VOV4.Bahnar - ‘Năr 19/12, tơ̆ plt Plei Ku, dêh char Gia Lai, Anih tơm vei lăng choh jang xa păng atŏk tơ iung tơ ring tơ rang kŭm hăm dôm dêh char Tây Nguyên pơ gơ̆r "Hop akŏm hơ tŏk tơ drong pơ gơ̆r pơ jing tơ ring pơ tăm vă jang tŏk pran ăn anih jang chĕh phe Tây Nguyên". Tĕh đak bơ̆n dang ei đei vă jê̆ 700.000 ha chĕh phe, plei chĕh phe đei hlŏh 1,76 triu tân 1 sơ năm, jĭ tĕh đak tĕch chĕh phe tơ̆ tĕh đak đe dơ̆ng mă 2 lơ̆m apŭng plenh tĕh. Lơ̆m nŏh, 92% tĕh pơ tăm păng 95% chĕh phe tĕch tơ̆ tĕh đak đe tơ̆ dôm dêh char Tây Nguyên.

Ƀok Kơ dră Lê minh Hoan pơ ma lơ̆m jơ hop akŏm

Tơ̆ hop akŏm, dôm bơ ngai tang măt athei tĕh đak păng anih jang kơ pal pơ jing trong tơ gŭm ăn anih tĕch mơ dro chih pơ jing hơ năn tơ mam păng dôm hla ar hơ găt tơ mam ‘lơ̆ng kơ chĕh phe apŭng plenh tĕh, mă loi tơ̆ dôm anih tĕch mơ dro tôch hơ len nhen tơ̆ EU, Mi, Nhật Bản. Kơ dră tơm vei lăng choh jang xa păng atŏk tơ iung tơ ring tơ rang Lê Minh Hoan ăn tơ băt, truh âu kơnh, Anih tơm vă pơ jing 1 tơ drong jang hơ drô̆ găh tĕch tơ mam đơ̆ng chŏh jang xa đei tơ̆ Châu Âu, vă chih hơ dăh trong jang đunh đai hơ nhăk chĕh phe păng dôm tơ mam đơ̆ng choh jang xa đei kơ Việt Nam mât tơ̆ dôm anih tĕch mơ dro tih. Dôm anih tĕch mơ dro athei pơ jing grŭp jang hơ doi vang tĕch chĕh phe tơ̆ tĕh đak đe vă băt hơ dăh tơ drong ‘mĕh vă răt yoa păng tơ drong hơ găt, dôm ki thuơ̆t kăl tơ̆ dôm tĕh đak.

Dơ̆ng: Tơ blơ̆