Ƀât 1 ‘măng pơih livestream hơtuch khei 4/2026 yoa Anih vei lăng jang kơmăy, tĕch mơdro dêh char Gia Lai jang hơdoi hăm Anih tĕch mơdro hăm điên tư păng mŭk drăm kơsô̆ (Anih tơm vei lăng jang kơmăy, tĕch mơdro) pơgơ̆r, ƀĕng ít Hoàng Đông (xăh Bình An, dêh char Gia Lai) đei tĕch truh rơbâu tŏ lơ̆m jơnăr ưh kơ đunh.

Mŏ Hồ Thị Mỹ Phúc – tơ ‘ngla anih jang tơroi, tơmam hlôi iŏk đei hơnăn OCOP 3 sơnglŏng đơ̆ng sơnăm 2019, mă lei adrol kơ ‘noh lăp tĕch kơtă tơ̆ tơring đĕch yoa ưh gơ̆h lê̆ đunh. Đơ̆ng rŏng kơ ‘nŏh, đei iŏk yoa kơmăy hyup pơđĭ hơyuh lơ̆m tơpu tăh vă pơdui đunh khei ‘năr gơ̆h yoa, lăp hăm tơdrong chơ chuĕn năm tơ̆ tơring hơtăih, tơmam tôch lăp hăm tơdrong tĕch mơdro hăm điên tư, hăm lơ hla ar apinh răt iŏk truh kơhrĕng tŏ.

“Rim ‘măng pơih Megalive đơ̆ng Anih vei lăng jang kơmăy, tĕch mơdro dêh char pơgơ̆r, ‘nŏh tơmam đơ̆ng nhôn pơm păr ang truh jơ̆p mang tơpôl, đei lơ bơngai băt truh. ‘Nâu jĭ trong jang tơgŭm ăn anih tĕch mơdro jang tŏk hrĕnh. Mĭnh ‘măng Mega live gơh iŏk đei truh rơbâu hla ar apinh răt tơmam. Nhôn hyup pơđĭ hơyuh kial lơ̆m tơpu tơmam, đơ̆ng 2 truh 3 năr tơmam chơ truh tơ̆ bơngai răt ‘nŏh tơmam oei ‘lơ̆ng hơnơ̆ng đĕch".

Nhen thoi noh mơ̆n, HTX choh jang xa, rong ka hơdang Mỹ An (xăh Phù Mỹ Đông, Gia Lai) adrol kơ tơƀâp lơ pơmat tat mưh tĕch rơmam OCOP đơ̆ng kơdih. Đơ̆ng rŏng kơ tĕch kiơ̆ kơmăy trư̆k tuyê̆n, HTX pơih đei anih tĕch mơdro sơđơ̆ng, iŏk đei jên tĕch tơmam roi lơ lơ̆m 2 sơnăm âu ki.

Mŏ Nguyễn Thụy Thúy Vi, Phŏ Kơdră chĕp kơ̆l Khul vei lăng HTX ăn tơbăt: tĕch tơmam hăm kơmăy điên tư ưh lăp tơgŭm ăn tơmam truh hăm lơ bơngai răt đĕch mă oei pơjing đei kênh tĕch mơdro tôch hơiă, đơ̆ng noh gơh pơm hơmet ming tơmam păng chă đei trong tĕch lăp hăm tơdrong ‘mĕh vă tơ̆ yăn âu. 

"Adrol sơ̆, nhôn lăp tĕch kơtă tơ̆ tơring đĕch mă lei đơ̆ng rŏng au nhôn ƀôh tơdrong ‘lơ̆ng đơ̆ng tĕch tơmam online kơna nhôn chă phĭn tơmam, hơtŏk clip păng pơgơ̆r lơ ‘măng livestream tơ̆ kơmăy điên tư tĕch tơmam, lơ̆m trang fanpage HTX, đơ̆ng rŏng kơ ‘nŏh iŏk đei lơ hla ar apinh răt tơmam, nhôn kŭm oei pơgơ̆r tĕch tơmam online roi đunh roi lơ ‘năi."

Dang ei Gia Lai đei dang 400–450 tơmam OCOP, mă lơ ‘nŏh jĭ tơmam đơ̆ng choh jang, tơmam ‘lơ̆ng tơ̆ tơring. Mă lei, dôm tơ ‘ngla tơmam OCOP tơ̆ dêh char oei tam gan tĕch mơdro lơ lơ̆m kơmăy sô̆, kơna tam mă đei tĕch tơ̆ lơ tơring, đơ̆ng noh jing đei tơdrong tĕch mơdro ưh gan sơđơ̆ng.

Lơ̆m 2 sơnăm âu ki, lơ tơdrong tơgŭm tĕch tơmam trư̆k tuyê̆n, livestream, pơjing kơmăy sô̆… hlôi đei tơlĕch, tơgŭm ăn kon pơlei păng HTX dar deh pơm juăt hăm tơdrong tĕch mơdro lơ̆m kơmăy sô̆. Kiơ̆ đơ̆ng noh pơih xă đei anih tĕch mơdro, pơjing đei hơnăn tơmam ‘lơ̆ng.

Ƀok Nguyễn Đình Kha, Phŏ Kơdră Anih vei lăng jang kơmăy, tĕch mơdro dêh char Gia Lai ăn tơbăt, tơ̆ hơnăp kơnh, dêh char hơnơ̆ng chih hơdăh tĕch mơdro hăm điên tư jĭ 1 kênh gĭt kăl. Đơ̆ng 2026–2030, dêh char vă hơtŏk tơdrong tĕch mơdro hăm diên tư truh tơ̆ teh đak nai, đơ̆ng noh ưh lăp pơm hơtŏk kơjă tơmam đơ̆ng choh jang xa đei đĕch mă oei dar deh pơjing đei hơnăn tơmam ‘lơ̆ng đơ̆ng tơring vă tĕch mơdro lơ̆m apŭng plenh teh.

"Nhôn hlôi pơjing trong jang tơplih hăm kơmăy sô̆ tơ̆ Anih jang kơmăy, tĕch mơdro. Lơ̆m noh găh tơdrong tĕch mơdro ‘nŏh năng kăl truh tơplih hăm kơmăy sô̆ kiơ̆ đơ̆ng dôm trong tĕch tơmam hăm điên tư. Hăm tơdrong tĕch tơmam tơ̆ teh đak đe, nhôn năng kăl truh tơdrong tĕch tơmam hăm điên tư truh tơ̆ teh đak nai kiơ̆ đơ̆ng jang hơdoi hăm dôm anih tĕch mơmam hăm điên tư lơ̆m apŭng plenh teh. Tơchĕng adrol lơ̆m khei 5 âu, nhôn vă pơgơ̆r 1 hop akŏm, pơma nuh găh tĕch mơdro hăm điên tư truh tơ̆ teh đak nai."

Tơplih hăm kơmăy sô̆ oei dar deh pơm tơplih trong hơnhăk tĕch tơmam đơ̆ng choh jang xa đei kơ Gia Lai truh tơ̆ anih tĕch mơdro, pơih đei lơ kênh tĕch mơdro rơgei, đei yoa. Mưh kon pơlei jang chŭn mir gơ̆h iŏk yoa kơmăy kơmŏk ‘nao, dôm tơmam ‘lơ̆ng đơ̆ng tơring ưh lăp hơnhăk tĕch roi hrĕnh ƀiơ̆ đĕch, mă oei gơ̆h yak tŏk pran pơjăp lơ̆m anih tĕch mơdro tih, xăh dơ̆ng./.