Tơgĕch ƀât pơyan phang, kon pơlei tơ̆ plei Kim Môn, xăh Chư̆ A Thai, dêh char Gia Lai vang pơm trong lơ̆m pơlei, pơih đei trong xă truh 8m. Vă jăh pơm đang trong, lơ unh hnam chu yuih hŭt dur var, kơdŭn rĭ cham tơ̆ lăm, chĕng song teh vă pơm trong. Unh hnam ƀok Phạm Văn Hùng jĭ 1 lơ̆m dôm unh hnam năm hơdrol, yuih hŭt dur var, chĕng song hlŏh 74m² teh.

Lơ̆m hnam pơm jê̆ trong oei pơih xă, ƀok Hùng tôch chơt hơiă mưh ƀôh pơlei pơla roi đunh roi tơplih ‘nao ‘lơ̆ng rŏ: “Unh hnam nhôn chĕng song teh tơter trong, mât hlom tơ̆ cham dang 3m, nhôn chu jang kŭm hăm teh đak vang pơm hơmet trong rơgŏh ‘lơ̆ng, vă kon pơlei yak vih vât, chơ chuĕn tơmam gơ̆h hiôk hian. Mih ma duch nă jŭm dăr kiơ̆ âu tôch lăp đon, vang tơgŭm, chĕng song bơ̆n teh kŭm hăm teh đak vang pơm trong.”

Adrol sơ̆, lơ̆m pơyan kăt yoă ƀa, rô̆ ƀum... gre tih ưh gơ̆h mât lơ̆m pơlei vă răt iŏk tơmam yoa trong iĕ, trong kơnê̆. Vă pơih xă trong tơ̆ tơring tơrang, kŭm hăm khul kăn ƀô̆ tơ̆ xăh, kon pơlei kŭm vang chă roi tơbăt ăn băl, pơlung băl vang jang. Ƀok Dương Văn Phon, tơ̆ plei Hải Yên ăn tơbăt, hăm kon pơlei tơ̆ âu, chĕng song teh vă pơih đei trong xă ‘lơ̆ng, pơyoa ăn tơdrong arih xa dang ei păng ning mônh kơnh ‘nŏh jĭ tơdrong tôch tơgăl: “Ưh lăp gô mơ̆ng đơ̆ng kăn ƀô̆ truh krao hơvơn đĕch, mă kon pơlei nhôn oei pơlung băl hai, mih ma duch nă yoa kơ rim bơngai, rim bơngai yoa kơdih bơ̆n kơna athei vang adrin. Mă tơpă ba hiong tŏ sĕt teh, mă lei tơdrong đei yoa ‘nŏh trong đei Teh đak pơm ăn kơ bơ̆n xă ‘lơ̆ng truh ning mônh, ưh lăp lơ̆m chăl arih ba đĕch, mă chăl kon sâu ning mônh kŭm đei trong xă, thoi noh kon pơlei gơ̆h đei tơdrong ‘lơ̆ng vă jang tŏk.”

Ƀok Trần Văn Nguyên, Bí thư Chi ƀô̆ pơm hloi Ƀok pơgơ̆r plei Hải Yên, xăh Chư̆ A Thai ăn tơbăt, tơdrong hơiă hlŏh ‘noh 79 unh hnam tơ̆ 2 pơlei arih tơter trong, đĭ đăng vang tơgŭm chĕng song teh pơih xă trong ngăl, tơdrong ‘noh ăn ƀôh kon pơlei mât 1 jơhngâm đon vang jang kiơ̆ trong jang đơ̆ng teh đak: “Mih ma duch nă tôch hơiă yoa trong ‘nâu adrol ki trôk rơbơ̆r, ‘mê̆ ‘mach. Mưh chă roi tơbăt ăn kon pơlei bu bu kŭm 1 jơhngâm chĕng song teh, yuih hŭt dur var hlôi đei man kơjăp. Đei Đảng, teh đak tơgŭm pơm ăn kon pơlei trong ‘nâu ‘nŏh đe tôch hơiă”

Xăh Chư̆ A Thai jĭ tơring pơtăm ƀa tơm găh Pơmât kơ dêh char Gia Lai. Chih hơdăh trong yak jĭ tơdrong tôch gĭt kăl vă jang tŏk, tơring hlôi tơlĕch jên pơm 18 tŏ trong tơ̆ pơlei, hăm kơsô̆ jên hlŏh 17,4 ti. Lơ̆m noh, kon pơlei chu chĕng song vă jê̆ 5.000m² teh vă pơm trong, vang tơgop hlŏh 1,1 ti hlak jên.

Ƀok Phạm Văn Lượng, Phó Bí thư Đảng, Kơdră vei lăng kon pơlei xăh Chư̆ A Thai ăn tơbăt, xăh oei hơnơ̆ng tơlĕch jang pơm dơ̆ng 7 tŏ trong ‘nao păng hơnơ̆ng iŏk đei tơdrong tơgŭm đơ̆ng kon pơlei: “Tơlĕch jang pơm trong hơnơ̆ng iŏk đei tơdrong tơgŭm đơ̆ng kon pơlei tơ̆ tơring, tơ̆ pơlei pơla, tơgŭm ăn khul kơdră pơgơ̆r tơring bơ̆ jang roi hrĕnh ƀiơ̆. Mưh tơlĕch jang, nhôn pơjing grŭp krao hơvơn, roi tơƀôh tơdrong chưk pơ ‘ngoăih teh păng pơgơ̆r roi tơbăt ăn kon pơlei, khul jang chinh trĭ tơ̆ pơlei pơla kŭm vang krao hơvơn kon pơlei, đơ̆ng noh kon pơlei vang jang kiơ̆, chu chĕng song teh vă pơm trong”.

Dôm tŏ trong oei tŏk bŏk pơih xă tơ̆ Chư̆ A Thai, dêh char Gia Lai ưh lăp pơm hiôk hian ăn tơdrong yak vih vât, choh jang xa đĕch mă oei tơƀôh hơdăh tơdrong mât mĭnh jơhngâm đon, vang bơ̆jang kiơ̆ đơ̆ng kon pơlei lơ̆m tơdrong pơjing tơring tơrang ‘nao./.