Pơma pơtơm Hop akŏm, Kơdră kuôk hô̆i Trần Thanh Mẫn ră hơdah, âu jĭ tơdrong hop akŏm kăp gĭt hloh, kơyuơ Đảng uy Kuôk hô̆i păng Đảng uy Jơnŭm pơgơ̆r teh đak pơgơ̆r vă hơlen dôm tơdrong jang đei tơrĕk truh hơmet ăn 'măng hop akŏm ưh đei pơkăp mă 9, Kuôk hô̆i jăl 15 (pơgơ̆r đơ̆ng năr 12 truh năr 18/2/2025).

Kơdră Kuôk hô̆i ră hơdah, Hop akŏm đei pơgơ̆r lơ̆m khei năr Trung ương păng tơring tŏk bŏk oei tơlĕch hơkŏp Tơchơ̆t 18 gah jơnŭm pơgơ̆r jang đơ̆ng Trung ương truh tơ̆ tơring; lơ̆m khei năr hmach kơ kuh kơ Đảng, sô̆ Puih mak Ất Tỵ 2025, Tơbăt 95 sơnăm năr tơ-iung pơjing Đảng cộng sản Việt Nam. Kiơ̆ kơ noh, lơ anih jang kơ Jơnŭm pơgơ̆r teh đak, Kuôk hô̆i hlôi hơdrin măng năr, pơđĭ hăm 'năr tơdrou păng 'năr tơpơh hloi hăm tơnăp sơnong jang, jang kơjăp vă pơm kiơ̆ dôm sơnong jang đei pơjao.

Kơdră Kuôk hô̆i ăn tơbăt, Anih jang kơ Kuôk hô̆i adoi hop akŏm tơgop nơ̆r gah Luơ̆t pơgơ̆r jang kơ Jơnŭm pơgơ̆r teh đak (hơmet tơplih), Luơ̆t Pơgơ̆r jang kơ Jơnŭm pơgơ̆r tơring (hơmet tơplih) păng hơmet tơbang dôm tơchơ̆t lơ̆m 'Măng hop akŏm ưh đei kiơ̆ pơkăp mă  9. Dôm tơdrong âu Anih jang kơ Kuôk hô̆i drơ̆ng nơ̆r kơjung. Kơdră Kuôk hô̆i Trần Thanh Mẫn ră hơdah: “Kiơ̆ pơkăp bơ̆n athei pơtoi tơplih 'nao đon tơchĕng, trong pơm jang, akŏm tơnăp ăn tơdrong hơtŏk tơ-iung kơ teh đak; atŭm hăm noh iŏk jang kiơ̆ tơdrong hlôh vao, sơnong jang tơnăp, trong jang đơ̆ng dôm 'măng hop akŏm tơjê̆ âu, mă hăt noh dôm 'măng hop akŏm mă 7, mă 8 kơ Kuôk hô̆i jăl 15. Khei năr âu ki, 2 pah hlôi jang hadoi kơjăp 'lơ̆ng, dang ei bơ̆n athei jang hadoi kơjăp 'lơ̆ng hloh dơ̆ng; tơpăt, tơnăp hăm sơnong jang kơyuơ tơdrong hơtŏk tơ-iung kơ teh đak. Hăm tơdrong pơgơ̆r jang đơ̆ng Ƀan châ̆p hanh Trung ương, Anih tơm Chĭn trĭ, Ƀan ƀĭ thư păng Tổng bí thư Tô Lâm hlôi lơ ‘măng akhan, tơdrong jang hadoi đơ̆ng Jơnŭm pơgơ̆r teh đak păng Kuôk hô̆i athei pơjing đei tơdrong drơ̆ng minh vă pơklaih dôm tơdrong tơhlăk tăk, tơnap tap lơ̆m hơtŏk mŭk drăm – tơpôl, vei sơđơ̆ng tơpôl teh đak păng pơjing tơdrong jang chĭnh trĭ sơđơ̆ng”.

Kơdră Kuôk hô̆i tơroi, dôm tơdrong Hop akŏm ưh đei pơkăp ‘măng mă 9, jô̆ truh khei năr âu, 2 pah hlôi drơ̆ng nơ̆r dôm tơdrong nhen: hơlen lăng 4 lươ̆t; 5 tơchơ̆t ‘măn ăn tơdrong pơkăp bot ‘lơ̆ng jơnŭm pơgơ̆r jang kơ dôm anih jang, pơgơ̆r jang chĭnh trĭ; hơlen pơkăp 4 tơdrong nai kiơ̆ sơnong pơgơ̆r kơ po, lơ̆m noh đei tơdrong asong bơngai jang, atŭm hăm noh đei chih hla bar pơtruh ăn Kuôk hô̆i kiơ̆ nhen tơchơ̆t tơlĕch.

Pơma ah hop akŏm, Thủ tướng teh đak bơ̆n Phạm Minh Chính bơnê kơ tơdrong jang hadoi kơjăp đơ̆ng Kuôk hô̆i, abih jang kơ Kuôk hô̆i, rim ƀok kơdră kơ Kuôk hô̆i, Kơdră kơ dôm anih jang kơ Kuôk hô̆i hăm Jơnŭm pơgơ̆r the đak; roi năr roi đei tơdrong lui ngeh, jang hadoi kơjăp, đei jơnei hăm dih băl vă pơm jang đei lơ tơdrong jang tih; mă kăl pơm kiơ̆ kơjăp păng đei jơnei dôm tơchơ̆t đơ̆ng Đảng păng teh đak lơ̆m tơdrong jang kơ Kuôk hô̆i adoi nhen kơ jơnŭm pơgơ̆r teh đak.

Thủ tướng Phạm Minh Chính sơkơ̆t hơdah, tơchơ̆t tơlĕch đơ̆ng Ƀan châ̆p hanh Trung ương, Anih tơm Chĭnh trĭ, Ƀan ƀĭ thư, pơgơ̆r jang đơ̆ng Tổng bí thư Tô Lâm 2 pah jang hadoi kơjăp, jang đei lơ tơdrong lơ̆m tŏ sĕt khei năr, đei jơnei mă lei kơjăp gah hla bar tơchơ̆t: “Bơ̆n pơgơ̆r hop akŏm tơ̆ ‘Măng hop akŏm ưh đei pơkăp mă 9, tơƀôh tơdrong pơm jang tơnăp, đei tơdrong noh athei sek tơlang hloi. Mă hlôi jang, sek tơlang athei mă truh tôch, đei jơnei. Hơlen lăng dơčng dôm ‘măng hop akŏm ưh đei pơkăp trŏ ƀlep hăm tơdrong hơrih, sek tơlang đei dôm tơdrong hơpơi ‘meh đơ̆ng kon pơlei. Tơchơ̆t 'măng mă âu đơ̆ng Đảng tơlĕch, bơ̆n athei pơm bot 'lơ̆ng jơnŭm pơgơ̆r jang kiơ̆ Tơchơ̆t 18, âu jĭ minh tơdrong jang kăch mang gah jơnŭm pơgơ̆r. Jơnŭm pơgơ̆r jang bot 'lơ̆ng, bơngai jang hơgei hloh. Ah mă bơ̆n tơlĕch tơchơ̆t âu, pơm kiơ̆ Tơchơ̆t đơ̆ng Trung ương đơ̆ng Anih tơm Chĭnh trĭ, dôm tơdrong sơkơ̆t đơ̆ng Đảng noh gô tơhlăk truh dôm tơchơ̆t đơ̆ng khôi luơ̆t mă hlôi pơkăp kiơ̆ tơdrong so. Tơchơ̆t đơ̆ng Trung ương, Anih tơm Chĭnh trĭ noh tơhlăk tơ̆ yơ hơmet tơ̆ noh, tơhlăk ah jăl jang ayơ, jăl mă noh athei hơmet pơ-'lơ̆ng”.

Ră hơdah 'Măng hop akŏm ưh đei pơkăp mă 9 đei tơdrong kăp gĭt, tơnap mă lei kơyuơ tơdrong hơtŏk tơ-iung kơ teh đak, Kơdră Kuôk hô̆i Trần Thanh Mẫn pơgơ̆r dôm pah đei tơrĕk athei pơtoi akŏm tơnăp, jang hadoi kơjăp, tenh kuăng keh đang tơdrong hơmet tôm tong pơtruh ăn Kuôk hô̆i adoi nhen vei sơđơ̆ng kơjăp, tơgop jơnei keh kong kơ 'Măng hop akŏm.