Dôm ‘năr tơjê̆ têt, mă hlôi ăh kơsơ̆ măng, ăh tôch khei kăt yua tơmam pơtăm, dôm tong gre choh duh oei pơtoi chơ tơmam drăm vih truh pơlei Đe Ktu. ‘Nao pơdơh gre honđa ăh cham hnam, ‘nhŏng Nhip, oei tơ̆ pơlei ăn tơbăt, unh hnam pơtơm pĕ đang 5 sao ka phê păng tŏk bŏk oei chơ ka phê hơpăh ăn kon pơlei. Nhip tơroi, gre choh pơtơm răh ăh blŭng pơyan, mă lei duh hlôi pơtơm pơyua đei mă blŭng bơih. Tơdrong noh hlôi hơlêm ‘nhŏng Nhip chă trong pơm pơdrŏng ‘nao:  “Inh duh ‘meh ning mônh kơnh tơdrong erih da ƀiơ̆ tơnap tap noh bre klo hơkăn pơđăp gô răt gre honđa, pơtoi răt gre choh, kơmăi đôh vă hơtŏk mŭk drăm unh hnam xơđơ̆ng hloh. ‘Nguaih kơ ka phê noh inh chă rong bơ̆n nhŭng, rơmo, juei păng ier vă hơtŏk iŏk yua. Inh năm kăt ‘nhĕt ăn rơmo”

Mưh nhen ‘nhŏng Nhip xơnăm âu đei iŏk yua đơ̆ng rong kon tơrong păng chă chơ hơpăh phŏng mơ̆r, tơmam choh pơtăm, noh unh hnam pơmai Đinh Thị Thoan rơih tơdrong jang ot ka phê. Pơmai Thoan ăn tơbăt, ăh mă pơlei Đe Ktu pơjing tơring pơxĕl ‘nao, noh hơnơ̆ng đơ̆ng rŏng kơ rim jăl trong man đang, rim tơdrong jang pơjing tơring pơxĕl ‘nao đei pơm jang keh đang, tơdrong pơm jang kơ kon pơlei roi ƀônh hiôk hloh. Nhen unh hnam pơmai, xơnăm 2018 oei tơnap tap, mă dang ei hlôi đei dôm tơdrong pơyua pơhlom 130 trĭu hlj minh xơnăm. Atŭm hăm noh, lơ xơnăm adrin kơyươ tơdrong pơkăp atŭm – pơjing tơring pơxĕl ‘nao, tơguăt lơ̆m pơlei pơla kueng ƀôt adoi jing kơhret hloh adrol ki:  “Kon pơlei lơ̆m pơlei tơguăt tơguăl dih băl, bơngai yơ man hnam dăh mă pơm yă kiơ noh duh tơgŭm dih băl ưh kơ iŏk jên vă hnam gơh đei kơjăp ‘lơ̆ng. Ăh đei iŏk pơkăp tơring pơxĕl ‘nao noh đei bơ̆ trong, noh kon pơlei chă akŏm ‘năr jang, oei jăl trong mă yơ tơnap, noh kon pơlei plang teh, tong anê̆ met dăh mă lơ hloh vă pơm trong tih xă chă chơ tơmam pơtăm đei hiôk hian hloh vih truh hăm pơlei pơla, vih truh tơ̆ hnam”

Kiơ̆ ƀok Tryl, Ƀĭ thư chi ƀô̆  adoi jing kơdră pơlei Đe Ktu, jô̆ đơ̆ng keh đang pơjing tơring pơxĕl ‘nao jăl 1 xơnăm 2021, pơlei Đe Ktu hlôi tơ-iung tenh kuăng. Lơ̆m pơlei đei 138 unh hnam dang ei oei pă hơla 10 unh hnam hin dơnuh. Ƀok Tryl akhan, pơtơm ăh pơjing tơring pơxĕl ‘nao hơtŏk, pơlei Đe Ktu gô hơtŏk hloh dơ̆ng:   “Xơnăm âu, tơdrong erih kon pơlei xơđơ̆ng ƀiơ̆ đơ̆ng rŏng khei năr đei iŏk pơkăp tơring pơxĕl ‘nao, pơtoi adrin jang keh dôm tơchơ̆t hơtŏk găh tơring pơxĕl ‘nao, vă tơdrong erih kon pơlei hơtŏk hloh. Rim bơngai lơ̆m pơlei adoi băt hơdăh tơgŭm băl lơ̆m tơdrong bơ̆ hnam oei. Lơ̆m pơlei mă đei tơdrong kiơ kăp gĭt noh rim bơngai axong 1 năr vă tơgŭm dih băl”

Kiơ̆ kơ ƀok Nguyễn Văn Sỹ, Phŏ Kơdră Anih vei lăng kon pơlei thĭ trâ̆n Kon Dơng xơkơ̆t: “ Hăm Đe Ktu tơdrong tơm rơih pơm pơlei dơnơm pơxĕl ‘nao noh găh mŭk drăm pơlei đei mŭk drăm kơjăp hloh lơ̆m dôm tơring kon pơlei kon kông, tơdrong hlôh vao đơ̆ng kon pơlei, rim unh hnam mă teh đak tơchơ̆t tơgŭm, bơngai tơgŭm jơhngơ̆m ăn kăch mạng noh kơdrâ̆m, noh đon lui hăm kră pơlei, kơdră pơlei, adoi nhen jơnŭm jang kon pơlei thôn đei vei xơđơ̆ng. Găh tơdrong pơkăp pơjing tơring pơxĕl ‘nao hơtŏk noh nhôn gô hơlen lăng dơ̆ng tơchơ̆t kơ hơtŏk, ƀơ̆t doh pơtơm tơchơ̆tt ruh xơnăm mă yơ gô đei jơnei. Blŭng xơnăm 2023 apŭng gô đei tơdrong pơkăp jang vă pơjao ăn dôm xăh, thĭ trâ̆n găh tơdrong âu”

Dôm bơbŭng hnam ‘nao kơjăp ‘lơ̆ng đei kơjă kơ hrĕng, phŏ kơtih hlj pă đei jing um ai khăi kơ pơlei Đe Ktu. Tơpôl đei vei xơđơ̆ng, dôm kơjă joh ayŏ păng um ai juăt jue kăp gĭt đei tơ-iung, chĕp vei. ‘Nâu jing tơdrong jang đei jơnei đơ̆ng dôm bơngai jang mir khĭn kơchĕng, khĭn pơm jang. Tơgŭm đe xư pơtoi hơtŏk pơjing tơdrong erih phĭ tơtŏ dơnŏ ‘lơ̆ng tơ̆ hơgăt teh pơlei pơla po. Puih mak hlôi vih rơ-ông rơ-ang chơt hơ-iă tơ̆ pơlei pơla pơxĕl ‘nao.