Bilan 11 thun 2016, di xã Phước Thái, huyện Ninh Phước, tỉnh Ninh Thuận  hu sa bruk mbung ia biak pandik harao, urang mblung ia lac Mã Vỹ Khang bangsa Cam umo 12 thun, anek saih tal 6 sang bac Trung học cơ sở Đổng Dậu. Bruk di xã Phước Thái  ngak ka urang oh ka abih pandik harao ye bilan 3 thun 2017, di xã Xuân Hải, huyện Ninh Hải hu sa bruk mblng ia tra ngak ka 1 anek saih tal 2, Sang bac Tiểu học Phước Nhơn lac Nguyễn Quốc Cường bangsa Cam, metai. Hadei di tuk peih bac angaok jalan mai sang, Cường jak dom ayut tabiak danao ikan atah di sang bac 1 km piah caluai. Tal labik, Cường chat trun dahlau, kayua danao ia dalam, oh thau caluai nan ye Cường laik trun dalam ia. Danao ia nan praong labaih 30 mét vuông, dalam jaik 3 mét, kayua urang dalam palei kuac raok palao raong ikan, oh hu menuac khik iek, oh hu paga pacang, oh hu biển báo nguy hiểm.

Tui kuhria mboh di Sở Lao động–Thương binh saong Xã hội tỉnh Ninh Thuận, meng thun 2016 tal urak ini, hu labaih 90 mbang bala ngak ka 29 uraniah metai, dalam nan hu 24 adei metai kayua mblung ia. Piah patagok bruk pambuak gauk, pacang bala mblung ia ka uranaih, tỉnh Ninh Thuận hu harak văn bản tacei pato do pakat, dom ngành saong puk palei sangka pathau khan, pato pakai jalan pacang caga mblung ia ka uraniah tal taong abih bhap bini, abih di nyu nan lac dom bhum kan kandah, bhum urang bangsa takik hu uraniah mblung ia rilo. Dom xã, huyện pasang iek, pabak dom biển cấm, biển báo, biển chỉ dẫn di dom labik mbuan mblung ia uraniah. Padang  “Danak dak caluai an toàn”, pato caluai ka uranaih dalam palei saong dalam sang bac; cuk ao phao tuk hu mbaok tame dom bruk me-in sambai dalam ia… sa-ai Hứa Thị Ngọc Du, Bí thư xã Đòan Phước Hữu, huyện Ninh Phước, tỉnh Ninh Thuận brei thau:

Xã Đoàn pambuak bruk haong dom gah pathau khan jak ba dom amaik ame iek glang anek bhik….

Ninh Thuận lac bhum taneh thu lagu nan ye danao ia hu kuac raok rilo piah mek ia pruh ka phun pala. Lingiu di nan, tỉnh daok hu rilo kraong, craoh nduac tapa dom palei, dom bhum urang bangsa takik. Nan ye, Ninh Thuận jeng daok mbuan hu bruk mbung ia uraniah. Ong Nguyễn Văn Bình, Phó Giám đốc Sở Lao động, Thương binh saong Xã hội tỉnh Ninh Thuận  kakei lac:

Dom puk palei, dom amaik ame njauk caik hatai sangka tal uranaih, peih ngak Quyền di uranaih, jhui klaak jhui var. Kol drei brei hu jalan ngak piah pacang caga uraniah njauk xâm hại, bạo lực saong mblung ia dalam bilan hè saong thun bac 2017 -2018 jaik tal.

Meng bruk ba tangin tame di rilo gah chức năng, puk palei saong dom jalan ngak siam, meda patrun hu bruk mblung ia di uraniah dalam tỉnh Ninh Thuận. Lingiu dom jalan ngak di dom gah chức năng, ye amaik ame,dom urang iek glang uranaih, dom cei gru, nai gru... njauk gam gam kaei, pahadar, tacei pato uraniah jalan pacang caga, langyah, piah thau dom labik nguy hiểm piah njaik…Hu yau nan, meng patrun patakik hu bala ka uranaih, khik ka uraniah hu sa bilan hè bui sambai, khang kadang, siam mekre, selamat./.