Bruk  quy hoạch bhum taneh pala, pandar công nghệ bahrau ka phun thanh long hu dong ka rai duik urang nong di dom labik dalam tỉnh Long An ginup meda jang. Rilo lô bao thanh long chất lượng glong hu pablei tabiak negar langiu tapa dom darka pasa kan tame. Ni lac pren khang piah ka urang nong khang hatai salih jalan ngak mbang pala drak, patagok  năng suất song  chất lượng pandap. Sa dalam dom mô hình  bahrau dok hu urang nong Long An caik hatai sangka lac pala thanh long hatai meriak meng mejam tui công nghệ Israel. Vinh Quang, urang vak di rayo sap ndom VN dok di ban raya Hồ Chí Minh hu kadha vak khan ka mô hình ni.  

          Yaok pluh thun ni mai , meng 16 ribau  mét vuông (m2) taneh, ong Trần Văn Năm, urang nong xã Long Trì, huyện Châu Thành  patom tame pala thanh long hatai patih. Jiak di ni, kayua thanh long hatai patih yaom lap, pablei oh tani tanat, nan ye ong Năm khang hatai  salih labaih 6 ribau m2  taneh tapa pala thanh long hatai meriah , tui công nghệ pruh ia sit sit di Israel. Tong abih mblang taneh thanh long tai meriah di ong Năm tal tuk vak ni jeng hu pandar  công nghệ pruh  khak, pruh ia sit sit tự động hu tui iek. Dalam bein di  ong, yaok geing thanh long tabiak meng  30 tal  35 boh, năng suất glong jang rilo. Bilan paik baoh meng bloh, thanh long tai meriak  yaom  45 ribau đồng/1kg  hu ba mai ka sang ong yaok rituh triệu đồng, rilo jang 2 mbang dut song thanh long tai patih. Ong Trần Văn Năm lac:

          Dut song ngak padai bingi jang rilo, nan ye urang salih tapa pala thanh long abih. Pala thanh long hulin padang hu sang danaok, brei anek nao bac đại học, bloh blei hu radeih ginup, rai duik ginup meda jang rilo mbang. Dahlau deih pala padai  habar samu urak ni . Pala  thanh long kein laba, yau nan ye, tong abih urang nong di labik ni pala thanh long abih) 

          Lac sa dalam dom urang akaok meti di xã Long Trì pala thanh long tai meriah, jeng lac urang thau salih bruk bhian randap pala thanh long meng geing bê tông tapa pala meng mejam pasei tui công nghệ Israel, ong Nguyễn Văn Minh, urang nong palei  Long Hòa, xã Long Trì, huyện Châu Thành daok hu jiak 10 ribau m2 bein pala thanh long rilo meriah  meng geing, dalam nan hu  2 ribau m2 taneh pala meng công nghệ mejam pasei  di Israel. Dut song mô hình pala meng yaok geing, thanh long mejam gam patak pataom hu  mblang taneh gam patrun hu sa meteh pren iek glang, takik hu halak halin, paik baoh mbuan lagaih song nyaik hu ribuk hangin. Lingiu di nan, jalan pruh ia patak patom, pagam song dom janih jamriak dong ka urang nong  thau hu  hadom ia, hadom khak njauk pandar  dalam yaok tuk vak di mô hình bahrau ni, dok brei mboh kein laba di nyu. Ong Nguyễn Văn Minh brei thau:   

          Ngak tui mô hình klak  ye drei pruh gha jeng hu lai khak jru tame, min ia biak rilo dut song  nhu cầu di nyu. Pren ngak drei ngak 2 tal 3 harei jeng salah bloh, min pruh habar samu gauk hu. Tuk pruh tui jalan klak brei pruh gah angaok song ala gha, ye kayua xử lý nồng độ jru biak glong ye brei tathuak ia. Daok  mô hình drei dok ngak  ye oh cang ngak yau nan. Kayua tuk pruh tathuak di angaok dak rilo ye phun mbuan si njom ruak rilo jang.)

          Mô hình pala thanh long meng mejam song pruh ia sit sit  di  Israel nan nyu bahrau, nan ye oh njauk lac urang nong halei jeng khin ngak . Min tui kuhria di Viện phun mbang boh gah merong, meyah urang nong khang  hatai ngak tui mô hình ni ye meda brei năng suất glong jang  meng  2 tal  3 mbang dut song pala geing  song iek glang tui jalan meng kan, meda mek hu meng 80 tal labaih  100 tấn/ha. Huyện Châu Thành, tỉnh Long An dok pachreih urang nong pala tui công nghệ bahrau, mek hu tanut VietGap,GlobalGap,piah pabak ka dom darak pasa catang gah chất lượng. Ong Nguyễn Chí Thiện, Phó Giám đốc Sở ngak nong song patagok palei pala  tỉnh Long An daok brei thau lac:

          Urak ni, khol hulin dok caik hatai sangka tal pajaih ka mik va, urak ni dok pambuak bruk  song Viện phun mbang boh piah duah thau dom pajaih siam jang hacih ruak jang piah dong ka mik va pabak siam ka bruk pablei tabiak negar langiu. Abih di nyu nan lac khol hulin dok ngak dahlau ka bruk pablei tabiak negar langiu tui tanut VietGap song dom tanut glong jang patom tame ka dom Darak pasa kan tame. Urak ni dom danak dak ba brei công nghệ glong, khol hulin dok patom tame dong ka mik va .

         Tuk vak tapa, rai duik di bhap bini bhum pala   thanh long di huyện Châu Thành, tỉnh Long An hu tagok glaong biak rilo biak rilo. Piah ngak hu bruk padang 2 ribau  ha thanh long hacih  chất lượng glong, tỉnh Long An daok hu jalan brei tagok jang 2 mbang phun jien ka bruk ba thiết bị kỹ thuật tame pala drak , jalan  xử lý hadei di tuk paik boh piah ba boh thanh long nao atah jang dalam tuk vak anak tal. Urang pala  thanh long jeng brei thau dom sarak, adat hukum, duah thau dom mô hình, công nghệ, tiêu chuẩn piah sản xuất pabak ka darak pasa./.