Tơ̆ tơƀơ̆p pơma dơnuh hăm bơngai tăh hla tơring Đưng K’Nớ, apŭng Lạc Dương, dêh char Lâm Đồng, bơngai tăh hla athei teh đak jăh pơm pơkĕh trong Trường Sơn Đông, trong gre dêh char 722 găn hloh tơring vă hơtŏk tơdrong chơ chuĕn, tĕch mơdro tơmam, tơmât jên man anih jang, kăl loi jĭ chô̆ tơlei unh điên 3 pha pơm ‘lơ̆ng ăn tơdrong choh jang xa păng arih xa, tưk tơiung tơdrong jang mŭk drăm, tơpôl… Bơngai tăh hla tơ̆ âu oei tơrek truh tơdrong vei lăng bri păng dôm tơdrong tơgŭm, gơ̆h xa yoa đơ̆ng bri vă pơm hơtŏk tơdrong arih xa … Bơngai tăh hla tơ̆ ou lăng kơjăp truh tơdrong jang vei lăng bri păng tơdrong tơgŭm djru đei iok yua sa hơpăh đơ̆ng bri vă pơm hơtŏk jang sa iŏk yua kơjăp păng hơrih sa sơđơ̆ng. Bơngai tăh hla tơbăt, trong jang kla ăn iok yua cham char bri hlôi tơlĕch jang kiơ̆ đơ̆ng lơ sơnăm ou, mă lei kơ yuơ lơ̆m tơring ou ưh kơ đei hnam kmăi đak tơlĕch ŭnh hơyuh kơna kon jên kon pơlei iŏk yua sa hơpăh đơ̆ng trong tơgŭm ou tŏ sĕt hloh pơtêng hăm tơring anai. Bơngai tăh hla pơlei Niêng Oanh, tơ̆ thôn 1, tơring Đưng K’Nớ athei, Teh đak kăl lăng hơlen vă đei tơdrong hơtŏ dih băl hloh dơ̆ng lơ̆m tơdrong kla ăn kon jên iŏk vei lăng bri, ăp lơ loh kon pơlei tơklep kơjăp hăm bri đei tơdrong hơrih sa sơđơ̆ng, jang sa sơđơ̆ng.“Tơdrong kla ăn kon jên iŏk yua cham char bri ‘noh tơring nhôn đei iŏk yua sa hơpăh lăp tŏ sĕt sot pơtêng hăm tơring anai. Lơ̆m mă noh, găh lơ kon pơlei tơ̆ ou jei gơnang lơ̆m tơdrong jang vei lăng bri kơna tơƀơ̆p tôch mơmat tat. Nhôn hơpơi ‘meh vă kăl hơmet ming kon jên kla ăn iŏk yua cham char bri ‘noh”.

Pơma tơ̆ jơ tơƀâp, Kơdră jang lơ̆m Hơnih tơm Chinh trĭ, Bí thư Trung ương Đảng, Kơdră chĕp kơ̆l Ban Nội chính Trung ương Phan Đình Trạc akhan, nơ̆r pơma đơ̆ng bơngai tăh hla tôch trŏ lăp. Khul tang măt Quốc hội dêh char Lâm Đồng vă athei dôm anih jang, khul grŭp đei ƀơm truh jăh sek tơlang, atŭm hăm ‘nŏh tơchĕng hơlen dơ̆ng dôm trong jang vă pơm ‘lơ̆ng ăn tơdrong arih xa kơjăp ‘lơ̆ng ăn kon pơlei arih gơnang đơ̆ng bri. “Tơring ayơ vei lăng bri hroong mă lei ưh kơ đei rim hnam kmăi đak tơlĕch ŭnh hơyuh, tơdrong đei iŏk yua tŏsĕt lei kon pơlei koh pơrrăm bri gô pơm hiong răm lơ hloh dăh mă hơtŏk kon jên iŏk yua sa hơpăh đơ̆ng tơdrong jang kla ăn kon jên iŏk yua cham char bri dă ƀiơ̆ hiong răm hloh? Tơdrong mă ou bơ̆n kăl đei trong pơtho tơbăt lơ liơ ‘noh tơchă đei rim ‘long pơgang chă pơtăm lơ̆m yơ̆p bri, vă kon pơlei vei lăng bri hroong, pơtăm răh koh iŏk tĕch mơdro ‘long pơgang vă tơdrong hơrih sa kơ kon pơlei sơđơ̆ng. Kiơ̆ kơ ĭnh lăp đei trong ‘nou mă kĕ vei lăng bri hroong păng pơm hơtŏk tơdrong jang sa iŏk yua kơjăp ăn kon pơlei”.

Tơ̆ jơ tơƀơ̆p pơma dơnuh hăm bơngai tăh hla tơring Ka Đơn, apung Đơn Dương, bơngai tăh hla pơma tơbăt jơhngơ̆m lăp đon, lui kơjăp păng hôn bơnê trong tơlĕch jang kiơ̆ tang găn sa pơgơ̆m pơjĭp, mă kăl kơrŭn đĭ ai lơ̆m jang kiơ̆ pơm kơtoei khul kơdră chĕp pơgơ̆r kơ Đảng, Teh đak. Bơngai tăh hla jei pơma tơƀôh hơdăh hăm Khul kơdră tang măt Kuô̆k hô̆i dêh char Lâm Đồng lơ tơdrong tim mă lăp lơ̆m jang kiơ̆ Khôi luơ̆t Groi teh, Khôi luơ̆t Hơp tak xah, tơdrong ăn mơng teh, tech teh, kơjă teh hăm rim hơnih ming man. Bơngai tăh hla hơnơ̆ng athei kăl lăng kơjăp tơmơ̆t jên jang, ming hơmet trong nơnăm chŭn mir, gơng, bơ̆ jang pơm hla bơar ‘lơ̆ng hơ iă, tơdrong jang kiơ̆ xut xa hnam pơgia, hnam hiăh hiok, tơgŭm ăn kon jên tŏk iok tơmơ̆t choh jang sa v.v… Mă kăl, bơngai tăh hla tơroi tơbăt mĭnh ƀar ‘nu kang ƀô̆ chă pơ koel, pơm hla bơar mơmat tat, ƀơk ăn hla bơar pơm tơm tơngla teh oei mơmat tat, pơm ăn kon pơlei chă năm pơm lơ ‘măng.

Kiơ̆ kơ ƀok Phan Đình Trạc,Kơdră chĕp pơgơ̆r Nội chính Trung ương, ‘nou jĭ dôm tơdrong kăl, đei ƀơm truh tơdrong jang sa păng hơrih sa kơ kon pơlei, kăl đei rim hơnih bơ̆ jang lăng ba kơjăp xek tơlang keh đang. Lơ̆m ou, tơdrong jou jang ưh kơ ‘lơ̆ng lơ̆m xek tơlang pơm hla bơar, tơdrong pơ koĕl kon pơlei, kăl dăr lăng hơdăh păng xek tơlang kơhret.“Pơm hla bơar tơ̆ hơnih jang mĭnh ‘măng ‘noh chă pơdreo hơlơ̆k hơle lơ ‘măng, đơ̆ng noh vei lăng ưh kơ hrep dôm hla bơar kon pơlei, ưh kơ tơroi ăn kon pơlei mă lei tơroi kiơ̆ bơngai pơm kơdranh. Lơ loh găh tơdrong bơ̆ jang gơh, bơ̆ jang tơnăp phăl hơlăng kơ kon pơlei ưh kơ ‘lơ̆ng, dăh mă găh rŏng đei tơdrong kơnê̆ ưh? Hrei ou, Tổng Bí thư Tô Lâm lơ ‘măng pơma hơdăh păng bơ̆n kơrŭn đĭ ai iung jang kơtang, bơ̆ jang ‘lơ̆ng kơ khul chĕp pơgơ̆r bơ̆ jang kơ teh đak, kơtoei, pơm hơtŏk ‘lơ̆ng khul kang ƀô̆, mă lei bơ̆n lê̆ đei lơlou ‘noh ưh trŏ ƀlep hăm trong tơlĕch jang ôh.Ĭnh athei bơ̆n kăl pơm hơdăh tơdrong ou, tơdăh đei tơdrong pơm glăi lei xek tơlang truh tơ̆p truh troch păng tơroi tơbăt ăn hloi bơngai tăh hla tơ̆ ou”.