Gre păr ƀât blŭng khei 3 păr jur tơ̆ cham gre păr Buôn Ma Thuột chơ ba lơ bơngai đơ̆ng plt Hồ Chí Minh. Lơ̆m kơsô̆ âu đei hloi Việt kiều hơnơ̆ng brŏk ngôi tơ̆ Buôn Ma Thuột, anih rong kơdih kâu tih vơ̆ ƀât oei ‘lơ̆p sơ̆ nhen yă Thu Mai. Yă Mai tơroi, ‘nao jur lĕch đơ̆ng cham gre păr, năm truh tơ̆ trong tơƀưh Đam San-Nguyễn Lương Bằng-Võ Nguyên giáp, găh xăh Hòa Thắng, yă nhen hơvơ̆l tơ̆ hơnăp tơdrong tơplih ‘nao tôch hrĕnh tơ̆ âu: "Lăp dôm sơnăm đĕch, adrol ki inh năm tơ̆ au, ƀôh ưh kơ đei nhen dang ei. Dang ei vih hơlơ̆k dơ̆ng ƀôh tơplih hrĕnh tơpă, ưh tom băt hloi."

Lơ̆m lơ tơdrong tơplih tơ̆ Buôn Ma Thuột, tơplih ƀôh hơdăh hlŏh jĭ tơ̆ Cham gre păr Buôn Ma Thuột. 50 sơnăm adrol sơ̆, mă đơ̆ng anih âu đei hơnăn cham gre păr Hòa Bình, mă lei tơtă ngiĕt gia, rơsô, anih đăk mĭn ngăl, kŭm hăm lơ blô kôt păng anih prăh phao, jĭ 1 lơ̆m 2 anih đei tơdrong tơblăh krưp krĕnh hlŏh lơ̆m ‘năr 10/3/1975. Mă lei dang ei tơring âu jing anih tôch gĭt kăl tơƀưh rim trong yak đei trong teh-trong gre păr; dôm trong gre kơdâu hrĕnh Khánh Hòa - Buôn Ma Thuột, Trong gre 27 tơƀưh Đắk Lăk-Lâm Đồng păng trong Võ Nguyên Giáp kơdâu mât lơ̆m plt.

Rơneh tơ̆ Buôn Ma Thuột mă lei hơtăih kơ plt âu lơ sơnăm, yă Hoàng Thị Kim Anh kŭm ưh ê păng tôch hơiă tơ̆ hơnăp tơdrong tơplih tôch ‘lơ̆ng tơ̆ âu: “Hơiă, čhôk ‘nă dêh yoa vih tơ̆ au ƀôh Buôn Ma Thuột jang tŏk tôch pran. Inh nhen vă hơvơ̆l đĭ dôm anih tôch juăt adrol sơ̆ hloi.”

50 sơnăm hloh bơih, ưh lăp dôm tơdrong răm đơ̆ng tơblăh sơ̆ đei hơmet pơ ‘lơ̆ng mă Buôn Ma Thuột, đơ̆ng 1 thĭ xăh ưh đei yă kiơ, hăm hơnăn đe ư̆ ƀât dŏh sơ̆ jĭ “Pơlei sơ ‘ngon ling lang”, lăp đei hlŏh kơhrĕng rơbâu ‘nu bơngai đĕch, dang ei đĭ jing plt kơloăi 1- tơring pơtăm chĕh phe tơm kơ teh đak Việt Nam. Xăh Hòa Thắng păng jŭm dăr cham gre păr Hòa Bình so, adrol sơ̆ lăp đei dôm jĭt unh hnam kon pơlei đơ̆ng tơring Mường tơ̆ dêh char Hòa Bình mât oei, dang ei đĭ jing 1 lơ̆m dôm anih jang khoa hŏk ki thuơ̆t choh jang xa tih hlŏh kơ teh đak, pơm tơlĕch, tĕch mơdro hơdrĕch, tơđăh ‘long păng pơtho tơƀôh lơ trong jang, ki thuơ̆t – kơmăy kơmŏk choh jang xa, pơtăm ‘long ăn jơ̆p tơring Tây Nguyên.

Ƀok Nguyễn Quang Ngọc, pơlei so đơ̆ng tơring Mường dêh char Hòa Bình rơnĕh sơnăm 1960 tơ̆ xăh Hòa Thắng ăn tơbăt, tơdrong tơplih tơ̆ tơring teh âu đơ̆ng hnam gia, tơnăr ‘lao jing hnam man ‘lơ̆ng rŏ: “Sơ̆ chăl đe yă ƀok ưh kơ đei thoi âu ôh. Đơ̆ng rŏng âu, teh đak tơplih trong jang asong kon pơlei pơtăm chĕh phe, chĕng song teh ăn kon pơlei. ‘No, lơ̆m Hòa Thắng âu, lơ hnam man tih ‘lơ̆ng gơnơm đơ̆ng pơgar ơng tơđăh ‘long. Ơng tơđăh ‘long đei lơ bơngai răt. ‘Nâu nâu, đe jang 1 sơnăm đei truh kơ ti hlak jên hloi văi.”

Xăh Hòa Thắng đei hlŏh 1.200 unh hnam. Ƀât Tây Nguyên đei dôm pơyan choh jang xa đei, Hòa Thắng kŭm đei tơdrong chơt hơdai ‘năi yoa cheh phe, sầu riêng, tiu tŏk yă, kon pơlei Hòa Thắng tŏk pơdrŏng roi ƀônh hlŏh dơ̆ng. Lơ hnam man tih čhing čhang tơter trong gre tơ̆ jih tơring kơdrâm Buôn Ma Thuột. Tơdrong pơm đei trong gre Võ Nguyên Giáp roi pơm ăn tơring âu ‘lơ̆ng rŏ hlŏh dơ̆ng.

Đơ̆ng 1 thĭ xăh pŭ ƀĕnh tơdrong tơblăh vang hrang tơƀet, đơ̆ng rŏng 50 sơnăm Buôn Ma Thuột hlôi tŏk jing tơring pơtăm cheh phe tơm kơ Việt Nam, 1 lơ̆m dôm tơring jang mŭk drăm, khoa hŏk ki thuơ̆t choh jang xa, pơtăm ‘long tơm dơnơm kơ Tây Nguyên. 50 sơnăm adrol sơ̆, tơdrong tơblăh iŏk rơngei Buôn Ma Thuột jĭ tơdrong tơblăh pơih blŭng ăn pơyan Puih mak iŏk Jơnei tih, kơna Buôn Ma Thuột ‘lơ̆ng rŏ hrei ‘nâu jĭ tơdrong iŏk đei lơ̆m 50 sơnăm rơngei hiôk hian păng kơjăp ‘lơ̆ng. Đơ̆ng âu, plt pơtơm yak dơ̆ng lơ̆m chăl ‘nao, chăl jang tŏk păng mât hơdai, jing anih truh đơ̆ng cheh phe apŭng plenh teh.