Kơtơ̆ng ang đơ̆ng Hơnih tơm Ƀô̆ đô̆i, rim hơnih Ƀô̆ đô̆i đơ̆ng trung đoàn năm tơ̆ kơpal hlôi tơlĕch hloh 1.800 hơnih jang kơkuh chơt hơ iă tơbăt, kơjă kơjên hloh 260 ti hlak jên; dang ei hlôi jang keh đang hloh 1.400 hơnih jang păng hloh 400 hơnih jang tŏk bŏk oei jang. Rim hơnih bơ̆ jang, tơring iung jang hơdoi tơlĕch jang tơgŭm djru kon jên chă ming hơmet hơnih soi tơbeh (lơ̆m ŭnh hnam) ăn 32/34 ‘nu ƀô̆ đô̆i Khul Việt Nam pơrô̆ pơrôp pơm rơngei hiôk hian, hăm kon jên 2 ti 560 triu hlak jên. Dang ei hlôi  jang keh đang ăn 24 ŭnh hnam, pă 8 ŭnh hnam uơ oei gô iung jang keh đang hơdrol năr 22/12 sơnăm ou.

Pơđĭ khul ƀô̆ đô̆i tơlĕch jang tơgŭm djru kon jên hu, ming man hnam ‘mêm mơnat “Hnam tơgoăt tơgoăl", "Hnam bôl boăl”, xut xa hnam pơgia, hnăt hnot ... ăn kon pơlei rim tơring, truh dang ei tơlĕch jang hloh 24.900 pơbŭng hnam. Lơ̆m ou, et hơtŏk lơ̆m năr 22/12 ‘noh 15.600 pơbŭng hnam, hnam uơ oei pơkăp hơnơ̆ng tơlĕch jang lơ̆m sơnăm 2025, hăm akŏp kon jên ming man hloh 1.624 ti hlak jên. Thiếu tướng Đoàn Quang Hòa, Kơdră chĕp pơgơ̆r Hơnih bơ̆ jang Tơgŭm jru, Hơnih tơm jang Chinh trĭ Khul Ƀô̆ đô̆i kon pơlei Việt Nam tơbăt:“Hơdrô̆ tơgŭm ming man hnam oei tơgoăt tơgoăl, hnam bôl boăl kơ yuơ Hơnih tơm jang Chinh trĭ tơlĕch jang tơ̆ Định Hóa - Thái Nguyên khei 11/2023, hlôi đei 40 hơnih bơ̆ jang kơ khul ƀô̆ đô̆i hlôi pơkăp tơgŭm djru hlôi ming man đei 3.857 pơbŭng hnam hăm kon jên 242 ti 500 triu hlak jên. Lăp đơ̆ng rŏng pơm lêh tơlĕch jang, rim hơnih bơ̆ jang kơ khul ƀô̆ đô̆i hơnơ̆ng pơrô̆ pơrôp, krao hơvơn rim khul vang chă tơgŭm djru ăn rim bơngai tơnap tap găh hnam oei. Găh hnam tơgoăt tơgoăl, hnam bôl boăl hrei ou ‘noh 12.863 pơbŭng hnam, ‘noh jĭ ming man lơ hloh nơ̆r tơlĕch jang 4.863 pơbŭng hnam.”

Hơnih tơm Khul Ƀô̆ đô̆i jei hlôi pơrô̆ tơgŭm djru kon jên ăn Binh đoàn 15 tơ iung pơjing 4 tŏ rông ăn tơring hăm akŏp kon jên hloh 12 ti hlak jên. Quân khu 1 tơgŭm tơ iung pơjing tơring tơrang ‘nao tơ̆ tơring Tam Kim păng Hoa Thám, apung Nguyên Bình, dêh char Cao Bằng hăm kon jên tơmơ̆t jang hloh 70 ti hlak jên. Đại tá Nguyễn Xuân Thủy, Kơ iĕng Kơdră Hơnih jang pơtho pơrô̆ tơbăt dơ̆ng:“Hơnih tơm Ƀô̆ đô̆i tơgum djru tơ iung pơjing Hnam trương jăl kơđeh păng Hnam trương jăl ƀar Điện Biên tơ̆ tơring Thanh Xương, apŭng Điện Biên, dêh char Điện Biên hăm kon jên 120 ti hlak jên; tơgŭm djru 10 hơnih ming man ăn rim hơnih ƀô̆ đô̆i vang iung jang tơjur dơnuh kơjăp ‘lơ̆ng, tơ iung pơjing tơring tơrang ‘nao, ming man hơnih iok yua ăn kon pơlei đơ̆ng Hơnih mong jên kơ yuơ bơngai dơnuh hăm kon jên 23 ti 800 triu hlak jên”.

Hơmet ăn tơbăt 80 sơnăm năr pơjing Khul Ƀô̆ đô̆i kon pơlei Việt Nam, 35 sơnăm năr Đĭ đăng kon pơlei vang vei lăng Teh đak, khei năr ou ki, Ban Tuyên giáo Trung ương, Hơnih tơm Ƀô̆ đô̆i, Hơnih tơm jang vei lăng Kơtơ̆ng ang păng pơre nơ̆r iung jang hơdoi pơgơ̆r hop akŏm tơroi tơbăt ăn khul chih kơtơ̆ng ang tơroi tơbăt rim tơdrong jang ăn năr tơbăt.

Kiơ̆ kơ ‘noh, lơ tơdrong jang ‘lơ̆ng hơ iă nhen Hơnih tơm Chinh jĭ Khul Ƀô̆ đô̆i kon pơlei Việt Nam pơm tơm, iung jang hơdoi hăm Trung ương Đoàn Hơdruh tơdăm Cộng sản Hồ Chí Minh tơlĕch ‘Măng pơlong tơchă băt vao joăt joe “80 sơnăm Năr pơjing Khul Ƀô̆ đô̆i kon pơlei Việt Nam păng 35 sơnăm Năr lêh Đĭ đăng kon pơlei vang vei lăng Teh đak” đei lơ đoàn viên, hơdruh tơdăm vang iung jang. ‘măng pơlong chih lơ̆m teh đak “Tơdrong tơroi tơ̆ đăi đô̆i” păng pơlong video clip “bơngai ƀô̆ đô̆i ĭnh ‘mêm kơ eng”. ‘Măng pơgơ̆r Joh ayo kơdŏ soang găh tơdrong Đĭ đăng kon pơlei vang vei lăng teh đak păng pơgơ̆r pơlong joh ayŏ kơdŏ soang khul ƀô̆ đô̆i păng hơdruh tơdăm, sinh viên ‘măng mă 10. Quân ủy Trung ương, Hơnih tơm Ƀô̆ đô̆i hlôi pơrô̆ athei rim hơnih ƀô̆ đô̆i iung jang hơdoi ăn rim hơnih bơ̆ jang thống tân, hơnih jang chih kơtơ̆ng ang Trung ương păng tơring atŏk kơtang pơrô̆ tơbăt găh tơdrong jang vei lăng teh đak, vei lăng sơlam teh đak, pơrô̆ tơbăt găh Khul ƀô̆ đô̆i; iung jang kiơ̆ ‘măng pơting dih băl kăl hloh “Hưch hanh hơmanh bơnê-Chih dơ̆ng dôm tơdrong jơnei-Tơgăl hăm hơnăn Ƀô̆ đô̆i Ƀok Hô”.

Mă kăl ƀlep lơ̆m jơ ‘năr tơbăt, Hơnih tơm Ƀô̆ đô̆i pơgơ̆r Pơdă vei lăng sơlam teh đak apŭng plĕnh teh Việt Nam ‘măng mă 2 tơ̆ cham gre păr Gia Lâm, pơlei tơm Hà Nội gô vă pơgơ̆r đơ̆ng năr 19-22/12, hăm pơdă lơ hloh dơ̆ng pơtêng hăm ‘măng mă blŭng. Pơm lêh tơbăt 80 sơnăm Năr pơjing Khul Ƀô̆ đô̆i kon pơlei Việt Nam păng Nar lêh đĭ đăng kon pơlei vang vei lăng teh đak gô đei pơgơ̆r gĭt kăl lơ̆m pơgê năr 20-12-2024 tơ̆ Hnam hop akŏm tơm Teh đak.