Xăh Tà Năng, dêh char Lâm Đồng đei teh xă hlŏh 25.800 ha, kơsô̆ kon pơlei vă jê̆ 14.000 ‘nu, lơ̆m noh kon pơlei kon kông vă jê̆ truh 78%. Đơ̆ng rŏng 1 sơnăm bơ̆ jang, truh dang ei Khul chĕp kơ̆l Đảng, Anih vei lăng kon pơlei, Anih MTTQ Việt Nam xăh ‘nao đei lăp 41 ƀiên chê̆, oei ưh mă truh 21 ƀiên chê̆. Ƀok Nguyễn Tiến Điền, Bí thư Đảng xăh Tà Năng, ăn tơbăt, tơdrong jang tôch lơ, oei anih pơvih ăn Khul chep kơ̆l Đảng xăh ‘nŏh lăp đei 2 ƀiên chê̆, Anih Pơjing Đảng 3 ƀiên chê̆, Anih hơlen năng 2 ƀiên chê̆, grŭp mặt trận khul tơpôl ưh đei bơngai juăt jang păng grŭp khul kơdră pơgơ̆r ưh măh truh 9 ƀiên chê̆. Đĭ thoi noh, tơdrong rơgei đơ̆ng khul kăn ƀô̆ xăh ưh đei hơnơ̆ng dơ̆ng:

“Lăp đei 4 ‘nu bơngai chĕp kơ̆l jĭ Bí thư, Phó Bí thư, Kơdră păng Phŏ kơdră đơ̆ng dêh char, apŭng jur jang, oei đei dơ̆ng jĭ dôm ƀiên chê̆ đơ̆ng 2 xăh tơmât hơdai kơna tơdrong hŏk jrŭ, đon jang rơgei vă pơm lăp hăm tơdrong jang oei tam mă gan ‘lơ̆ng. Yoa ưh măh ƀiên chê̆ kơna 1 kơsô̆ bơngai jang ăn teh đak athei iŏk jang hloi lơ tơdrong. Dang ei 1 ‘nu bơngai juăt jang athei iŏk jang hloi đơ̆ng 4- 5 tơdrong jang yoa Anih jang kơpal tơjur”.

Pha hăm tơdrong ưh kơmăh ƀiên chê̆ tơ̆ xăh pơmat tat dêh hlŏh Tà Năng, tơdrong kăn ƀô̆ kŭm jing tơdrong nol tơ̆ dôm phường kơ dêh char Lâm Đồng hai. Lơ̆m noh, phường Xuân Trường - Đà Lạt, tơdrong jang kăn ƀô̆ kŭm jing tơdrong tôch pơngơ̆t. Yă Ngô Thị Mỹ Lợi, Bí thư Đảng phường Xuân Trường- Đà Lạt, ăn tơbăt, tơdrong jang lơ hlŏh kơ xăh so ki, jang tôch trăp, pơmat tat pơm ăn lơ kăn ƀô̆ apinh pơdơ̆h jang hloi:

“Khul kăn ƀô̆ bơngai jang tơ̆ phường Xuân Trường - Đà Lạt hrei ‘nâu tôch mơmat, tơdrong apinh pơdơ̆h jang, pơdơ̆h jang hloi roi lơ. Anih chĕp kơ̆l Đảng hlôi đei 2 ‘nu bơngai apinh pơdơ̆h jang. Hăm Anih vei lăng kon pơlei ‘nŏh đei 3 ‘nu kăn ƀô̆ apinh pơdơ̆h jang kiơ̆ tơdrong ‘mĕh vă mă ưh kăl đei tơgŭm jên kiơ. Truh dang ei nhôn kŭm iŏk đei dơ̆ng 4 hlak hla ar apinh pơdơ̆h jang đơ̆ng kăn ƀô̆, bơngai jang ăn teh đak”.

Đơ̆ng rŏng kơ tơmât hơdai 3 dêh char Đắk Nông, Bình Thuận păng Lâm Đồng, dêh char Lâm Đồng ‘nao đei 124 xăh, phường, tơring gĭt kăl. Kiơ̆ đơ̆ng hơmet ming, kăt tơjur khul bơngai jang Lâm Đồng đei 2.529 ‘nu bơngai pơdơ̆h jang kiơ̆ Tơdrong hơgăt kơsô̆ 178; 145 ‘nu bơngai kiơ̆ tơdrong hơgăt kơsô̆ 07 păng kiơ̆ trong kăt tơjur ƀiên chê̆ hăm 1.450 ‘nu bơngai oei bơ̆ jang tơ̆ xăh. Kiơ̆ nơ̆r tơroi ‘nao hlŏh đơ̆ng Anih jang Nội vụ dêh char Lâm Đồng, đơ̆ng rŏng vă jê̆ 1 sơnăm tơmât hơdai, pơting hăm ƀiên chê̆ đei pơjao tơ̆ xăh oei ưh kơmăh truh 823 ƀiên chê̆, tơ̆ Anih jang kơpal ưh măh 990 ƀiên chê̆.

Ƀok Nguyễn Ngọc Phúc, Phŏ Kơdră vei lăng kon pơlei dêh char Lâm Đồng, ăn tơbăt, oei đei lơ tơdrong kơhret hăm đe kăn ƀô̆ tơ̆ xăh, ‘nâu jĭ 1 lơ̆m dôm tơdrong tơm pơm ăn tơdrong jang kăn ƀô̆ jing tôch gĭt kăl: “Tôch lơ tơdrong jang tơ̆ apŭng păng lơ tơdrong jang tơ̆ dêh char đei pơjao ăn xăh jang. Tơdrong kơhret mă 2 ‘nŏh đon rơgei, tơdrong hlôh vao đơ̆ng ‘nhŏng oh ưh tam kĕ iŏk jang lơ tơdrong jang adrol ki găh apŭng păng dêh char. Tơdrong mă 3 ‘nŏh, kơhret tơdrong jang hơdai hăm jơnăr athei chih tơroi, athei sek tơlang trŏ jơnăr hơgăt tơ̆ anih pơm hla ar hai. Tơdăh ưh đei hơmet ‘lơ̆ng khul kơdră pơgơ̆r, khul jang tơ̆ xăh ‘nŏh gô jing 1 tơdrong tơhlăk găn trong tih, bơ̆n athei băt hơdăh tơdrong ‘nâu”.     

 Tơ̆ hop akŏm hơlen năng 1 sơnăm bơ̆ jang kiơ̆ trong Khul kơdră pơgơ̆r tơring 2 tăl, Anih chĕp kơ̆l đảng dêh char Lâm Đồng pơma hơdăh: Tơdrong jang tơ̆ xăh tŏk tôch lơ mă lei ƀiên chê̆ oei ưh kơmăh, jing đei tơdrong kăn ƀô̆ athei iŏk jang hloi lơ tơdrong, tôch kơ gleh hrat; tơdrong klăih song ƀiên chê̆ păng tơlĕch tơdrong tơgŭm tam mă lăp kŭm ƀơm ưh ‘lơ̆ng truh jơhngâm đon bơ̆ jang kơ đe kăn ƀô̆, bơngai jang tơ̆ tơring hai. Ƀok Đỗ Thanh Bình, Kơdră jang lơm Trung ương Đảng, Kơdră tơm Anih jang Nội vụ, akhan, tơpă tơ̆ yăn âu lơ̆m 1 sơnăm bơ̆ jang kiơ̆ trong khul kơdră pơgơ̆r tơring 2 tăl, đei chih hơdăh sơnăm 2026 jĭ “Sơnăm pơm hơtŏk đon rơgei, ‘lơ̆ng ăn kăn ƀô̆ tơ̆ tơring”, Lâm Đồng athei hơlen năng, hơmet pơ ‘lơ̆ng khul kăn ƀô̆ tơ̆ xăh, phường; hơtŏk tơdrong pơtho pơhrăm ming dơ̆ng kiơ̆ tơdrong ‘mĕh vă:

“Rim xăh, rim phường hơlen năng, rơih hơmet kăn ƀô̆, tơlĕch trong pơtho pơhrăm ming. Atŭm hăm ‘noh hơmet pơkĕh tơdrong jang mă ‘lơ̆ng păng đei trong tơgŭm vă sơng bơngai rơgei jur jang tơ̆ tơring. Pơngơ̆t truh tơdrong rơih, pơjao tơdrong jang păng đei trong tơgŭm lăp ‘lơ̆ng hăm bơngai jang. Rim tơring, anih jang kơpal kơ Lâm Đồng kơchăng, bơ̆ jang mă pran, akŏm jơhngâm hơmet pơ ‘lơ̆ng tơtom dôm tơdrong pơmat tat, tơhlăk tăk, dôm tơdrong oei găn trong vă khul kơdră pơgơ̆r  tơring 2 tăl gơ̆h bơ̆ jang roi đunh roi pran, roi đunh roi đei yoa”.

Sek tơlang keh “tơdrong tơhlăk” găh kăn ƀô̆ đơ̆ng rŏng vă jê̆ 1 sơnăm bơ̆ jang kiơ̆ trong Khul kơdră pơgơ̆r tơring 2 tăl, chih iŏk dôm tơdrong kăl tơ̆ yăn âu, dêh char Lâm Đồng oei hơnơ̆ng hơmet ming pơ ‘lơ̆ng khul kơdră pơgơ̆r tơ̆ rim anih jang chinh trĭ kiơ̆ nơ̆r pơtho đơ̆ng Trung ương. Kŭm hăm ‘nŏh Lâm Đồng kŭm oei akŏm jơhngâm pơm hơtŏk tơdrong rơgei ‘lơ̆ng ăn khul kăn ƀô̆, bơngai jang ăn teh đak tơ̆ tơring, hơnơ̆ng hơlen năng, pơjao ăn kăn ƀô̆ bơ̆ jang mă lăp hăm tơdrong jang kơdih gơh; hơtŏk tơdrong pơtho pơhrăm ming găh tơdrong jang, kơmăy sô̆ păng tơdrong pơgơ̆r bơ̆ jang vă khul kơdră pơgơ̆r tơring 2 tăl gơ̆h bơ̆ jang roi đei yoa ‘lơ̆ng, iŏk tơdrong pơm lăp đon kon pơlei, anih tĕch mơdro pơm ‘long pơtŏ./.