VOV4.Bahnar – Anih Linh vei xơlam teh Lai Hòa, Ƀô̆ đô̆i vei xơlam teh Sóc Trăng jing minh lơ̆m dôm anih linh vei xơlam teh rơgei lơ̆m tơdrong jang kiơ̆ pơkăp pơyua ăn tơpôl kon pơlei, mă hăt noh hăm kon pơlei kon kông lơ̆m tơring. Găh Hnam pơgang linh – kon pơlei tơguăt ưh adrô̆ jang tơnăp tơdrong vei lăng jơhngơ̆m jăn ăn kang ƀô̆ linh vei xơlam teh mă oei jang tơnăp tơdrong khăm hơmet jĭ ăn kon pơlei tơ̆ tơring.

Lai Hòa jing tơring tơnap tap kơ thĭ xăh Vĩnh Châu, đei lơ măt kon pơlei Khmer, kon pơlei erih mă lơ noh choh jang xa păng rôp hơnguăng ka hơdang tơ̆ đak dơxĭ. Kơyuơ noh, vă pơgenh chơ chă erih xa, kon pơlei hơnơ̆ng truh khăm hơmet jĭ đơ̆ng hrôih. Kiơ̆ kơ Thiê̆u tă Thái Minh Phong, Kơdră Hnam pơgang Linh kơ Anih Linh vei xơlam teh Lai Hòa, vă khăm hơmet jĭ ăn kon pơlei tơtom, trŏ 6 jơ rim pơgê noh kang ƀô̆ y tê̆ kơ hnam pơgang hlôi đei măt vă chă khăm hơmet jĭ đơ̆ng hrôih. Mă kăl, kon pơlei truh khăm hơmet jĭ mă lơ noh ‘nguaih kơ jơ pơm jang, kơyuơ noh, hnam pơgang axong kang ƀô̆ y tê̆ pơm jang măng năr hloi vă jang tơnăp găh vei lăng jơhngơ̆m jăn păng jang tơnăp xơnong jang kơ đe thây pơgang hăm bơngai jĭ: Kang ƀô̆ linh, bơngai jang tơ̆ hnam pơgang âu jang tơnăp dăp đon dăp bơnôh, kon pơlei truh khăm hơlen jơhngơ̆m jăn, hơmet jĭ noh ưh đei lê̆ kon pơlei gô đunh. Chă khăm hơmet jĭ păng axong pơgang tơtom vă kon pơlei năm jang. Kon pơlei hmach bơnê lơ kơ hnam pơgang âu.

Kơyuơ đơ̆ng tơdrong dăp đon dăp bơnôh đơ̆ng đe thây pơgang chô̆ kơlong jơk păng dăp đon bơnôh hăm bơngai jĭ noh hlôi pơjing đon lui ăn kon pơlei. Dang ei, rim năr hnam pơgang xơng khăm păng axong pơgang ăn hloh 30 ‘nu bơngai. Y sih Kiên Na Riêl kang ƀô̆ jang y tê̆ kơ hnam pơgang ăn tơbăt, inh noh bơngai Khmer noh băt hơdăh găh tơdrong erih kon pơlei tơ̆ tơring pơxĕl, ưh kơ băt pơma nơ̆r Việt. Ƀơ̆t ƀôh đe thây pơgang truh hrôih vă khăm hơmet jĭ, pơma nơ̆r Khmer vă pơma dơnuh păng pơtho hơdăh găh trong vei lăng jơhngơ̆m jăn noh kon pơlei xô̆ xôn. ‘Nâu duh jing jơhngơ̆m pran vă đe thây pơgang tơ̆ Hnam pơgang linh kơ Anih Linh vei xơlam teh Lai Hòa jang tơnăp xơnong jang po:  Lơ bơngai ưh kơ băt pơma nơ̆r Việt, ăh ba pơma nơ̆r Khmer noh đe xô̆ hơ iă. Ăh ba băt pơma nơ̆r Khmer noh duh ƀônh chă pơtho kon pơlei yua pơgang, pơtho găh trong vei lăng jơhngơ̆m jăn, tang găn pơrang jĭ... nhen pơlŏ tô̆ lĕch ƀre ƀronh, tŏk huyêt ap dăh mă jĭ yô đak xĭk âu to...

Kơyuơ ataih đơ̆ng anih tơm xăh noh lơ kon pơlei tơ̆ minh ƀar tơring kơ xăh Vĩnh Tân, dôm tơring Prey Chóp, Prey Chóp A, Prey Chóp B, lơ̆m xăh Lai Hòa adoi truh khăm, hơmet jĭ tơ̆ hnam pơgang, Thiê̆u tă Thái Minh Phong, Kơdră Hnam pơgang Linh kơ Anih vei xơlam teh Lai Hòa ăn tơbăt, kon pơlei tơ̆ dôm jăl trong jih đak dơxĭ kơ thĭ xăh Vĩnh Châu, dêh char Sóc Trăng păng pơđĭ kon pơlei tơ̆ tơring tơjê̆ lơ̆m dêh char Bạc Liêu duh truh hơmet jĭ tơ̆ âu. Rim xơnăm, Hnam pơgang tơlĕch khăm, hơmet jĭ păng axong pơgang ăn pơhlom 10.000 ‘nu bơngai jĭ. Atŭm hăm noh, hnam pơgang oei tơroi ăn kon pơlei băt trong tang găn păng tơjră minh ƀar tơdrong jĭ nhen: pơlŏ pơgrŭn, jĭ đuh jơ̆ng – ti – ƀơ̆r, pơlŏ tô̆ lĕch ƀre ƀronh... Mă kăl, kang ƀô̆ anih jang pơgang âu năm truh rom unh hnam vă tơroi găh trong tang găn păng tơjră pơrang jĭ Covid-19 truh hăm kon pơlei băt hơdăh. Đơ̆ng noh, atŭm jơhngơ̆m hăm jơnŭm pơgơ̆r tơring tang găn păng tơjră pơrang jĭ Covid-19 đei jơnei hloh:  Inh duh tơroi rim kơ năr, nhen chă axong hla bar tơroi tơbăt găh pơrang jĭ Covid-19, lơ̆m khei năr âu ki pơrang jĭ hơbuh hli hlơt noh anih jang duh tơroi tơbăt ăn kon pơlei  nĕ chă akŏm lơ bơngai, athei chô̆ che gom ƀŏ, ôp ti mă rơgoh hăm kơƀŏng, pơ ’nguaih hnam oei mă rơgoh. Tơroi tơbăt rim năr, mưh kon pơlei pơlŏ tô̆ noh chă hơvơn oei lơ̆m hnam, anih jang pơgang truh pơkă hơyuh tô̆ hơkâu jăn minh năr 2 ‘măng vă hơlen lăng.

Dang ei, Hnam pơgang Linh lơ̆m Anih linh vei xơlam teh Lai Hòa đei 5 kang ƀô̆ y tê̆ vă chă khăm hơmet jĭ. Mă tam đei ƀak sih mă lei Hnam pơgang duh oei pơjing đon lui ăn kon pơlei ƀơ̆t truh khăm hơmet jĭ. Ƀôh kon pơlei ưh kơ pơngơ̆t kơ đon năm trong ataih truh khăm jĭ, đe khul linh, ƀak sih hơnơ̆ng adrin ming hơmet jĭ ưh kơ mơ̆ng măng năr. Tơdrong xô̆ hơ iă đơ̆ng kon pơlei ăh klaih jĭ noh jing jơhngơ̆m pran vă đe ‘nhŏng tơguăt hăm tơring, tơguăt hăm kon pơlei, keh đang tơnăp xơnong jang đei pơjao.

Hlôi jê̆ 20 xơnăm kơ âu, Hnam pơgang linh tơ̆ Anih Linh vei xơlam teh Lai Hòa, Ƀô̆ đô̆i vei xơlam teh Sóc Trăng hlôi jing anih lui ngeh, hơ ‘nhăk tơdrong xơđơ̆ng lơ̆m đon, tơdrong xô̆ ăn bơngai jĭ hin dơnuh, mă hăt noh kon pơlei Khmer tơ̆ tơring xơlam teh đak dơxĭ.

Lan chih păng pơre nơ̆r