Lơ̆m tơdrong jang đơ̆ng Anih tơm vei lăng Công an, Công an apŭng Ea H’leo đei pơjao man 86 tŏ hnam ăn bơngai pơmat tat. Kiơ̆ Thượng tá Phùng Minh Trí – Yŏng Công an apŭng Ea H’leo đơ̆ng rŏng iŏk đei nơ̆r pơtyho đơ̆ng kơpal, khei 3/2024, anih jang kơchăng roi tơƀôh ăn Anih vei lăng kon pơlei apŭng Ea H’leo pơjing Anih pơgơ̆r jang tơdrong ‘nâu; jang hơdoi hăm dôm lăm, khul grŭp đei ƀơm truh, Anih vei lăng kon pơlei dôm xăh, thĭ trơ̆n hơlen năng, chă rơih bơngai đei xa yoa.

Mưh bơ̆ jang ming man, công an apŭng ăn khul jang, mă loi jĭ đe druh dăm lơ̆m khul linh jur tơgŭm năr jang man hnam ăn kon pơlei... Hăm lơ tơdrong adrin tôch pơnĕh, lăp đơ̆ng rŏng vă jê̆ 2 khei, apŭng Ea H’leo hlôi man đang 86 tŏ hnam, pơjao ăn dôm unh hnam, jang đang adrol hlŏh năr hơgăt truh 4 khei.

Thượng tá Phùng Minh Trí pơma: “Đơ̆ng rŏng vă jê̆ 2 khei bơ̆ jang, hnam mă 86 (vă akhan hnam mă hơtuch lơ̆m tơdrong jang tơ̆ apŭng) đei man đang. ‘Nâu jĭ tơdrong jang tôch gĭt kăl, tôch ‘lơ̆ng păng đei yoa, vă vei lăng ‘lơ̆ng tơdrong arih xa tơpôl tơ̆ apŭng, tơgŭm ăn kon pơlei đei anih oei xa sơđơ̆ng ‘lơ̆ng păng hơđơ̆ng jơhngâm choh jang xa.”

 Tơ̆ apŭng Cư Kuin tơdrong jang man hnam tơgŭm ăn bơngai pơmat tat kŭm đei bơ̆ jang hrĕnh mă đơ̆ng tơƀâp lơ pơmat tat ră. Kiơ̆ Thượng tá Nguyễn Cao Quyết – Yŏng Công an apŭng, đei lơ unh hnam đei xa yoa mă lei teh vă pơm hnam ‘nŏh tam mă đei chĕng hơmet, tam mă tơplih ming tơdrong yoa teh, teh ưh đei hla ar. 1 kơsô̆ unh hnam ưh đei chĕp vei hla ar chioh tơbăt unh hnam tơnuh, vă jê̆ tơnuh. Kŭm hăm ‘nŏh jĭ tơdrong anih tơgŭm ưh đei gơih jên man trŏ khei ‘năr.

Vă sek tơlang dôm tơdrong pơmat tat, tơhlăk tăk, công an apŭng jang hơdoi hăm dôm anih jang, khul grŭp; Anih vei lăng kon pơlei dôm xăh, jăh pơm pơkĕh dôm hla ar tơgŭm ăn kon pơlei; krao hơvơn anih tĕch mơdro tơ̆ tơring “tơlĕch jên hơdrol” vă răt tơmam ming man. Hăm tơdrong tơgŭm đơ̆ng dôm khul grŭp đei ƀơm truh, dôm tơdrong pơmat tat tơhlăk tăk hlôi đei hơmet ming.

Thượng tá Nguyễn Cao Quyết ăn tơbăt: “’Ngoăih kơ jên đơ̆ng Anih tơm vei lăng công an păng dôm dêh char tơgŭm, công an apŭng kŭm mong akŏm jên tơgop nai hai đơ̆ng dôm bơngai đei jơhngâm đon ‘lơ̆ng vă tơgŭm ăn kon pơlei. Bơngai jang ‘nŏh krao akŏm đơ̆ng dôm khul linh, công an dôm xăh vang man hnam ăn kon pơlei. Tơdrong hơgăt mưh man hnam ‘nŏh hnam kơjăp, ‘lơ̆ng, đei yoa đunh đai.”

Đắk Lắk jĭ dêh char groi kông đei dang 2 triu ‘nu kon pơlei, kơsô̆ unh hnam tơnuh dang 8%. Vang tơgop sut pơđĭ hnam hiăh hiok, Anih tơm vei lăng Công an tơlĕch tơdrong jang man 1.200 tŏ hnam ăn dôm unh hnam tơnuh, pơmat tat, kon pơlei kon kông, unh hnam đei kŏng tơ̆ Đắk Lắk păng pơjao ăn Công an dêh char pơgơ̆r jang. Hăm đon jang tơnăp păng đon adrin đơ̆ng công an Đắk Lắk păng khul kơdră pơgơ̆r tơring, 1.200 tŏ hnam hlôi đei man đang ƀât hơtuch khei 7/2024, jang đang hrôih ƀiơ̆ khei ‘năr hơgăt 3 khei, hơnhăk ba tơdrong chơt hơiă ăn dôm unh hnam đei xa yoa.

‘Nhŏng Y Thon Niê (bơngai Rađe) tơ̆ plei Ma Sút, xăh Krông Jing, apŭng M’Drak tơroi truh jơhngâm đon chơt hơiă mưh đei tŏk oei tơ̆ hnam hnam ‘nao: “Hnam tơ̆r so sŏch xă lăp 20m2, ‘mi ‘nŏh hnăt jơ̆p hnam, pơyan phang ‘nŏh ‘mui ƀruih, tôch tŏ hang. Đei Anih tơm vei lăng Công an hơpăh ăn hnam unh hnam nhôn čhôk ‘nă dêh, dang ei ưh pă đei hli ‘mi hnăt, tŏ hang kiơ bơih. Klo kăn măr nhi hơđơ̆ng jơhngâm arih xa, adrin jang, chă jên rong kon hŏk. Bơnê kơ Anih tơm vei lăng Công an păng dôm anih jang kơpal.”  

Kiơ̆ Đại tướng Lương Tam Quang – Kơdră tơm vei lăng Công an, 1.200 tŏ hnam man ăn unh hnam pơmat tat tơ̆ Đắk Lắk đei man kĕh hrôih ƀiơ̆ tơƀôh hơdăh đon jang tơnăp đơ̆ng khul linh công an, dôm anih jang kơpal tơ̆ tơring lơ̆m dêh char Đắk Lắk; tơdrong vang tơgŭm đơ̆ng lơ anih tĕch mơdro mưh bơ̆ jang tơdrong tơgŭm vei sơđơ̆ng tơdrong arih xa tơpôl. Kơdră tơm vei lăng Công an pơma hơdăh, Anih tơm vei lăng Công an vă hơnơ̆ng năm hơdrol mưh bơ̆ jang tơdrong jang “Jơ̆p tơring lơ̆m teh đak vang sut pơđĭ hnam hiăh hiok”, vă ưh đei hŭt hơchăng bu tơ̆ rŏng:

“Hơnơ̆ng bơ̆jang kiơ̆ nơ̆r pơtho đơ̆ng Tổng Bí thư Tô Lâm, Anih tơm vei lăng Công an vă năm hơdrol, jang ‘lơ̆ng tơdrong pơjei băl: “Jơ̆p tơring lơ̆m teh đak vang sut pơđĭ hnam hiăh hiok”. Đơ̆ng dang ei truh sơnăm 2025, tơgop ‘lơ̆ng ăn đon pơhnŏng sut pơđĭ 153.000 tŏ hnam hiăh hiok lơ̆m teh đak, mă loi ‘nŏh tơ̆ dôm tơring hơtăih yăih, tơ̆ dôm tơring gĭt kăl găh tơdrong sơđơ̆ng, lơ̆m noh đei tơring Tây Nguyên.”./.