hlj. Kiơ̆ kơ ƀok Nguyễn Đình Thuận, tơ̆ phương 7, plei tơm Đà Lạt, hơbŏ kơyuơ đunh khei năr pơdơh pơm jang, ưh kơ măh axong ăn tơdrong kăl noh kơjă minh ƀar tơmam pơtăm tŏk kăp thoi noh. Mă băt tơdrong lơ bơngai vih choh pơtăm, hơbŏ tơdrong tĕch tơlĕch tơmam choh pơtăm lơ̆m khei năr truh gô tơxŭl tơxăl, pơm ăn lơ tơdrong ưh đei xa, mă lei hăm tơdrong mă pơrang jĭ dar deh kĕ tang găn păng xơđơ̆ng nhen dang ei, ƀok duh hơpơi tơdrong choh pơtăm gô pơyua lơ hăm pơyan jang truh âu kơnh. Ƀok Nguyễn Đình Thuận ăn tơbăt: “Lăng atŭm hăm kơjă pơkao kŭk nhen dang ei noh bơngai jang pơgar đei yua lơ. Ăh xơnăm xơ̆, khei năr âu noh pơkao kŭk tŏk bŏk ăh kơjă 40.000 hlj bơih, xơnăm âu kơyuơ Covid-19 noh hlôi tơjur. Tơdrong tĕch tơlĕch lơ̆m khei năr âu noh ba ưh đei băt adrol tôm tơdrong, dang ei tơ ‘ngla pơkao kŭk noh đei kơjă kăp, oei dôm pơkao nai noh athei rô̆ hŭt lê̆ đĕch”.

             Đei băt, vă tơgŭm ăn kon pơlei jang mir, anih jang mŭk drăm tĕch răt tơmam choh pơtăm, anih jang choh pơtăm Lâm Đồng tŏk bŏk oei pơjing trang tơroi tơbăt tĕch pơdro điê̆n tưh “Tơmam choh pơtăm dêh char Lâm Đồng” jăl xơnăm 2021-2025. Kiơ̆ kơ noh, tơmam choh pơtăm tŏk bŏk ăh pơyan jê̆ iŏk yua gô đei akŏm vă hơtŏk tơdrong tơroh tĕch răt, tơgop xơđơ̆ng tơdrong tĕch răt tơmam choh pơtăm ăn kon pơlei jang mir.

Lan chih păng pơre nơ̆r