Đơ̆ng dôm năr blŭng kơ khei 7 tơ̆ phường Xuân Hương - Đà Lạt, dêh char Lâm Đồng, sơnăm mơlôh tơ̆ tơring pơgơ̆r đei lơ tơdrong jang “Tơgŭm ăn bơngai đei kŏng”, năm ngôi, pơlung unh hnam đei kŏng; puih hơmet râm rek, sŏh hlôt nhang tơ̆ pơsat linh lôch tang ăn teh đak. Mŏ Nguyễn Thị Thúy, Bí thư Chi đoàn Kueng kơphô̆ 9, ăn tơbăt, ‘nâu ưh kơsĭ tơdrong jang vă tơƀôh jơhngâm đon băt bơnê đĕch mă oei jing tơdrong pơtho pơhrăm tôch ‘lơ̆ng găh jơhngâm đon ‘mêm kơ teh đak păng hơnăp jang đơ̆ng chăl mơlôh hrei ‘nâu:

“Nhôn jang hơdoi hăm Khul pơgơ̆r Kueng kơphô̆ păng phường năm ngôi tơ̆ dôm unh hnam đei kŏng tơ̆ tơring vă tơgŭm ăn đe bôl boăl druh dăm gơ̆h tơƀôh jơhngâm đon ‘mêm bơnê truh chăl đe ƀok, đe ƀă hơdrol. ‘Ngoiăh kơ dôm tơdrong jang ‘nŏh nhôn oei pơgơ̆r puih hơmet, sŏh plang nhang tơ̆ pơsat linh hai. Dôm ‘măng thoi âu lơ̆m rim sơnăm jĭ tơdrong tôch ‘lơ̆ng vă nhôn pơtho tơƀôh jơhngâm đon ‘mêm kơ teh đak păng đon jang tơnăp ăn đe bôl boăl đoàn viên, druh dăm tơ̆ tơring nhôn”.

Tơƀôh jơhngâm đon ‘mêm pơnach, hmach bơnê kơ chă adrol yoa tơdrong tơblăh iŏk rơngei ăn hơdrĕch hơdrung, vei lăng Teh đak păng tơiung pơjing teh đak hrĕi ‘nâu, lơ̆m dôm năr ‘nâu Đoàn phường Xuân Hương - Đà Lạt akŏm bơ̆jang lơ tơdrong tôch đei yoa, tưk tơiung jơhngâm đon “Nhă đak ƀlŏk kơtu”. Bí thư Đoàn phường Thái Thị Thu Thắm, ăn tơbăt, dôm tơdrong jang đei bơ̆ jang tơnăp ‘lơ̆ng đơ̆ng 106 chi đoàn hăm hlŏh 5.000 ‘nu đoàn viên druh dăm:

“Ƀlep ƀât 78 sơnăm năr Linh jĭ rơka-Linh lôch tang ăn teh đak, đĭ đăng chi đoàn ‘nao âu vang bơ̆ jang lơ tơdrong, nhen hơmet rơgŏh cham char, sut hơmet pơsat linh lôch tang ăn teh đak; pơgơ̆r năm ngôi hăm dôm unh hnam bơngai đei kŏng tơ̆ phường. Găh noh dơ̆ng, khul đoàn viên, druh dăm oei tơgŭm ăn unh hnam đei kŏng, kŭm nhen vang pơtho tơƀôh trong pơm hla ar ăn dôm unh hnam đei kŏng hai”.

Dôm tơdrong jang tôch đei yoa đơ̆ng sơnăm mơlôh Đoàn phường Xuân Hương - Đà Lạt pơma hơdrô̆ păng sơnăm mơlôh dêh char Lâm Đồng pơma atŭm lơ̆m dôm năr khei 7 hơnhăk ba lơ tơdrong hơiă ăn đe linh so, linh jĭ rơka, linh jĭ jăn, dôm bơngai hlôi ‘măn đĭ chăl druh dăm ăn tơdrong rơngei hiôk hian kơ teh đak.

Ƀok Phan Xuân Khanh, 74 sơnăm, linh jĭ rơka 3/4, pơma: “Nhôn đĭ kră bơih, đĭ pơdơ̆h hưu bơih mă lei hơnơ̆ng mưh truh ‘năr 27/7 ‘nŏh lơ̆m jơhngâm oei tôch hơiă yoa năr ‘nâu jĭ năr jơ̆p tơring lơ̆m teh đak ƀlŏk truh, tơƀôh jơhngâm đon bơnê kơ dôm bơngai chu lôch hŭt hơkâu yoa teh đak. Gơ̆h đei năr ‘nâu ‘nŏh gơnơm đơ̆ng tơdrong lôch tang, hŭt plang sĕch kar đơ̆ng đe linh, dôm unh hnam hŭt hơkâu yao tơdrong rơngei hiôk hian kơ teh đak”.

Dêh char Lâm Đồng đei hlŏh 21.000 ‘nu linh lôch tang ăn teh đak, hlŏh 11.000 ‘nu linh jĭ rơka, 2.460 ‘nu Mĕ Việt Nam nuih mơng (dang ei oei đei 17 ‘nu mĕ oei arih) kŭm hăm dôm jĭt rơbâu ‘nu bơngai đei kŏng hăm kăch mang.

Tơƀôh jơhngâm ‘mêm bơnê kơ jơhnơr arih, ƀok Y Thanh Hà Niê Kđăm, Kơdră jang Trung ương Đảng, Bí thư Đảng dêh char, Kơdră chĕp kơ̆l Khul tang măt Quốc hội jăl XV kơ dêh char Lâm Đồng pơma hơdăh, vă hơnơ̆ng vei lăng năng tông ‘lơ̆ng hlŏh dơ̆ng ăn dôm unh hnam đei kŏng:

“Nhôn băt, dôm tơdrong jang đei oei tam mă tơgăl hăm dôm tơdrong hiong răm, chu hŭt hơkâu tih tên đơ̆ng đe linh păng unh hnam đei kŏng. Yoa thoi noh, tơ̆ hơnăp kơnh, Đảng ƀô̆, Khul kơdră pơgơ̆r păng kon pơlei lơ̆m dêh char vă hơnơ̆ng adrin hlŏh dơ̆ng vă pơm hơtŏk tơdrong arih xa găh tơmam drăm, jơhngâm đon ăn bơngai đei kŏng, ưh đei hŭt hơchăng bu lơ̆m tơdrong tơiung pơjing păng jang tŏk dêh char”.

Tơdrong ƀlŏk hơdơ̆r, tơgŭm ăn dôm unh hnam đei kŏng, kơtum kơtŏng ‘nhŏng oh linh lôch tang ăn teh đak, bơngai đei kŏng hăm kăch mang lơ̆m dôm năr khei 7 tơ̆ dêh char Lâm Đồng ưh lăp jơnăr vă ƀlŏk hơdơ̆r đĕch mă oei jing jơnăr vă tơiung jơhngâm đon rim bơngai tơ̆ tơring, mă loi jĭ đe druh dăm hơtŏk jơhngâm 'mêm kơ teh đak, hưch hanh kơ hơdrĕch hơdrung đơ̆ng noh arih xa roi ‘lơ̆ng, roi đei yoa. Dôm tơdrong tơgŭm tôch đei yoa, hue lăng truh lơ “anih ƀrê”, nhen tơgŭm hnam oei, vei lăng jơhngâm pran, chă tơdrong jang, tơgŭm lơ̆m tơdrong arih xa ăn dôm unh hnam đei kŏng, kơtum kơtŏng ‘nhŏng oh linh lôch tang teh đak, bơngai đei kŏng hăm kăch mang tơ̆ Lâm Đồng oei tơgop vei kơjăp păng tơtrơp dơ̆ng tơdrong juăt ‘lơ̆ng “Tơgŭm ăn bơngai đei kŏng”, “Nhă đak ƀlŏk kơtu” đơ̆ng hơdrĕch hơdrung bơ̆n.