Nhen hmă hmă, mưh truh drung kơsơ̆, bri kông hlôi jing rơheng kơkot, thôn trơng Pùng, tơring Quang Chiểu, apŭng Mường lát, dêh char Thanh Hóa  - ‘nhŏng Lò Văn Hợp plôih kmăi pơma lơ̆m ăl loa krao hơvơn kon pơlei năm hŏk.“ ‘Moi kiơ̆ lăm hŏk oei đei chă pơtho khan ăn kon pơlei: mă blŭng ‘noh sơnăm ‘lŏ kră, mă ƀar ‘noh jơ ‘năr hrei ou jing jơ ‘năr 4.0 bơih, ‘nŏh chă iŏk yoa điên thoăi ‘noh, năm tơ̆ yơ jei kăl băt kơ chih, băt chă đŏk, truh hloi yak tơ̆ trong, năm tơ̆ tơpôl  kăl băt chă chih chư kơna kon pơlei chhôk ‘nă vang năm hŏk”.

         Hloh 7 jơ gơmăng, mă lei lăm hŏk đĭ ƀĕnh bơngai. Mŏ Ngân Thị Hướng, mĭnh ‘nu bơngai hŏk tơbăt, tơdrong jang kơ mŏ ‘noh vei lăng mĭnh hơnih tech mơdro tơmam drăm, kơ yuơ ưh kơ băt kơchư kơna tơƀơ̆p tôch mơmat tat. Vang năm hok pơhrăm ou mŏ pơ prŏ ăn kơ dih hơdrin băt chă chih chư:“ Sơ̆ ‘noh ba vei oh vă mĕ ƀă năm jang kơna hŭt hŏk, ‘nao hok lăm 1 đĕch. Hơpơi ‘meh vă băt chih đŏk mĭnh ƀar chư mưh chă năm đe pơkong ‘noh ba băt chih hơnăn. Chă đŏk tim mă hơđăl ‘noh ƀok thây kô hiơ hiĕk, ba jei hiơ hiĕk kiơ̆”.

     Sơnăm ou hlôi 56 sơnăm, jĭ mĭnh lơ̆m dôm bơngai sơnăm ‘lŏ kră hloh lơ̆m lăm, ‘nhŏng Vi Văn Nấm oei tơnăp năm hŏk, hơngŭr chă pơhrăm đŏk, chih chư. Kiơ̆ đơ̆ng ‘nhŏng Nấm, lơ̆m oei ‘lơ̆p, kơ yuơ unh hnam mơmat tat, adoi đei oh lơ dơ̆ng kơna măh oei tơ̆ hnam vă pơngôi oh lê̆ mĕ năm jang, ưh kơ gơ̆h vă năm hŏk. Truh dang ei mưh kon hơ ‘lơ̆p đĭ ‘lŏ, đĭ kĕ jang, hơrih sa sơđơ̆ng ‘noh chă athei ƀa hơdrin năm hŏk pơhrăm, ƀôh lơ loh kơna ‘nhŏng jei chhôk ‘nă vang năm hok pơhrăm hơmŏ hơmăi tơgoăt đei chư ƀô̆ đô̆i ba ăn:“Dang ei jei tim mă gan sơđơ̆ng, mă lei jei lăp măh tăh sa mơ̆n. Đe kon hơ ‘lơ̆p jei hơnơ̆ng athei ƀă năm hŏk, hnam tơjê̆ nĕ, mĕ sou pơma lơ loh, athei bơ̆n ưh kơ băt chă dŏk, ưh kơ băt chă chih ‘noh năm hŏk, ‘nĕ kơdơ̆ yă kiơ ôh, năm hŏk hơdoi hăm đe mih ma duch nă, ‘nhŏng oh vă kơ chơt, vă băt chă dŏk, băt chih chư”

        Tơdrong kăl hloh ‘noh, bơngai hŏk lơ̆m lăm jei sơnăm ‘lŏ kră ngăl, jơhngơ̆m đon pă gan koăt ƀônh, kơna tơdrong chă hŏk jei tôch mơmat tat, chă jô̆ hơlen ou to jei ưh kơ hơbĕch hơbal. Mă lei bu bu jei hưch hanh, chơt hơ iă mưh rim ƀok thây chă pơtho phăl hơlăng, hơnơ̆ng chă pơhrăm ăn truh dang yơ gơ̆h chă chih ‘noh mă pơdơ̆h. Lăp đơ̆ng rŏng jơ hŏk, ƀơ̆t jơ pơdơ̆h, rim bơngai hŏk chă pơhrăm pơma dơnuh dih băl, nơ̆r pơma hiơ hiĕk ‘ngiơ ‘ngiơ̆r ‘ngiơ ‘ngiăr, pơm ăn tơdrong gleh lap đơ̆ng chă jang sa păr hiong đĭ đăng. Ƀok thây Hà Công Thuyên, bơngai lơ̆m Khul mơlôh hŏk jrŭ năm bơ̆ jang găh - Đoàn Quốc phòng kơsô̆ 5 tơbăt, băt hlôh ƀôh hơdăh tơdrong mơmat tat, kơƀăh kơƀôch kơ đe kră mă lei oei hơdrin năm truh lơ̆m lăm năm tơchă chư, kơna ‘nhŏng ưh kơ ‘nhoen mơmat tat, gleh hrat, yak truh lơ̆m lăm mă đơ̆ng jơ ‘năr prăng dăh mă ‘mi hngach.“Ƀôh đe mih ma duch nă chă hŏk, sơnăm ‘nglŏ kră ră bơih mă oei hơnơ̆ng chă đŏk mĭnh chư a, chư ê, ƀôh lơ loh ba măh ƀrơ̆k mơnat tơpă mơ̆n kơ yuơ ƀôh đe mih ma duch nă druh kiơ̆ pă tom lơ lou. Pơlei pơla ‘noh roi năr roi atŏk tơ iung, hăm hơnăp jang kơtang hloh, hơdrin pơm lơ liơ vă đe mih ma duch nă băt đŏk, băt chă chih chư”.

        Rim lăm hŏk xut xa ưh kơ băt kơchư hmă hmă tơ̆ dôm pơlei pơla hơtăih yăih, adoi pơtho hŏk tơ̆ gơmăng dơ̆ng kơna tơdrong chă yak năm tôch mơmat tat, mă kăl lơ̆m dôm ‘năr ‘mi trong tơsĕr, tơdrong teh tơdrŭt hơlih ling lang prăn răp đơ̆ng rim kông nak. Trung tá Vũ Văn Quang - Kơdră chĕp pơgơ̆r Khul choh jang sa 2 găh Đoàn Quốc phòng 5 tơbăt, đei jơ ‘năr kang ƀô̆, ƀô̆ đô̆i, đô̆i viên sơnăm mơlôh hŏk jrŭ măh “oei kơtă lơ̆m pơlei” lơ khei hloi vă pơtho xut xa ưh kơ băt kơchư tơ̆ pơlei bản Ón, tơring Tam Chung, kang ƀô̆, ƀô̆ đô̆i măh oei kơtă lơ̆m pơlei, mơng hnam kon pơlei vă oei sa, pơtho hŏk ăn kon pơlei lơ̆m 3 khei.

        Mường Lát ‘noh apŭng sơlam teh đak hơtăih yăih kơ dêh char Thanh Hoá. Tơdrong hơrih sa kơ kon pơlei rim hơdrung tơ̆ ou oei mơmat tat tôch kơ dêh, măt bơngai ưh kơ băt kơchư tôch kơ lơ, mă kăl ‘noh dôm bơngai sơnăm ‘lŏ kră sơ̆ ưh kơ đei năm tơ̆ hnam trương dăh mă vih hơlơ̆k ưh kơbăt kơchư dơ̆ng. Đơ̆ng tơdrong ƀôh yan ou ‘nou, lơ̆m dôm sơnăm ou ki, Ƀô̆ đô̆i vei lăng Sơlam teh đak Thanh Hoá păng Đoàn Quốc phòng 5 hlôi vang iung jang hơdoi hăm lơ tơring tơ̆ hơnih oei vă pơgơ̆r rim lăm hŏk xut xa ưh kơ băt kơchư, tơgŭm ăn kon pơlei băt chư vă tơgŭm ăn tơdrong hơrih sa kơ ‘năr.