VOV4.Bahnar - Vă kon pơlei hlôh vao tro\ [lep găh tơdrong jang vei bri, atu\m jơhngơ\m hăm khul vei hơlen păng hơto\k bri đei jơnei kơjăp, khei năr âu ki, rim anih jang tơ\ dêh char Kon Tum hlôi jang lơ tơdrong jang pơtho hơvơn hơto\k hlôh vao ăn kon pơlei.

 Anih jang hơlen bri apu\ng Ngọc Hồi đei je# 1.000ha bri đei io\k jên klă vei hơlen bri. Anih jang hlôi pơjao hơgăt bri âu ăn 124 unh hnam kon pơlei tơ\ 7 pơlei kơ 3 xăh vei hơlen noh: Đak Ang, Đak Nông păng Đak Dục. Vă mih ma duch nă tơpă tơguăt hăm bri, đơ\ng noh vei bri gơh tơnăp hloh, Anih jang hơlen bri apu\ng Ngọc Hồi xơkơ\t athei hơto\k tơdrong hlôh vao ăn kon pơlei băt găh bri. {ok Võ Thanh Thành, Kơdră anih jang hơlen bri apu\ng Ngọc Hồi ăn tơbăt:“Vă hơto\k hlôh vao ăn kon pơlei găh tơdrong kăp g^t đơ\ng bri, athei pơtru\t kơtang tơdrong pơtho hơvơn lơ\m rađiô aloa rapor. Anih jang hơlen bri lơ\m tơring jang tơnăp hăm xăh vă dru\t kơtang tơdrong hơvơn kơtă truh hăm kon pơlei. Mă 2 dơ\ng noh kiơ\ đơ\ng dôm tơdrong hop ako\m găh tơdrong jang vei lăng bri lơ\m tơring”

Đunh kơ âu to\ xe\t năr, hơgăt bri tơ\ Anih vei hơlen bri hmo\ Đak Ang, tơ\ apu\ng Ngọc Hồi, xơ\ jing anih hơnơ\ng kơ đei đe tơtông ‘long bri, phă bri pơm mir, tơjră hăm bơngai jang. Hơdăh noh ah khei 2/2012, ‘nho\ng Hồ Thanh Vương, jang lơ\m Anih hơlen bri [ơm đe teh rơka ăl. Khei 3/2013 Anih hơlen bri tơ\ xăh  Đak Ang tro\ khul tơtông bri xoh pơđ^. Xơkơ\t mưh kon pơlei ưh kơ drơ\ng kiơ\ noh jang tôm tơdrong mă lei bri adoi oei hiong, Jơnu\m jang hơlen bri hmo\ Đak Ang hlôi pơjao bri ăn kon pơlei vei hơlen, atu\m hăm noh ako\m axong chă pơtho hơvơn vei bri. {ok Vũ Đình Chi, Kơdră Anih vei bri hmo\ Đak Ang ăn tơbăt, rơih trong hơvơn [ônh hlôh vao, [ônh băt, đak ruih đunh noh hram mơ\n, tơdrong hlôh vao đơ\ng kon pơlei găh tơdrong pơyua tơpă kăp g^t păng đunh đai đơ\ng tơdrong vei bri đei hơto\k:“Jơnu\m jang hlôi răt kơmăi vi tính, kơmăi pơdăh vă pơtho hăm um ru\p ăn kon pơlei vao hơdăh găh tơdrong mă đei yua đơ\ng vei hơlen bri noh đơ\ng yơ mă đei. Dang đơ\ng thong đak mă yuơ vei bri noh hăp ro le\ch tơ\ glung, krong truh dơnâu hnam kơmăi unh hơyuh păng đơ\ng hnam kơmăi unh hơyuh noh axong jên klă ăn bơngai vei bri. Kon pơlei băt hơdăh noh đe vei bri păng đơ\ng mă gơh đei jên, păng băt hơdăh kơjă kăp g^t đơ\ng bri. Lơ kon pơlei đơ\ng ie\ khe\ kră băt vao tôm, tơdrong vei bri đei hơto\k [ôh hơdăh”

Đei pơjao vei hơlen hloh 37.000ha bri, lơ\m noh mă lơ đei yua jên klă vei bri, Jơnu\m vei hơlen bri Ngọc Linh hlôi jang tơnăp tơdrong pơtho vă kon pơlei băt atu\m vei bri. Kơdră anih jang noh [ok Đinh Ngọc Thanh ăn tơbăt, 5 xơnăm kơ âu, Jơnu\m jang hlôi pơih đei 323 tơdrong hơvơn tơroi tơ\ 58 thôn, pơlei hăm je# 18.000 ‘nu kon pơlei vang ako\m. Đơ\ng noh ăn [ôh, roi dru\t kơtang tơdrong pơtho, roi lơ bơngai băt truh kơluơ\t vei hơlen apưng hơto\k bri, Kơluơ\t vei hơlen cham char bri brăh noh tơdrong phă tơtông bri roi tơjur. Kiơ\ kơ [ok Thanh, pơkăp klă jên vei bri noh jing trong hiôk ăn anih jang teh đak păng kon pơlei bri bri. Yuơ noh pơtho găh trong jang âu truh hăm kon pơlei, pơtoi đei anih jang xơkơ\t jing tơdrong jang dơnơm lơ\m khei năr truh: “Hăm tơchơ\t dăh hrôih ‘nhăk pơkăp klă jên vei bri đơ\ng Jơnu\m pơgơ\r teh đak truh hăm kon pơlei, anih jang pơtoi hơto\k pơih lăm ho\k găh trong pơkăp klă jên vei bri tơ\ 58 thôn, pơlei lơ\m tơring đei bri pơkăp vei lăng hăm lơ trong phara băl. Khei năr păng anih pơtho tro\ [lep hăm khôi erih xa păng pơm jang kơ rim hơdrung kon kông păng pơm trong hiôk vă kon pơlei ako\m jang tơnăp. Tơre\k tơplih ‘nao găh tơdrong pơtho atu\m hăm in tơle\ch hla bar kăl, pa nô, áp phích vă pơtruh tơbang găh tơdrong hlôh vao păng pơm jang đơ\ng tôm kon pơlei” .

Lan chih păng rapor